Hebrews 6

¹HAKĨRĨ ũguo-rĩ, nĩtũtige gũtindĩrĩra morutani macio ma ũhoro wa Kristo maambagĩrĩria kũrutanwo, na twĩrutanĩrie tũkinyĩre maũndũ marĩa makinyanĩru kũna. Na tũtigacoke kũhanda gĩtina o rĩngĩ, tũkĩrutanaga ũhoro wa kwĩrira nĩ ũndũ wa ciĩko iria irehage gĩkuũ, na wa gwĩtĩkia Ngai,

²o na morutani ma ũbatithio, na ũhoro wa kũigĩrĩrũo moko, na wa kũriũka kwa andũ arĩa akuũ, o na wa gũtuanĩrũo cira na ituĩro rĩtagathira.

³Na noguo tũgwĩka, Ngai angĩĩtĩkĩra.

⁴Nĩ ũndũ-rĩ, ha ũhoro wa andũ arĩa maanathererũo nĩ ũtheri, na magacama kĩheo kĩrĩa kĩheanagwo kiumĩte Igũrũ-rĩ, ningĩ magakorũo matuĩtwo a ngwatanĩro ya Roho Mũtheru,

⁵na magacama uuge ũrĩa mwega wa Ngai o na mahinya ma ihinda rĩrĩa rĩgoka-rĩ,

⁶na thutha ũcio makagũa magatigana na maũndũ macio-rĩ, gũtingĩkĩhoteka kũmacokia rĩngĩ merire, kuona atĩ nĩ kwĩambĩra mareambĩra Mũrũ wa Ngai o rĩngĩ mũtĩ igũrũ, o na kũmũnyararithia makamũnyararithia kũrĩ andũ.

⁷Nĩ ũndũ mũgũnda ũrĩa ũnyuĩte mbura ĩrĩa ĩuuragĩra kaingĩ, ũgacoka gũciara irio iria ciagĩrĩire andũ arĩa marĩmĩirũo-rĩ, nĩũrathimagwo nĩ Ngai.

⁸Ĩndĩ ũngĩciara mĩigua na mahiũ ma nyeki-inĩ-rĩ, no ũtuĩke wa gũteo na wende kũgwatwo nĩ kĩrumi; na ũhoro waguo wa kũrigĩrĩria no gũcinwo.

⁹No rĩrĩ, endwa akwa, o na tũkĩaragia ũguo, ha ũhoro wanyu nĩtwĩrĩgĩrĩire maũndũ mega kũrĩ macio, o marĩa mene ũhoro wa kũhonokio:

¹⁰amu Ngai ndaagĩte kĩhooto; ndangĩriganĩrũo nĩ wĩra wanyu, o na wendani ũrĩa mwonanirie nĩ ũndũ wa rĩĩtwa rĩake, nĩ ũrĩa mwatungatagĩra andũ arĩa aamũre, o na mũgatũũra mũmatungatagĩra o na rĩu.

¹¹Tũgakĩenda atĩ muonanagie kĩyo o ro ta kĩu, o mũndũ o mũndũ, nĩguo mũgakorũo mũkĩhingĩrio kũna, o kinya ithirĩro-inĩ, ũhoro ũrĩa mũtũire mwĩrĩgĩrĩire;

¹²nĩ getha mũtikae kwĩremwo, no mwĩgerekanagie na andũ arĩa magayagĩrũo maũndũ marĩa meranĩirũo, nĩ ũndũ wa ũrĩa metĩkĩtie na magakirĩrĩria.

¹³Amu-rĩ, hĩndĩ ĩrĩa Ngai erĩire Iburahimu kĩĩranĩro, tondũ gũtiarĩ ũngĩ mũnene kũrĩ We wa kwĩhĩta nake, nĩehĩtire akĩĩgweta We mwene,

¹⁴akiuga atĩrĩ, Kũrathima nĩngũkũrathima, o na gũthegeiya ngũthegeerie mbeũ.

¹⁵No taguo Iburahimu, aarĩkia gũkirĩrĩria ategũthethũka-rĩ, agĩkĩhingĩrio ũhoro ũcio erĩirũo.

¹⁶Tondũ rĩrĩ, andũ mehĩtaga makĩgwetaga ũrĩa mũnene kũrĩ o: na hĩndĩ ĩrĩa megũkararania-rĩ, mwĩhĩtwa wa gwĩkĩra ũhoro hinya nĩguo ũninaga ngarari o kũnina.

¹⁷Ũguo no taguo Ngai ekire, rĩrĩa endete kuonania o makĩria kũrĩ andũ arĩa maatuĩtwo a gũkagaĩrũo maũndũ marĩa eranĩire, atĩ ũrĩa aacirĩire gwĩka ndũngĩgarũrĩka, agĩĩtonyia ũhoro-inĩ ũcio na kwĩhĩta mwĩhĩtwa;

¹⁸nĩguo atĩ, tondũ wa maũndũ merĩ matangĩgarũrĩka, o marĩa gũtangĩhoteka Ngai ahenanie namo, ithuĩ arĩa tũũrĩire handũ ha kwĩhitha tũũmagĩrĩrio mũno, nĩguo twĩgwatĩre kĩĩrĩgĩrĩro o kĩrĩa tũigĩirũo mbere iitũ.

¹⁹Na kĩĩrĩgĩrĩro kĩu-rĩ, twĩ nakĩo ta arĩ nanga ya roho, nakĩo nĩ gĩa kwĩhokeka, na nĩ kĩrũmu, na nĩgĩtonyete o kũrĩa thĩinĩ, mbarĩ ĩrĩa ĩngĩ ya gĩtama kĩrĩa kĩnene;

²⁰o kũrĩa Jesu aatonyire nĩ ũndũ witũ, e mũtũtongoria, atuĩtwo mũthĩnjĩri-Ngai-mũnene o nginya tene, o ta ũrĩa Melikisedeki aatariĩ.