Proverbs 30

¹MAYA nĩ mohoro ma Aguri mũrũ wa Jake nĩ ũrathi. Mũndũ mũrũme ũcio ekwĩra Ithieli atĩrĩrĩ, akera Ithieli me na Ukali:

²Atĩrĩ, niĩ-rĩ, ti-itherũ ndĩ mũritu gũkĩra andũ arĩa angĩ othe, ndirĩ na mbuguĩro ta mũndũ,

³O na kwĩruta ndiĩrutĩte ũũgĩ wega, o na kana ngamenya ũrĩa ũmwe Mũtheru.

⁴Nũ wanakĩambata igũrũ, agĩcoka akiuma kuo? nũ ũcokagĩrĩria rũhuho ngundi-inĩ ciake? maĩ mo-rĩ, nũ wakũnjanirie na nguo yake? nũ warũmirie ituri ciothe cia thĩ? etagwo atĩa, o na mũrũwe nake agĩĩtagwo atĩa, ongorũo nĩũũĩ?

⁵Uuge wa Ngai gũtirĩ ũtarĩ mũthuranĩre; we nĩ ngo ya kũgitĩra arĩa mamwĩhokete.

⁶Wee-rĩ, tiga kuongerera ũhoro wake ũndũ, ndakae gũkũrũithia, nawe ũgĩtuĩke wa mathara.

⁷Ndakũhoya maũndũ maya merĩ; ndũgakĩrege kũ’he itanakinya gũkua:

⁸Atĩrĩrĩ, ’thengeria ũhoro ũrĩa ũtarĩ guo, na ũrĩa wa mathara, ndaihĩrĩrio nĩmo mũno; ningĩ ndũkandehere ũkĩa kana ũtonga: ’heaga irio o rũĩga rũrĩa rũmbatairie;

⁹Ndigakĩhũne mũno ngũkaane, njũrie atĩrĩ, Jehova akĩrĩ ũ? kana ngĩare, ngakĩiye, ’menererie rĩĩtwa rĩa Ngai wakwa.

¹⁰Ndũkanacambie ndungata harĩ mũmĩathi, ndĩgagĩkũgeke, nawe ũgĩkorũo wĩ mũgeru ngero.

¹¹Gwĩ cora wa andũ magekaga aa ithe, o na matangĩrathima aa nyina.

¹²Gwĩ cora wa andũ meyonaga ta marĩ atheru, na gũthambio matithambĩtio gĩko.

¹³Gwĩ cora-ĩ, ĩ andũ acio maitho mao matikĩrĩ ma ngũrũ! imone ciao nacio nĩmaimonoragia.

¹⁴Na gwĩ cora wa arĩa magego mao mahaana ta hiũ cia njora, ngambucu ciao igakĩhaana ta mengere, cia kũrambia arĩa athĩni mahuke gũkũ thĩ, andũ arĩa aagi magĩthire kĩrĩndĩ-inĩ.

¹⁵Thambara ĩĩ na ciana ciayo igĩrĩ cia airĩtu itatigithagĩria kuuga, Tũhei! Tũhei! Kũrĩ indo ithatũ itarĩ hingo ihũnaga, o na nĩ inya itangiuga, Nĩndaigania:

¹⁶Nĩ mbĩrĩra, na nda ĩrĩa thata, na thĩ, tondũ ndĩngĩhũna maĩ, na mwaki, tondũ ndũngiuga, Nĩndaigania.

¹⁷Riitho rĩa mũndũ ũnyũrũragia ithe, na akarurũka kũiguaga nyina, nĩ mahuru ma kĩanda-inĩ makarĩkũũra, nĩ ciana cia nderi ikarĩrĩa.

¹⁸Kũrĩ maũndũ matatũ mangegagia mũno, ĩĩ-ni, o na nĩ mana itangĩĩmenyera:

¹⁹Nĩ rĩrĩ, nĩ mũgendere wa nderi rĩera-inĩ, mũgendere wa nyamũ-ya-thĩ igũrũ rĩa ihiga, mũgendere wa marikabu ĩrĩ iria gatagatĩ, mũgendere wa mũndũ makĩendana na mũirĩtu.

²⁰Naguo mũgendere wa mũndũ mũka mũtharania nĩ ũyũ: arĩaga, agacoka akerihũra kanua, akoiga, Ndirĩ ũndũ ndehia.

²¹Kũrĩ maũndũ matatũ matũmaga thĩ ĩthingithe, o na nĩ mana ĩtangĩĩtiirĩrĩria:

²²Nĩ ngombo rĩrĩa ĩtuĩkĩte mũthamaki, na kĩrimũ rĩrĩa gĩtuĩkĩte gĩa kũhũnaga irio,

²³Na mũndũ-wa-nja ũtangĩendeka, rĩrĩa aatuĩka nĩ mũhikie, na mũirĩtu ndungata rĩrĩ-a atuĩkĩte nowe mwĩgaĩrũo nĩ mũtumia ũrĩa atungataga.

²⁴Kũrĩ indo inya nyinyi gũkũ thĩ, nacio nĩ njũgĩ mũno:

²⁵Thigiriri-rĩ, nĩ rũrĩrĩ rũtarĩ hinya, no nĩciĩigagĩra mũthithũ wa irio hingo ya riũa;

²⁶Ikami nacio nĩ rũruka rũhũthũ, no nĩciĩakagĩra nyũmba ndwara-inĩ cia mahiga;

²⁷Ngigĩ-rĩ, itirĩ mũthamaki wacio, ĩndĩ nĩirũmanagĩrĩra ii mbũtũ;

²⁸Njagathi kwĩnyitĩrĩra ĩĩnyitagĩrĩra o na tuoko, no nĩĩtũũraga nyũmba cia athamaki.

²⁹Kũrĩ indo ithatũ ii na mũkinyũkĩrie ũrĩ mũgaacĩru, ĩĩ-ni, o na nĩ inya ii ngaacĩru rĩrĩa igũthiĩ:

³⁰Nĩ mũrũthi, arĩ guo karau kũrĩ nyamũ iria ingĩ ciothe, na ndũngĩehera nĩ ũndũ wa ĩrĩkũ kana ĩrĩkũ;

³¹Na kĩgui kĩrĩa kĩrĩ ihenya; ningĩ thenge; na mũthamaki, atongoirie ita ciake.

³²Ũngĩtuĩka nĩwĩkĩte ũrimũ nĩ gwĩtũũgĩria, kana gũthugunda ũgathugunda ũndũ ũtarĩ mwega, ĩhumbe kanua na rũhĩ.

³³Amu-rĩ, gũthũca iria kuumagia ngorono, na kũmimira iniũrũ kuuragia thakame; na no taguo gũthooria marakara gũciaraga ngũĩ.