Ecclesiastes 9

¹Atĩrĩrĩ, maũndũ macio nĩndamecũranagia na ngoro yakwa, na ngamabara mũno mothe; atĩ andũ arĩa athingu, na arĩa ogĩ, o hamwe na mawĩra mao, ũhoro wao wĩ guoko-inĩ kwa Ngai: o na kũngĩkorũo nĩ kwenda kana kũmena-rĩ, mũndũ ndarĩ ũndũ oĩ ũhoro-inĩ ũcio; maũndũ mothe marĩ o mbere yao.

²Na rĩrĩ, maũndũ mothe makoraga andũ othe o ũndũ ũmwe; andũ othe, arĩa athingu o na arĩa aaganu, mathiraga o ũndũ ũmwe; o na ũrĩa mwega, na ũrĩa mũtheru, o na ũrĩa ũtarĩ mũtheru; na ũrĩa ũrutaga igongona, o na ũrĩa ũtarutaga; o ta ũrĩa mũndũ mwega atariĩ-rĩ, ũguo noguo ũrĩa mwĩhia o nake atariĩ; ũrĩa ũnyuaga muuma no ta ũrĩa wĩtigagĩra kũũnyua.

³Maũndũ mothe marĩa mekagwo gũkũ thĩ kwaraga riũa-rĩ, ũũru wamo nĩ ũyũ, atĩ othe mathiraga o ũndũ ũmwe; ĩĩ, ti-itherũ ngoro cia ciana cia Adamu ciiyũrĩtwo nĩ waganu, na ũgũrũki ũkagĩa ngoro-inĩ ciacio rĩrĩa ii muoyo, na thutha-inĩ ikaya gũthiĩ kũrĩ arĩa akuũ.

⁴Ha ũhoro wa mũndũ ũrĩa wĩ thiritũ-inĩ ya arĩa marĩ muoyo-rĩ, mwĩhoko wĩ ho: nĩ gũkorũo nĩ kaba ngui ĩrĩa ĩrĩ muoyo gũkĩra mũrũthi mũkuũ.

⁵Nĩ ũndũ arĩa me muoyo no moĩ atĩ nĩmagakua: no arĩa makuĩte-rĩ, matirĩ ũndũ moĩ, na matirĩ kĩndũ o na kĩ magacoka kuona gĩa ũtungati wao; nĩ gũkorũo kĩririkano kĩao nĩ kĩriganĩru biũ.

⁶Naguo wendani wao, na rũmena, o na ũiru, nĩ kũũra ciũrĩte biũ; na matirĩ igai o na rĩrĩkũ magacoka kũgaya, tene na tene, rĩa maũndũ marĩa mothe mekagwo gũkũ thĩ kwaraga riũa.

⁷Wĩthiĩre ũkerĩĩre irio ciaku ũkenete, na ũnyue ndibei yaku ũcanjamũkĩte ngoro; nĩ ũndũ Ngai nĩarĩkĩtie gwĩtĩkĩra mawĩra maku.

⁸Rekaga nguo ciaku cierũhe hĩndĩ ciothe, na ndũkanaage kwĩhaka maguta mũtwe o na atĩa.

⁹Mũtumia waku, ũcio mwendaine nake, tũũraniai nake na gĩkeno matukũ mothe ma muoyo waku wa tũhũ, marĩa Ngai akũheete gũkũ thĩ kwaraga riũa, o macio maku mothe ma tũhũ: amu gwĩka ũguo nĩkuo igai rĩaku rĩrĩa ũgaĩirũo muoyo-inĩ waku, o na mĩĩtungumanĩrie-inĩ ĩrĩa wĩtungumanagia gũkũ thĩ kwaraga riũa.

¹⁰O ũrĩa ũrĩona wa gwĩka na guoko gwaku-rĩ, wĩke na kĩyo; nĩ ũndũ kũrĩa ũgathiĩ mbĩrĩra-inĩ, gũtirĩ wĩra ũrutagwo kuo, gũtirĩ rĩĩciria, kana ũmenyi, o na kana ũũgĩ.

¹¹Ningĩ gũkũ thĩ kwaraga riũa, ngĩcoka ngĩona atĩ andũ arĩa mahootanaga hĩtahĩtano-inĩ, ti arĩa marĩ na ihenya, o nao arĩa mahootanaga mbaara-inĩ-rĩ, ti arĩa marĩ na hinya, o nao arĩa monaga irio ti arĩa ogĩ, o na kana ũtonga ũgatuĩka wa andũ arĩa mamenyete wega maũndũ, o na kana gĩtĩo gĩgatuĩka kĩa arĩa ogĩ; no nĩ gĩkuũ na mũtino ikinyagĩrĩra andũ othe.

¹²Nĩ gũkorũo mũndũ o nake ndoĩ ihinda rĩake; o ta ũrĩa ciũngũyũ inyitagwo na mũtego mũũru, na ta ũrĩa nyoni inyitagwo na gĩkerenge, ũguo noguo ciana cia Adamu inyitagwo hĩndĩ ĩrĩ njũru, o rĩrĩa yacikinyĩrĩra na kĩguũ.

¹³O na ningĩ ngĩona ũũgĩ gũkũ thĩ kwaraga riũa, na ngĩwona ta ũrĩ mũnene ma, naguo ũtariĩ ũũ:

¹⁴kwarĩ gatũũra kanini ke na andũ matarĩ aingĩ; hagĩcoka hagĩthiĩ mũthamaki mũnene akahũrane nako, agĩkarigicĩria nĩguo agatunyane, agĩkairigĩra na rũgiri rũnene nĩguo agokĩrĩre:

¹⁵na rĩrĩ, kũu thĩinĩ wako gũkĩoneka mũndũ mũũgĩ mũthĩni, nake akĩhonokia gatũũra kau na ũũgĩ wake; no rĩrĩ, gũtirĩ mũndũ o na ũmwe wacokire kũririkana mũndũ ũcio mũthĩni.

¹⁶Hĩndĩ ĩo niĩ na niĩ ngĩkiuga atĩrĩ, Ũũgĩ wĩ mwega gũkĩra hinya: no rĩrĩ, ũũgĩ wa mũndũ mũkĩa nĩ mũmene, na ciugo ciake ikaaga kũiguwo.

¹⁷Ndeto cia andũ ogĩ ikĩarĩrio ndundu-inĩ-rĩ, ciahota kũiguwo gũkĩra rĩanĩrĩra rĩa ũrĩa wathanaga thĩinĩ wa irimũ.

¹⁸Ũũgĩ nĩ mwega gũkĩra indo cia mbaara: no rĩrĩ, mwĩhia ũmwe nĩathũkagia maũndũ maingĩ mega.