Ecclesiastes 3

¹Atĩrĩrĩ, kĩndũ o gĩothe kĩrĩ na ihinda rĩakĩo, o na ũndũ o wothe ũrĩa ũrĩ gũkũ thĩ, ũrĩ na ihinda rĩaguo.

²Kũrĩ hĩndĩ ya gũciarũo, o na hĩndĩ ya gũkua; hĩndĩ ya kũhanda, o na hĩndĩ ya kũmunya kĩrĩa kĩhande;

³hĩndĩ ya kũũraga, o na hĩndĩ ya kũhonia; hĩndĩ ya gũtharia, o na hĩndĩ ya gwaka;

⁴hĩndĩ ya kũrĩra, o na hĩndĩ ya gũtheka; hĩndĩ ya gwĩthikĩra, o na hĩndĩ ya kũina.

⁵Hĩndĩ ya kũhurunja mahiga, o na hĩndĩ ya kũmacokereria; hĩndĩ ya kũhĩmbĩria, o na hĩndĩ ya kwĩhinga kũhĩmbĩria.

⁶Hĩndĩ ya gũcaria, o na hĩndĩ ya kũũrũo nĩ indo; hĩndĩ ya kũiga, o na hĩndĩ ya gũte.

⁷Hĩndĩ ya gũtembũra, o na hĩndĩ ya gũtuma; hĩndĩ ya gũkira ki, o na hĩndĩ ya kwaria;

⁸hĩndĩ ya kwenda, o na hĩndĩ ya gũthũũra; hĩndĩ ya mbaara, o na hĩndĩ ya thayũ.

⁹Mũndũ ũrĩa ũrutaga wĩra-rĩ, egunaga atĩa na wĩra ũcio etungumanagia naguo?

¹⁰Nĩnyonete mĩtangĩko ĩrĩa Ngai aheete ciana cia Adamu, nĩguo itangĩkage nayo.

¹¹Ombire kĩndũ o gĩothe gĩthakare hĩndĩ yakĩo; o na ningĩ agĩĩkĩra kĩriga ngoro-inĩ ciao, matikanamenye wĩra ũrĩa Ngai aanaruta kuuma o kĩambĩrĩria nginya o ithirĩro.

¹²Nĩnjũĩ atĩ hĩndĩ ĩrĩa yothe megũtũũra muoyo, matirĩ ũndũ ũngĩ mangĩĩka ũhĩtũkanĩte na gũkena o na kwĩonera wega.

¹³O na ningĩ ngamenya atĩ kĩheo kĩa Ngai nĩ gĩkĩ, atĩ o mũndũ arĩage na anyuage, na onage wega mĩĩtungumanĩrie-inĩ yake yothe.

¹⁴Nĩnjũĩ atĩ ũndũ o wothe ũrĩa wĩkagwo nĩ Ngai ũgũtũũra tene na tene; ndũngĩongerereka, kana ũnyihanyihĩke; nake Ngai awĩkĩte, no getha andũ mamwĩtigagĩre.

¹⁵Ũrĩa gũtariĩ rĩu-rĩ, noguo gwatariĩ tene; na ũrĩa gũgatuĩka thutha-inĩ, no ũrĩa gwatariĩ tene; nake Ngai acaragia atĩ ũndũ ũrĩa wahĩtũkire ũcoke o ro ho.

¹⁶O na ningĩ makĩria ngĩona atĩ gũkũ thĩ kwaraga riũa, handũ harĩa hatuagĩrũo cira, waganu ũrĩ o ho; o na handũ harĩa harĩ ũthingu, waganu ũrĩ o ho.

¹⁷Ngĩkiuga na ngoro atĩrĩ, Ngai nĩwe ũgacirithia andũ arĩa athingu, o na arĩa aaganu; nĩ gũkorũo maũndũ mothe, o na mawĩra mothe marĩ na mahinda namo.

¹⁸Naho ha ũhoro wa ciana cia Adamu ngĩkiuga na ngoro atĩrĩ, gũtuĩkaga ũguo nĩ getha Ngai acigerie, nĩguo imenye atĩ ihaana o ta nyamũ.

¹⁹Nĩ gũkorũo maũndũ marĩa makoraga ciana cia Adamu, nomo makoraga nyamũ o ũndũ ũmwe; o ta ũrĩa andũ makuaga-rĩ, ũguo noguo ikuaga o nacio; ĩĩ, ti-itherũ harĩ ciũmbe ciothe roho no ũmwe; o na mũndũ ndarĩ handũ akĩrĩte nyamũ; nĩ ũndũ wothe no tũhũ.

²⁰Othe mathiaga o kũndũ kũmwe; nĩ ũndũ othe moimire o tĩri-inĩ, nao othe magacoka matuĩke o tĩri.

²¹Nũ ũngĩkĩmenya kana hihi roho wa mũndũ nĩwambataga na igũrũ, naguo roho wa nyamũ ũgaikũrũka na thĩ?

²²Tondũ ũcio ngĩkĩona atĩ hatirĩ ũndũ mwega ũhĩtũkanĩte na mũndũ gwĩkenia na mawĩra make, amu ũcio nĩguo igai rĩake; nĩ ũndũ-rĩ, nũ ũngĩkĩmũcokia rĩngĩ, nĩguo akona maũndũ marĩa makamũtua thutha?