Proverbs 31

¹MAYA nĩ mohoro ma mũthamaki wetagwo Lemueli; nĩ ũrathi aarutirũo nĩ nyina.

²Ngũgĩkwĩra atĩa, mũrũ wakwa? ĩ ngũkwĩra atĩa, mwana ũyũ wa nda yakwa? ngũgĩkwĩra atĩa, o we mwana ũyũ ndehĩtaga nĩ ũndũ waku?

³Atĩrĩrĩ, ndũkanatuĩke mũhei andũ-a-nja hinya waku; menya ũkanyarira mĩthiĩre yaku harĩ acio maninaga athamaki.

⁴Athamaki, Lemueli-ĩ, athamaki-rĩ, matiagĩrĩirũo nĩ kũnyuaga ndibei; anene-rĩ, matiagĩrĩirũo nĩ gũtinda makĩũragia, Njohi ĩrĩ ha?

⁵Matigatuĩke atĩ maanyua makariganĩrũo nĩ watho, magakĩgaramia ituĩro rĩa mũndũ o na arĩ ũ, arĩa monete thĩna.

⁶Njohi-rĩ, heaga ũrĩa ũkiriĩ gũthira, ndibei, heaga ũrĩa wĩ na ũcũngũ ngoro;

⁷Ũcio nĩakĩnyue, nĩguo ariganĩrũo nĩ ũnyamari wake, ũritũ ũcio wake agĩtĩge kũũririkana rĩngĩ.

⁸Ũrĩa ũtangĩhota kwĩarĩrĩria, wee, tumũraga kanua gaku nĩ ũndũ wake, waragĩrĩrie othe ta acio matigĩtwo oiki.

⁹Tumũraga kanua, ũtuanagĩre na ũthingu, andũ arĩa athĩnĩki, o arĩa aagi-rĩ, ũkĩmaciragĩre na kĩhooto.

¹⁰MŨTUMIA ngatha-rĩ, angĩoneka nũ? nĩ amu thogora wake nĩũkĩrĩte mũno wa ruru iria ndune.

¹¹Ngoro ya mũthuriwe nĩwe ĩĩhokete, na mũthuri ũcio ndarĩkĩagaga kuona thũgũrĩ.

¹²Mũtumia ũyũ matukũ mothe ma muoyo wake no wega amwĩkaga, ndangĩmwĩka ũũru.

¹³Eyethagĩra guoya wa ng’ondu o na ndigi cia ũguta, agagĩcirutithagia wĩra na moko make arĩ o na mwĩendero.

¹⁴Ahuana ta marikabu iria cia biacara nĩ ũrĩa athũgũraga irio ciake o kũraya.

¹⁵O na kũroka arokaga gũũkĩra kũrĩ o ũtukũ, akagagũra andũ a nyũmba yake, nacio ndungata ciake cia airĩtu agaciathĩrĩra mawĩra ma cio.

¹⁶Ataranagia ũhoro wa mũgũnda mũna, akaũgũra, agakĩũhandĩthia mĩthabibu na ũrĩmi wa moko make.

¹⁷Eohaga hinya njohero ta kwĩoha mwĩhotoro, na kũnyitia akanyitagia moko make marute wĩra.

¹⁸Nĩonaga atĩ wonjorithia wake nĩũrĩ wongereri; tawa wake ũgakĩraaraga o ũgĩakana.

¹⁹Agwatagĩrĩra mũtĩ ũrĩa wa kuogothithia uuthi, nakĩo gĩcũni agakĩnyita na hĩ.

²⁰Akumbatũragĩria andũ arĩa athĩni rũhĩ, ĩĩ-ni, arĩa aagi agakĩmatambũrũkagĩria moko.

²¹Ndacakayagĩra andũ a gwake kũngĩgũa tharunji, nĩ gũkorũo andũ ake othe mehumbĩte nguo mũthemba ũrĩa mũtune.

²²Ningĩ nĩetumagĩra mĩrengeti ya kwara ĩrĩ mĩcoora, na nguo ciake nĩ cia gatani ĩrĩa njega na tama wa rangi wa zambarau.

²³Mũthuriwe nĩekũũraine e thome, rĩrĩa aikaranĩtie na athuri a bũrũri.

²⁴Mũtumia ũcio nĩatumaga matonyo ma gatani akĩmendagia, o na mĩcibi agathondeka o ĩgĩthiaga na mũhũri wa biacara.

²⁵Hinya o na ũtĩĩku nĩcio nguo iria ehumbĩte; ũndũ ũrĩa ũngĩũka thutha agakĩũthekagĩrĩra.

²⁶Kanua gake atumũraga na ndeto cia ũũgĩ-ũrĩa-wa-ma, na kĩrĩra kĩrĩa kĩĩ rũrĩmĩ-inĩ rũake nĩ kĩrĩa gĩa ũtugi.

²⁷Kũrorereria nĩaroragĩrĩria mĩthiĩre ya andũ a nyũmba yake; ndarĩagĩra irio ũgũta.

²⁸Ciana ciake nĩirũgamaga ikoiga arorathimwo; mũthuriwe o nake nĩ kũgatha amũgathaga, akamwĩra,

²⁹Andũ-a-nja nĩ aingĩ maanatuĩka ngatha, no wee-rĩ, nĩũmakĩrĩte othe.

³⁰Ngoga nĩ cia kũhenania, naguo ũthaka nĩ wa tũhũ, ĩndĩ mũtumia ũrĩa mwĩtigĩri Jehova-rĩ, nĩwe wa gũkumagio.

³¹Mũhei ũrĩmi wa moko make, namo mawĩra make marotũma akumagĩrio thome-inĩ!