Ecclesiastes 2

¹Nĩ kwĩra ndeĩrire na ngoro yakwa atĩrĩ, Rĩu-rĩ, ta reke ngũgerie na njĩra ya gĩkeno, wĩhũnĩrĩrie maũndũ mega; na atĩrĩrĩ, ũndũ ũcio o naguo-rĩ, warĩ wa tũhũ.

²Ha ũhoro wa mĩtheko ndoigire atĩrĩ, Nĩ ũgũrũki: o naho ha ũhoro wa gĩkeno ngĩũria atĩrĩ, Nĩ kĩa bata ũ?

³Ndatuĩririe na ngoro yakwa ũrĩa ingĩkenia mwĩrĩ wakwa na ndibei, o nayo ngoro yakwa ĩkorũo ĩkĩndongoria na ũũgĩ; o na ũrĩa ingĩrũmanĩrĩra na ũkĩgu, o nginya ’menye ũrĩa ciana cia Adamu ingĩagĩrĩrũo nĩ gwĩkaga gũkũ thĩ matukũ mothe ma muoyo wacio.

⁴Ngĩkĩĩrutĩra mawĩra manene, na ngĩĩakĩra nyũmba nyingĩ, na ngĩĩhandĩra mĩgũnda ya mĩthabibu.

⁵Ngĩkĩĩrĩmithĩria mĩgũnda, na ngĩgĩa na ng’ũndũ hande mĩtĩ, ningĩ ngĩhanda mĩtĩ ya matunda ma mĩthemba yothe kuo.

⁶Ngĩcoka ngĩgwĩkĩra tũria twa maĩ twa kuunithagĩria mũtitũ kũrĩa mĩtĩ ĩrĩkũragĩra.

⁷Ningĩ ngĩkĩĩgũrĩra ngombo cia arũme o na cia andũ-a-nja, o na ngĩgĩa na ngombo iciarĩirũo gwakwa mũciĩ; o na ningĩ ngĩgĩa na ndũru nene cia ng’ombe na mbũri, ngĩkĩria arĩa othe maarĩ mbere yakwa kũu Jerusalemu;

⁸o na ningĩ ngĩĩyũnganithĩria betha na thahabu, o na indo cia bata iria cia athamaki kĩũmbe, o na cia mabũrũri marĩa mathamakagwo nĩ athamaki, o na ngĩgĩa na aini, arũme na andũ-a-nja, na ngĩgĩa na indo iria ikenagia ciana cia Adamu, o na mathuriya aingĩ mũno.

⁹Tondũ ũcio ngĩkĩneneha, na ngĩtonga ngĩkĩria andũ othe arĩa maarĩ mbere yakwa kũu Jerusalemu; o naguo ũũgĩ wakwa ngĩgĩikara o naguo.

¹⁰O naguo ũndũ o wothe ũrĩa weriragĩrio nĩ maitho makwa-rĩ, ndiigana kũmahatana naguo, na ndiagirĩrĩirie ngoro yakwa gĩkeno o na kĩrĩkũ, nĩ gũkorũo ngoro yakwa nĩyakenagio nĩ mawĩra makwa; naguo ũndũ ũcio warĩ igai rĩakwa riumanĩte na mawĩra makwa mothe.

¹¹Hĩndĩ ĩo ngĩcoka ngĩrora mawĩra macio mothe ndarutĩte na moko makwa, o na gwĩtungumania kũrĩa ndetungumanĩtie ngĩmaruta; ngĩkĩona atĩ mothe maarĩ o ma tũhũ, na no gwĩthĩnia gũtheri, ningĩ gũkũ thĩ kwaraga riũa-rĩ, gũtirĩ kĩguni mũndũ angĩona kuo.

¹²Na rĩrĩ, ngĩkĩĩhũgũra nĩguo mbare ũũgĩ, na ũgũrũki, o na ũkĩgu: nĩ ũndũ-rĩ, mũndũ ũrĩa ũgũcoka ithenya rĩa mũthamaki ũrĩa maanenehirie tene-rĩ, nĩ atĩa ũngĩ angĩkĩhota gwĩka?

¹³Hĩndĩ ĩo ngĩkĩona atĩ ũũgĩ nĩũkĩrĩte ũkĩgu, o ta ũrĩa ũtheri ũkĩrĩte nduma.

