Hosea 12

¹Efiraimu akĩrĩa, arĩaga o rũhuho, na akarũmĩrĩra rũhuho rũrĩa ruumaga irathĩro-inĩ; hĩndĩ ciothe no kũingĩhia aingĩhagia maheni na mwanangĩko; na nĩmarĩkanagĩra kĩrĩkanĩro hamwe na Ashuri; maguta namo magatwaragwo Misiri.

²Ningĩ-rĩ, Jehova e na ngarari na Juda o nake, na nĩakaherithia Jakubu kũringana na mĩthiĩre yake, o kũiganana na ciĩko ciake noguo akamũthukĩra.

³Rĩrĩa maarĩ nda ya nyina wao-rĩ, akĩnyita mũrũ wa nyina ndiira; o na aatuĩka mũndũ mũgima-rĩ, aarĩ na hinya harĩ Ngai.

⁴Ĩĩ, ti-itherũ, aarĩ na hinya gũkĩra mũraika ũcio, akĩhootana; ningĩ nĩ kũrĩra aarĩrire, na akĩmũthaitha. Aamũkorire kũu Beth-eli, na agĩtwarĩria o na ithuĩ kuo,

⁵o we Jehova, Ngai mwene mbũtũ cia ita; Jehova nĩrĩo rĩĩtwa rĩake rĩa kĩririkano.

⁶Nĩ ũndũ ũcio-rĩ, kĩgarũrũke wĩerekerie harĩ Ngai waku; ikaria ũtugi na ũikarie cira wa kĩhooto, na wetagĩrĩre Ngai waku hingo ciothe.

⁷We nĩ muonjorithia, na nĩ gĩthimi gĩa kũhenania kĩrĩ guoko gwake; nĩ kwenda endaga kũhinyanĩrĩria;

⁸o we Efiraimu nĩoigĩte atĩrĩ, Ti-itherũ ndĩ mũtongu, nĩndĩyoneire ũtonga, na gũtikĩrĩ ũndũ mũũru mangĩona thĩinĩ wakwa mawĩra-inĩ makwa mothe ũrĩa ũngĩtuwo wĩhia.

⁹No rĩrĩ, niĩ nĩ niĩ Jehova Ngai waku o kuuma bũrũri wa Misiri; na no ngatũma ũtũũre hema-inĩ rĩngĩ, o ta ũrĩa mwekaga matukũ-inĩ ma gĩathĩ kĩrĩa kĩamũre.

¹⁰Ningĩ-rĩ, nĩnjarĩirie anabii, na ngaingĩhia cioneki; o na ngagerekanĩria ngerekano na njĩra ya ũtungati wa anabii.

¹¹Githĩ Gileadi nĩ kwa waganu? Ĩĩ-ni, andũ akuo nĩ a tũhũ mũtheri. Kũu Giligali mathĩnjagĩra magongona ma ndegwa; ĩĩ, marutĩro mao ma igongona matariĩ ta hĩba cia mahiga mĩkũmũkũmũ-inĩ ya mĩgũnda.

¹²Nake Jakubu nĩ kũũra orire agĩthiĩ bũrũri wa Aramu; o we Isiraeli-rĩ, agĩtũũra atungataga nĩ getha akona mũtumia; o na getha agĩe na mũhiki agĩtũũra o arĩithagia ng’ondu.

¹³Nake Jehova-rĩ, nĩ kũruta aarutire Isiraeli Misiri na guoko kwa mũnabii, o na akĩmenyererũo na guoko kwa mũnabii.

¹⁴Ũcio Efiraimu nĩarakaranĩtie irakarania irũrũ mũno; nĩkĩo thakame yake ĩkamũcokerera, naruo rũmena rũake Mwathani wake akamũcokereria.