Hebrews 5

¹RĨU-RĨ, mũthĩnjĩri-Ngai-mũnene o wothe aathurũo kũrĩ andũ, nĩatuagwo wa kũrũgamagĩrĩra andũ maũndũ-inĩ marĩa makoniĩ Ngai nĩ getha arutage maruta o na magongona nĩ ũndũ wa mehia.

²Nake nĩahotaga gũkirĩrĩria arĩa matarĩ ogĩ na arĩa mahĩtagia, ahoreire, kuona atĩ we mwene nĩatangĩkaga nĩ kwaga hinya.

³Na tondũ ũcio nĩabatairio nĩ kũrutaga horohio nĩ ũndũ wa mehia make mwene, o ta ũrĩa amĩrutaga nĩ ũndũ wa mehia ma kĩrĩndĩ.

⁴Na gũtirĩ mũndũ wĩheaga gĩtĩo kĩu we mwene, tiga o akorirũo etĩtwo nĩ Ngai o ta ũrĩa Haruni etirũo.

⁵Ũguo no taguo Kristo nake ataigana gwĩkumia we mwene atĩ atuwo mũthĩnjĩri-Ngai-mũnene, nĩ gũtuwo aatuirũo nĩ ũrĩa wamwĩrire atĩrĩ: Wee nĩwe Mũrũ wakwa, niĩ ũmũthĩ nĩndagũciara:

⁶na ta ũrĩa oigire handũ hangĩ, atĩrĩ, Wee wĩ mũthĩnjĩri-Ngai o nginya tene, O ta ũrĩa Melikisedeki aatariĩ.

⁷Ũcio-rĩ, o matukũ marĩa aatũire arĩ na mwĩrĩ, nĩaahoire na agĩthaitha Ngai, agĩkayaga mũno na agĩitaga maithori, o we ũngĩhota kũmũhonokia amũrute gĩkuũ-inĩ, agĩkĩiguwo tondũ nĩaamwĩtigĩrĩte akamũtĩa.

⁸Nake o na aarĩ Mũriũ-rĩ, nĩerutire gwathĩka nĩ ũndũ wa ũrĩa aanyamarĩkire.

⁹Na aakĩrĩkia gũtuwo mwagĩrĩru kũna, agĩtuĩka kĩhumo kĩa ũhonokio ũrĩa ũtagathira kũrĩ arĩa othe mamũiguaga.

¹⁰Na nĩaatuirũo nĩ Ngai mũthĩnjĩri-Ngai-mũnene o ta ũrĩa Melikisedeki aatariĩ.

¹¹Na rĩrĩ, ha ũhoro wake, twĩ na maũndũ maingĩ ma kũmwĩra me hinya magĩtaũrũo, kuona atĩ nĩmũtuĩkĩte aritu mũkĩigua.

¹²Nĩ ũndũ-rĩ, o na mwagĩrĩirũo nĩ gũtuĩka arutani rĩu nĩ ũndũ wa ihinda rĩrĩa mũikarangĩte, nĩmũbatairio rĩngĩ nĩ mũndũ wa kũmũrutaga morutani marĩa mahũthũ, marĩa maambagĩrĩria kũrutanwo ma mohoro ma Ngai; mũgagĩkorũo mũrĩ andũ mabataire nĩ kũheo o iria, no ti irio nyũmũ.

¹³Nĩ ũndũ mũndũ o wothe ũnyuaga o iria nĩ mũndũ ũtahũthĩire ũhoro ũrĩa wa ũthingu; amu no rũkenge.

¹⁴No irio iria nyũmũ nĩ cia andũ arĩa agima, o arĩa mahũthĩire gũkũũrana wega na ũũru, nĩ ũndũ wa ũrĩa monire ihinda rĩa kwĩmenyeria gwĩka ũguo.