¹⁴Maitho ma mũndũ mũũgĩ ti mairang’a, na kĩrimũ kĩgeraga nduma-inĩ; no nĩndonire atĩ o erĩ makoragwo nĩ ũndũ o ro ũmwe.

¹⁵Ngĩcoka ngĩkiuga na ngoro atĩrĩ, O ta ũrĩa kĩrimũ gĩkoragwo nĩ maũndũ-rĩ, noguo na niĩ ngoragwo nĩmo; ũũgĩ ũcio wakwa mũingĩ-rĩ, ũkĩrĩ bata wa kĩ? Ningĩ ngĩkiuga na ngoro atĩrĩ, Ũhoro ũyũ o naguo no wa tũhũ.

¹⁶Nĩ gũkorũo mũndũ ũrĩa mũũgĩ, o na kĩrimũ, o erĩ nĩ kũriganĩra makariganĩra mĩndĩ na mĩndĩ, nĩ ũndũ matukũ-inĩ marĩa magoka, othe magakorũo marĩ ariganĩru. Hĩ, kaĩ mũndũ ũrĩa mũũgĩ agĩkuaga o ta kĩrimũ!

¹⁷Tondũ ũcio ngĩgĩthũũra muoyo, nĩ ũndũ wĩra ũrĩa ũrutagwo gũkũ thĩ kwaraga riũa, warĩ o wa kũnjiguithia ũũru: nĩ gũkorũo wothe no wa tũhũ, na wa gwĩthĩnia gũtheri.

¹⁸Na niĩ-rĩ, ngĩgĩthũũra gwĩtungumania gwakwa kũrĩa ndetungumanĩtie gũkũ thĩ kwaraga riũa, kuona atĩ no mũhaka ngagũtigĩra mũndũ ũngĩ ũrĩa ũgacoka ithenya rĩakwa.

¹⁹Ningĩ-rĩ, nũ ũngĩkĩmenya kana hihi agatuĩka mũndũ mũũgĩ kana kĩrimũ? No rĩrĩ, nĩagaatha wĩtungumania wakwa wothe ũrĩa ndanetungumania, ngonania ũũgĩ naguo gũkũ thĩ kwaraga riũa. Naguo ũndũ ũcio-rĩ, no wa tũhũ.

²⁰Tondũ ũcio ngĩkĩgwata kũũmĩra mĩĩtungumanĩrie tha ĩrĩa ndetungunianagia gũkũ thĩ kwaraga riũa.

²¹Nĩ ũndũ-rĩ, he mũndũ ũrutaga wĩra na ũũgĩ, o na ũmenyi maũndũ, ohĩgĩrĩire maũndũ make mũno; no rĩrĩ, akaũtigĩra mũndũ ũtaũnogeire, ũtuĩke igai rĩake. O naguo ũndũ ũcio no wa tũhũ, na nĩ mũũru mũno.

²²Nĩ gũkorũo gwĩtungumania kũrĩa aanetungumania gũkũ thĩ kwaraga riũa, o na gwĩthĩnia kũrĩa aanethĩnia ngoro-rĩ, kũmũgunĩte atĩa?

²³Tondũ matukũ make mothe no ma thĩna, mĩtangĩko yake nĩ ya kũmũreherere kĩeha; ĩĩ, ti-itherũ, o na ũtukũ ngoro yake ndĩkindagĩria. O naguo ũndũ ũcio, no wa tũhũ.

²⁴Gũtirĩ ũndũ ũngĩ mwega mũndũ angĩĩka ũhĩtũkanĩte na kũrĩa, o na kũnyua, o na gwĩkenia ngoro na wĩra wake. O naguo ũndũ ũcio-rĩ, ndawonire atĩ uumĩte guoko-inĩ kwa Ngai.

²⁵Nĩ ũndũ-rĩ, nũ ũngĩhota kũrĩa kana gũkena, Ngai atarĩ ho?

²⁶Nĩ gũkorũo mũndũ ũrĩa ũkenagia Ngai-rĩ, Ngai amũheaga ũũgĩ, na ũmenyi maũndũ, o na gĩkeno: no mũndũ ũrĩa mwĩhia-rĩ, amũheaga mĩtangĩko, nĩguo acokererie indo na acihae, nĩguo agacihe mũndũ ũrĩa ũkenagia Ngai. Ũndũ ũcio o naguo no wa tũhũ, na wa gwĩthĩnia gũtheri.