Proverbs 28

¹ARĨA aaganu moraga o na gũtarĩ mũndũ ũramathingata, no andũ arĩa athingu momagĩrĩria ta ngatia.

²Bũrũri, tondũ wa mehia maguo, nĩũgiaga na anene aingĩ, ĩndĩ, tondũ wa gũteithio nĩ andũ arĩa ataũku, o arĩa me na ũmenyi, no ũtũũre ũkindĩirie.

³Mũbatari mũhinyĩrĩria andũ arĩa ahũthũ no ta mbura ĩrĩ rũhuho ĩtatigagia irio.

⁴Andũ matiganĩte na kĩrĩra nĩmagathagĩrĩria arĩa aaganu, ĩndĩ arĩa amenyereri kĩrĩra nĩmagariũranaga nao.

⁵Andũ arĩa oru matiiguaga gĩtũmi kĩa maũndũ ma kĩhooto, no andũ arĩa marongoragia Jehova nĩmataũkagĩrũo nĩmo mothe.

⁶Kaba ngĩa ĩthiaga na mĩthiĩre yayo mĩgima kũrĩ ũrĩa wa mĩthiĩre mĩhotomu, o na angĩtuĩka nĩ gĩtonga.

⁷Ũrĩa ũrũmagia kĩrĩra nĩ mwana mũtaũku, ĩndĩ ũrĩa wa thiritũ na andũ arĩa irĩi nĩ gũconorithia aconorithagia ithe.

⁸Mũndũ wongererithagia ũmathi wake nĩ kuohoranĩra mbia agĩĩtagia nyongeri nĩguo one uumithio, nĩ kũũngania onganagia cia gũthiĩ na ũrĩa ũiguagĩra arĩa ahũthũ tha.

⁹Mũndũ ũhũgũraga gũtũ ndakaigue kĩrĩra, gwata mahoya make nĩ kĩndũ kĩrĩ magigi.

¹⁰Mũhĩtithia arĩa arũngĩrĩru nĩguo magere njĩra ya ũũru-rĩ, we mwene nĩakagũa irima o rĩu enjanĩire, no andũ arĩa akĩnyanĩru, wega nĩguo ũgatuĩka igai rĩao.

¹¹Mũndũ mũtongu nĩwe mũũgĩ, we akĩĩona, ĩndĩ mũndũ mũkĩa, ũrĩa mũtaũku, no kũmuururia.

¹²Rĩrĩa arĩa athingu maarũhia, nĩ mwago mũnene kũrĩ, no arĩa aaganu, o, maatũũgĩra, andũ nĩmehithaga.

¹³Ũrĩa ũrindagĩrĩra mehia make ndangĩgaacĩra, ĩndĩ ũrĩa ũmoimbũraga, agatigana namo, we nĩarĩiguagĩrũo tha.

¹⁴Mũndũ ũikaraga na wĩtigĩri hingo ciothe, nĩwe wa gũkena, no ũrĩa wĩũmagia ngoro nĩ kũgũa agũaga ũũru-inĩ.

¹⁵Mwathi kĩrĩndĩ kĩa andũ ahũthũ, ũrĩa wĩ mũmaramari, no ta mũrũthi ũkĩrarama, kana ta nduba ĩgĩcuracurĩka.

¹⁶Mũnene ũtarĩ na ũtaũku-rĩ, o na kũhinyanĩrĩria nĩ mũhinyanĩrĩria mũno, ĩndĩ ũrĩa ũthũire ũhahami agatũũra matukũ maingĩ.

¹⁷Mũndũ mũritũhĩre nĩ thakame ya mũndũ oragĩte nĩ mũũri wĩerekeirie o irima-inĩ; mũndũ nĩatige kũmũgirĩrĩria.

¹⁸Mũthii na mĩthiĩre mĩkinyanĩru nĩ kũhonokio arĩhonokagio, no mũndũ ũhotomagia mĩthiĩre yake nĩ kũgũa akagũa o hubu!

¹⁹Mwĩrĩmĩri mũgũnda arĩtũũraga na hũni, no mũrũmanĩrĩri na mbũrũrũ arĩhũnaga ũnyamari.

²⁰Mũndũ mwĩhokeku arĩtũũraga e mũrathime mũno, no mũndũ wa kũhiũhũkĩra gwĩtongia nĩ ngero arĩgeraga.

²¹Gũtĩĩra andũ maũthĩ nĩ ũndũ ũtarĩ mwega, o na kana mũndũ ehie nĩ ũndũ wa kenyũ ka irio.

²²Mũndũ wa riitho iraya ahiũhanagia na ũtonga, na ndakoragwo oĩ atĩ nĩ ũnyamari ũkamũkorerera.

²³Mũndũ wa kũrũithia ũngĩ agatuĩka wa kwendwo nĩwe thutha gũkĩra ũrĩa ũmwanjanjaga na rũrĩmĩ rũnyoroku.

²⁴Mũndũ wa gũtunya ithe kana nyina kĩndũ kĩao, na oige, Ti kwĩhia ndehia, we-rĩ, nĩ wa thiritũ na mwanangi.

²⁵Mũndũ wa ngoro hahami nĩ mũthombothi mahiũrania, no mũndũ mwĩhoki Jehova nĩ kwaramio akaaramio.

²⁶Ũrĩa wĩhokaga ngoro yake mwene nĩ kĩrimũ, no ũrĩa wĩtwaraga na ũũgĩ-ũrĩa-wa-ma nĩarĩhatũragwo.

²⁷Ũrĩa ũheaga ngĩa, we ndakagĩa na wagi, no ũrĩa ũcimunagĩria maitho nĩ kaingĩ arĩgekagwo.

²⁸Arĩa aaganu maatũũgĩra, andũ nĩ kwĩhitha mehithaga, no rĩrĩa marathira, arĩa athingu nĩmathegeaga.