Hebrews 4

¹HAKĨRĨ ũguo-rĩ, kuona atĩ nĩkũrĩ kĩĩranĩro kĩrĩa tũtigĩirũo gĩa gũtonya kĩhurũko-inĩ gĩake, nĩtũikarage twĩtigĩrĩte atĩ mũndũ wanyu o na ũrĩkũ ndakanonwo ta ahĩtanĩtie nakĩo.

²Amu-rĩ, o na ithuĩ nĩtũhunjĩirio ũhoro mwega o tao; ĩndĩ ũhoro ũrĩa maaiguire ndũigana kũmaguna, tondũ ndwatonyanĩte na wĩtĩkio thĩinĩ wa andũ acio maaũiguire.

³Tondũ ithuĩ twĩtĩkĩtie-rĩ, nĩ ithuĩ tũtonyaga kĩhurũko-inĩ kĩu; o ta ũrĩa oigire mbere atĩrĩ, O ta ũrĩa ndehĩtire nĩ ũrĩa ndarakaire, ngiuga atĩrĩ, Matigatonya kĩhurũko-inĩ gĩakwa: o na mawĩra make maakorirũo marĩ marĩku o kuuma rĩrĩa thĩ yaambĩrĩirie kũũmbwo.

⁴Amu nĩoigire handũ hana ha ũhoro wa mũthenya wa mũgwanja atĩrĩ, Nake Ngai akĩhurũka mũthenya wa mũgwanja atiganĩte na mawĩra make mothe.

⁵Ningĩ haha naho akoiga atĩrĩ, Matigatonya kĩhurũko-inĩ gĩakwa.

⁶Tondũ ũcio-rĩ, kuona atĩ nĩgũtigarĩte ũndũ wĩranĩirũo atĩ andũ amwe nĩmagatonya kuo, nao acio maahunjĩirio ũhoro ũcio mwega o mbere nĩmaagire gũtonya nĩ ũndũ wa kũrema-rĩ,

⁷Ngai nĩaacokire agĩtua mũthenya mũna, akiuga na kanua ka Daudi, matukũ maingĩ maathira, atĩrĩ, Ũmũthĩ, o ta ũrĩa kwoigĩtwo o mbere-rĩ, Ũmũthĩ mwetĩkĩra kũigua mũgambo wake, Tigai kũũmia ngoro cianyu.

⁸Nĩ gũkorũo Joshua angĩamakinyirie kĩhurũko-inĩ kĩu, Ngai ndangĩacokire kwaria thutha ũcio ũhoro wa mũthenya ũngĩ.

⁹Tondũ ũcio gũgagĩtuĩka atĩ andũ a Ngai nĩmatigarĩirũo nĩ thabatũ ya kũhurũka.

¹⁰Amu mũndũ ũrĩa ũrĩkĩtie gũtonya kĩhurũko-inĩ gĩake, nĩahurũkĩte o nake agatigana na mawĩra make, o ta ũrĩa Ngai aahurũkire, agĩtigana na mawĩra make.

¹¹Nĩ ũndũ ũcio nĩtwĩrutanagĩrie na kĩyo tũgatonye kĩhurũko-inĩ kĩu, nĩ getha mũndũ o na ũrĩkũ ndakae kũgũa nĩ ũndũ wa kũrema ta ũguo andũ acio maaremire.

¹²Nĩ ũndũ Ũhoro wa Ngai wĩ muoyo, na wĩ na ũhoti, na wĩ ũũgĩ gũkĩra rũhiũ o ruothe rũnoretwo mĩena yerĩ, ũgatheca ũgakĩgayũkania muoyo na roho, o na ũgaatia mĩthimo na ũkagayũkania mahĩndĩ na maguta, ningĩ nĩũhiũhaga gũkũũrana meciria ma ngoro o na ũrĩa ĩcirĩire gwĩka.

¹³Na gũtirĩ kĩndũ o gĩothe kĩũmbe gĩtonekete mbere yake; no rĩrĩ, indo ciothe ciikaraga itarĩ humbĩre, na iguũrĩtio maitho-inĩ make, we mwene ũhoro witũ.

¹⁴Hakĩrĩ ũguo-rĩ, kuona atĩ twĩ na mũthĩnjĩri-Ngai-mũnene ũrĩa wĩ bata ma, na ũhungurĩte agakinya o Igũrũ, na nĩwe Jesu Mũrũ wa Ngai, nĩtũrũmieni ũhoro ũrĩa tũtũire tuumbũraga.

¹⁵Amu tũtirĩ na mũthĩnjĩri-Ngai-mũnene ũtangĩhota gũtũiguĩra tha maũndũ-inĩ maitũ ma kwaga hinya; ũrĩa twĩ nake aanagerio maũndũ-inĩ mothe o ta ithuĩ, tiga atĩ ndaigana kwĩhia o na atĩa.

¹⁶Tondũ ũcio nĩtũthengererei gĩtĩ-inĩ-gĩa-ũthamaki kĩrĩa kĩa Wega wa Ngai tũũmĩrĩirie, nĩ getha tũkaiguĩrũo tha, na tuone Wega wake wa gũtũteithagia hĩndĩ ĩrĩa tũbataire.