Proverbs 29

¹Ũrĩa wĩũmagia ngingo o na akĩrũithagio kaingĩ agathuthĩka o gũthuthĩka, na hatigĩe kĩhonia.

²Rĩrĩa arĩa athingu matuĩkĩte nĩo me na hinya, andũ nĩ gũkena makenaga, no rĩrĩa gũgwathanwo nĩ mũndũ mwaganu, nĩ gũcaya macayaga.

³Mũndũ wendaine na ũũgĩ-ũrĩa-wa-ma atũũragia ithe na gĩkeno, ĩndĩ ũrĩa wa thiriti na aka a maraya nĩ gũitanga aitangaga ũmathi wake.

⁴Mũthamaki anyitagia bũrũri na matuĩro make ma kĩhooto, no ũrĩa ũtuĩkaga mwĩtia wa iheo nĩ kũinamania aũinamanagia.

⁵Mũndũ ũmonjoraga ũrĩa ũngĩ nĩ kwamba araamba wabu ya kũmũnyita magũrũ.

⁶Kwĩhia kwa mũndũ ũrĩa mũũru kwĩ na mũtego wa kũmũtega, no mũndũ mũthingu aikaraga o agĩkũngũyagia nĩ gũkena.

⁷Mũndũ mũthingu nĩemenyithagia cira wa arĩa ahũthũ, ũrĩa mwaganu-rĩ, ndangĩrũĩria aũmenye.

⁸Andũ arĩa atendi matũmaga itũũra rĩrĩrĩmbũke mwaki, no andũ arĩa ogĩ, nĩ gũthengia mathengagia marakara.

⁹Mũndũ mũũgĩ aagĩa cira na kĩrimũ, o na aatuta, o na aatheka, gũtirĩ ũhurũko ũrĩoneka.

¹⁰Aiti-thakame nĩ gũthũũra mathũũraga mũndũ mũkinyanĩru, no andũ arĩa arũngĩrĩru macaragia ũrĩa mangĩgitĩra muoyo wake.

¹¹Kĩrimũ, marakara makĩo nĩkĩmoimagĩria mothe, no mũndũ mũũgĩ, make nĩamagiragĩrĩria agakĩmahoreria.

¹²Mwathi-bũrũri angĩtuĩka wa gũthikagĩrĩria maheni, ndungata ciake ciothe no ituĩke njaganu.

¹³Mũnyamari na mũnyarirani magomanaga hamwe: maitho mao erĩ no Jehova wĩkagĩra ũtheri.

¹⁴Mũthamaki ũrĩa ũtuaga macira ma arĩa ahũthũ o na ma, gĩtĩ gĩake kĩa ũnene gĩgũtũũra kĩrũmĩte nginya tene na tene.

¹⁵Rũthanju, na kũrũithio, nĩciĩkagĩra mũndũ ũũgĩ-ũrĩa-wa-ma, no mwana wa kũrekererio nĩaconorithagia nyina.

¹⁶Rĩrĩa arĩa aaganu matuĩkĩte nĩo me na hinya, mehia namo nĩmathegeaga, ĩndĩ andũ arĩa athingu nĩ kwĩrorera makerorera igũa rĩao.

¹⁷Herithagia mũrũguo, na nĩagatũma wonage ũhurũko, ĩĩ-ni, agatũma ũkĩiguage wega ngoro.

¹⁸Kũrĩa gũtarĩ kĩoneki kĩonagwo, kĩrĩndĩ nĩgĩtuaga mĩkwa, ĩndĩ mũndũ ũrĩa ũrũmagia kĩrĩra, ũcio nĩ wa gũkenaga.

¹⁹Ngombo ndĩngĩhera no kwarĩrio, amu, o na yataũkĩrũo, kũrũmbũiya ndĩngĩrũmbũiya.

²⁰Wĩ mũndũ wonete mũhiũ na kwaria? atĩrĩrĩ, kĩrimũ-rĩ, kĩerĩgĩrĩrĩka gũkĩra ũcio!

²¹Mũndũ wa kũrera ngombo yake na ũnani kuuma ĩĩ mwana, marigĩrĩrio-inĩ akona ĩgĩĩtua ta mũrũwe.

²²Mũndũ wa marakara nĩathombothaga mahiũrania, mũndũ wa marũrũ-rĩ, agĩaga na mehia maingĩ.

²³Mwĩtĩo nĩ wa gũtũma mũndũ akanyihio, no ũrĩa wa ngoro ya kwĩnyihia agatuĩka wa gũtĩwo.

²⁴Mũndũ wa kũgĩa rũmwe na mũici nĩ ngoro yake mwene athũire: nĩaiguaga akĩĩhĩtithio, na ndarĩ ũndũ angiumbũra.

²⁵Gwĩtigĩra andũ kũrehagĩre mũndũ mũtego, ĩndĩ ũrĩa mwĩhoki Jehova, we ndangĩkinyĩrĩrĩka.

²⁶Andũ aingĩ nĩmeendagĩrĩria harĩ mwathi wa bũrũri, ĩndĩ ituĩro rĩa mũndũ riumaga kũrĩ Jehova.

²⁷Mũndũ muogogi nĩ kĩndũ kĩĩ magigi harĩ arĩa athingu, nake mũndũ wĩ na mĩthiĩre mĩerekereru nĩ wa magigi harĩ arĩa aaganu.