Hosea 13

¹Rĩrĩa Efiraimu aaragia-rĩ, nĩkwagĩaga kĩinaino; nĩenenehirie gatagatĩ-inĩ ka Isiraeli; no rĩrĩa ehirie ũhoro-inĩ wa ngai ĩrĩa ĩĩtagwo Baali-rĩ, hĩndĩ ĩo agĩkua.

²Na rĩu no gũkĩrĩrĩria makĩragĩrĩria o kwĩhia, magethondekera mĩhianano ya gũtwekio ya betha yao, o mĩhianano ĩhuana ta ũrĩa ũmenyo wao ũiganĩte; yo yothe nĩ wĩra wa aturi; na makoigaga atĩrĩrĩ ũndũ wayo, Rekei andũ arĩa mamĩthĩnjagĩra mamumunyage njaũ icio.

³Nĩ ũndũ ũcio-rĩ, magatuĩka ta kĩbii kĩa rũcinĩ, na ta ireera rĩrĩa rĩthiraga kĩroko tene, o na ta mũũngũ ũrĩa ũhurutagwo nĩ kĩhuhũkanio ũkarutwo kĩhuhĩro-inĩ, na ta ndogo ĩkiuma riumĩro rĩayo.

⁴No rĩrĩ, niĩ nĩ niĩ Jehova Ngai waku kuuma bũrũri wa Misiri; ndũkanamenye ngai ĩngĩ tiga o niĩ, na thengia niĩ-rĩ, gũtirĩ mũhonokia ũngĩ o na ũrĩkũ.

⁵Nĩ niĩ ndakũũĩ wĩ werũ-inĩ, o kũu baraganya-inĩ ũrĩa mũũmũ.

⁶O kũringana na ũrĩa ũrĩithio wao watariĩ, noguo maahũnagio; nĩmaakĩhũnirio, na ngoro ciao igĩcoka gwĩtĩa; nĩkĩo mariganĩirũo nĩ niĩ.

⁷Tondũ wa ũguo-rĩ, nĩngũtuĩka ta mũrũthi harĩ o; na ngũmehithĩra njĩra-inĩ ta ngarĩ;

⁸o na ndĩmakorerere ta nduba ĩrĩa ĩtunyĩtwo ciana ciayo, ndĩmatehũre habaya wa ngoro; o na ndĩmarĩĩre o hau ta mũnyambũ; nĩ nyamũ ya gĩthaka ĩrĩmatamburanga.

⁹Gũkũ nĩkuo kũninũkio gwaku, wee Isiraeli, atĩ nĩũ’thũũraga niĩ, o niĩ mũteithia waku.

¹⁰Kaĩ e ha rĩu, ũcio mũthamaki waku, atĩ akũhonokie matũũra-inĩ maku mothe? O na atui-cira aku makĩrĩ ha, arĩa woigire ũndũ wao atĩrĩ, Ta ’he mũthamaki na anene?

¹¹Gũkũhe nĩndakũheire mũthamaki rĩrĩa ndang’ũrĩkĩte, o na ngĩcoka ngĩkĩmweheria nĩ ũrĩa ndarakarĩte.

¹²Waganu wa Efiraimu-rĩ, nĩ muohe ta ũrĩa indo ciohanagio hamwe; wĩhia wake ũkĩrĩ mũige mũthithũ.

¹³Naruo ruo rũa mũndũ mũka akĩrũmwo-rĩ, nĩruo rũkamũkinyĩrĩra; amu nĩ mwana mũkĩgu; tondũ-rĩ, hĩndĩ nĩ nginyu atige gũcoka gũikara iciarĩro-inĩ rĩa twana.

¹⁴Atĩrĩrĩi, nĩngamahonokia harĩ hinya wa mbĩrĩra, ngamakũũra moime gĩkuũ-inĩ. Wee Gĩkuũ gĩkĩ-rĩ, matũhũhũ maku marĩ ha? Wee nawe Mbĩrĩra ĩno-rĩ, ũninũkania waku ũkĩgĩire ha? Kwĩrira gũgũikara gwĩ kũhithe maitho makwa.

¹⁵Rĩu-rĩ, o na angĩtuĩka wa gũciara mũno gatagatĩ-inĩ ka ariũ a ithe nake-rĩ, rũhuho nĩrũgoka ruumĩte na irathĩro-inĩ, naruo nĩ mĩhũmũ ya Jehova ĩkiuma na werũ-inĩ; nakĩo gĩthima gĩake nĩgĩkahũa, na itherũkĩro rĩake rĩũme; naguo mũthithũ wake nĩũgatahwo nĩruo indo ciothe iria cia goro.

¹⁶Samaria-rĩ, no mekuuĩre ũũru wao, tondũ nĩmaatũrĩkĩire Ngai wao; nao nĩmakairũrũo na rũhiũ rũa njora; o natuo tũkenge twao tũgatungumanio tũhehenjeke, na atumia ao arĩa me na nda no matarũrũo.