Ecclesiastes 1

¹ATĨRĨRĨ, ici nĩcio ndeto cia Mũhunjia, ũrĩa mũrũ wa Daudi, mũthamaki wa Jerusalemu.

²Maũndũ mothe nĩ ma tũhũ, ũguo nĩguo Mũhunjia ũcio ekuuga; ĩĩ, ti-itherũ mothe nĩ ma tũhũ mũtheri, mothe nĩ tũhũ biũ.

³Nĩ uumithio ũrĩkũ mũndũ onaga harĩ wĩra wothe ũrĩa arutaga gũkũ thĩ kwaraga riũa?

⁴Rũciaro rũmwe rũathira-rĩ, nĩ rũngĩ rũũkaga; no rĩrĩ, thĩ ĩtũũraga ĩrĩ o ho tene na tene.

⁵O narĩo riũa rĩrathaga, na rĩgathũa, ningĩ rĩgacoka kũhanyũka na kũrĩa rĩrathagĩra.

⁶Rũhuho rũhurutanaga, rũgathiĩ rũrorete gũthini, na rũgacoka mwena wa gathigathini; naruo rũthiũrũrũkangaga o kũrĩa rũgeraga rũtegũtigithĩria.

⁷Njũĩ ciothe ciitagĩrĩra iria-inĩ; no rĩrĩ, iria rĩu rĩtiiyũraga; ningĩ kũndũ kũu njũĩ icio ciumaga-rĩ, nokuo icokaga.

⁸Maũndũ mothe-rĩ, marehanagĩrĩre mĩnoga ĩrĩa ĩtangĩgweteka; narĩo riitho-rĩ, rĩtihũnaga kuona; o nakuo gũtũ-rĩ, gũtiiganagia kũigua.

⁹Maũndũ marĩa maarĩ kuo tene, nomo magacoka kũgĩa kuo, namo marĩa maatũire mekagwo, nomo magacoka gwĩkwo thutha-inĩ; na gũtirĩ ũndũ o na ũrĩkũ ũtarĩ wa ndũire gũkũ thĩ kwaraga riũa.

¹⁰Ĩ hihi nĩkũrĩ ũndũ ũngĩĩrũo nĩ andũ atĩ, Onei, ũyũ ti wa ndũire? Gũtirĩ; nĩ gũkorũo ũndũ ũcio warĩ o kuo tene mahinda marĩa tũtaaciarĩtwo.

¹¹Andũ arĩa maarĩ kuo tene-rĩ, matiririkanagwo, o nao arĩa magaciarũo thutha matikaririkanagwo nĩ arĩa makamarũmĩrĩra.

¹²Niĩ Mũhunjia ndarĩ mũthamaki wa gũthamakĩra Isiraeli Jerusalemu.

¹³Na nĩndageririe na ngoro kũbara, na gũtuĩria maũndũ mothe marĩa mekagwo gũkũ thĩ; no rĩrĩ, nĩ gũtangĩka kũnene Ngai aatũmire ciana cia Adamu itangĩkage.

¹⁴Mawĩra mothe marĩa marutagwo gũkũ thĩ kwaraga riũa-rĩ, nĩndĩmabarĩte; na atĩrĩrĩ, mothe nĩ ma tũhũ, o na gwĩthĩnia gũtheri.

¹⁵Harĩa hogomu hatingĩrũngarĩka; o nakĩo kĩrĩa kĩagĩte gĩtingĩtarĩka.

¹⁶Nĩ gwĩciria ndeciririe na ngoro yakwa, ngiuga atĩrĩ, Nĩngĩĩte na ũũgĩ mũnene gũkĩra andũ othe arĩa maarĩ mbere yakwa Jerusalemu; ĩĩ, ti-itherũ ngoro yakwa nĩĩgĩĩte na ũũgĩ mũno, o na ũmenyi maũndũ.

¹⁷Na niĩ ngĩĩhaarĩria na ngoro yakwa kũmenya maũndũ ma ũũgĩ, o na kũmenya ũrĩa ũgũrũki na ũkĩgu itariĩ: ngĩkĩona atĩ o na ũndũ ũcio naguo, no wa gwĩthĩnia gũtheri.

¹⁸Nĩ ũndũ kũũhĩga mũno nĩ kwĩreherere ruo rũingĩ; nake mũndũ ũrĩa wĩyongereire ũmenyi maũndũ, nĩ kĩeha kĩingĩ eyongereire.