Hebrews 3

¹TONDŨ ũcio, ariũ a Ithe witũ atheru, o inyuĩ mũgwatanĩire ũhoro wa gwĩtwo ũrĩa uumĩte Igũrũ-rĩ, cũraniai ũhoro wa Jesu, o we wĩ Mũtũmwo na Mũthĩnjĩri-Ngai-Mũnene wa ũhoro ũrĩa tuumbũraga.

²Aarĩ wa kwĩhokeka nĩ ũrĩa wamũtuire ũguo, o ta ũrĩa Musa nake aarĩ wa kwĩhokeka maũndũ-inĩ mothe ma nyũmba ya Ngai.

³Amu Jesu atuĩtwo wa kũheo riri mũnene gũkĩra Musa, kũringana na ũrĩa mwaki wa nyũmba arĩ wa gũtĩwo gũkĩra nyũmba yo nyene.

⁴Nĩ ũndũ-rĩ, gũtirĩ nyũmba ĩtarĩ na ũrĩa wamĩakire; ĩndĩ mwaki wa indo ciothe no Ngai.

⁵Nake Musa ti-itherũ aarĩ wa kwĩhokeka maũndũ-inĩ mothe ma nyũmba ya Ngai arĩ o ndungata, nĩ getha atuĩke mũira wa kũmenyithanagia mohoro marĩa ma gũkaheanwo thutha;

⁶No Kristo, akĩrĩ Mũriũ, aarĩ wa kwĩhokeka atuĩtwo mũnene wa nyũmba ya Ngai. Nayo nyũmba ĩo yake nĩyo ithuĩ, tũngĩikara o nginya ithirĩro o tũrũmĩtie mũno ũhoro witũ wa kũũmĩrĩria, o na kĩĩrĩgĩrĩro kĩrĩa twĩrahaga nĩ ũndũ wakĩo.

⁷Nĩ ũndũ ũcio, o ta ũrĩa Roho Mũtheru ekuuga-rĩ, Ũmũthĩ, mwetĩkĩra kũigua mũgambo wake,

⁸Tigai kũũmia ngoro cianyu, ta hĩndĩ ĩrĩa mwanjũkĩrĩire, O mũthenya ũrĩa ndagereirio werũ-inĩ,

⁹O kũrĩa maithe manyu maangereirie nĩ kũndoria, Magĩkĩona mawĩko makwa mĩaka mĩrongo ĩna.

¹⁰Nĩ ũndũ ũcio ngĩira ngoro nĩ ũndũ wa rũciaro rũu, Ngĩkiuga, Aya nĩ kĩruka gĩtũire kĩĩ na ngoro nyũngũtũki, Na njĩra ciakwa nĩmaregete gũcimenya.

¹¹O ta ũrĩa ndehĩtire nĩ ũrĩa ndarakaire, ngiuga atĩrĩ, Matigatonya kĩhurũko-inĩ gĩakwa.

¹²Wĩmenyererei, ariũ a Ithe witũ, atĩ mũndũ o na ũrĩkũ wanyu ndakanagĩe na ngoro njũru ĩtetĩkagia, ĩrĩa ĩngĩtũma atigane na Ngai ũrĩa wĩ muoyo:

¹³nĩ kaba mũtaaranage o mũthenya o mũthenya, mũira wa ihinda rĩrĩa rĩĩtagwo “Ũmũthĩ” rĩgũtũũra, nĩ getha mũndũ o wothe wanyu ndakae kũũmio ngoro nĩ maheni ma wĩhia.

¹⁴Nĩ ũndũ-rĩ, ũhoro ũrĩa twaambĩte kwĩrĩgĩrĩra o mbere-rĩ, tũngĩtũũra tũũrũmĩtie o nginya ithirĩro-inĩ, nĩtũgakorũo tũtuĩkĩte a ngwatanĩro ĩmwe na Kristo:

¹⁵o ihinda rĩrĩa rĩothe kuugagwo atĩ, Ũmũthĩ-rĩ, mwetĩkĩra kũigua mũgambo wake, Tigai kũũmia ngoro cianyu, ta hĩndĩ ĩrĩa mwanjũkĩrĩire.

¹⁶Tondũ rĩrĩ, nĩ andũ arĩkũ maaiguire na makĩmũũkĩrĩra? Githĩ ti arĩa othe moimire Misiri matongoretio nĩ Musa?

¹⁷Na rĩrĩ, nĩ arĩkũ maamũiririe ngoro mĩaka ĩo mĩrongo ĩna? Githĩ ti arĩa maahĩtirie magĩgĩkua, na ciimba ciao igĩtigwo werũ-inĩ?

¹⁸Ningĩ nĩ arĩkũ ehĩtĩire atĩ matigatonya kĩhurũko-inĩ gĩake, tiga o andũ acio maamũremire?

¹⁹Tũgakĩona atĩrĩ, atĩ matiahotire gũtonya kuo nĩ ũndũ wa ũrĩa mataigana gwĩtĩkia.