Hosea 4

¹TA THIKĨRĨRIANI ũhoro wa Jehova, inyuĩ ciana cia Isiraeli; amu Jehova e na ngarari na andũ arĩa matũire bũrũri ũyũ, nĩ ũndũ-rĩ, gũtirĩ ũhoro-wa-ma, kana ũtugi, kana ũmenyo wa kũmenya Ngai ũrĩ thĩinĩ wa bũrũri ũyũ.

²Gũtirĩ ũhoro ũngĩ ũrĩ ho, tiga kwĩhĩta na gũcoka kwĩhia ũhoro ũcio, ningĩ kũũragana, na kũiya, na gũtharania; andũ maguthũkanagĩra, na thakame ĩkahutania na thakame ĩrĩa ĩngĩ.

³Nĩ ũndũ ũcio-rĩ, bũrũri nĩũkagirĩka, na mũndũ o wothe ũrĩa ũtũũraga kuo nĩ gwĩthikĩra agethikĩra hamwe na nyamũ cia gĩthaka-inĩ na nyamũ cia rĩera-inĩ; o na ciũngũyũ cia iria-inĩ nacio nĩ gũthengio igathengio.

⁴No rĩri, mũndũ nĩagĩtige gũkararania, o na kana mũndũ akaananie; amu-rĩ, andũ aku matariĩ ta arĩa mangĩkararania na mũthĩnjĩri-Ngai.

⁵Nawe-rĩ, nĩ kũhĩngwo ũkahĩngwo kũgũrũ mũthenya, na mũnabii o nake akahĩngwo hamwe nawe ũtukũ, o na nyũkwa nĩngamũnina.

⁶Andũ akwa maninagwo nĩ ũndũ wa kwaga ũmenyo. Tondũ nĩũkĩregete ũmenyo-rĩ, o na niĩ nĩngakũrega, ũtige gũtuĩka mũthĩnjĩri-Ngai wakwa; kuona atĩ nĩũkĩriganĩirũo nĩ watho wa Ngai waku-rĩ, o na niĩ nĩngakĩriganĩrũo nĩ ciana ciaku.

⁷O kũringana na ũrĩa ciaingĩhirio-rĩ, no taguo cianjĩhagia; nĩkĩo ngagarũra riri wacio ũtuĩke thoni.

⁸Cio nĩ kwĩhũnia ciĩhũnagia na wĩhia wa andũ akwa, na igakorokera waganu wao na ngoro ciao.

⁹Na nĩgũgatuĩka atĩ o ta ũrĩa andũ matariĩ, no taguo athĩnjĩri-Ngai nao makahaana; na niĩ nĩngamaherithia nĩ ũndũ wa mĩthiĩre yao, o na ndĩmarĩhe kũringana na ciĩko ciao.

¹⁰Nao makĩrĩa-rĩ, makarĩaga na matihũne; makahũraga maraya na matiingĩhe; tondũ nĩmatigĩte kũrũmbũiya mũgambo wa Jehova.

¹¹Ũmaraya-rĩ, na ndibei, gwata ndibei ya mũhihano cieheragia ũkuũku wa ngoro.

¹²Andũ akwa mahoyagĩra kĩrĩra mĩtĩ-inĩ harĩa haragũragĩrũo, naguo mũtirima wao nĩguo ũmataaraga; nĩ ũndũ-rĩ, thuti cia kwĩrirĩria ũmaraya nĩimahĩtithĩtie, nao magagĩtharanagia makiumaga watho-inĩ wa Ngai wao.

¹³Marutagĩra magongona irĩma igũrũ, magacinagĩra ũbumba ithũngũri-inĩ o na itina-inĩ cia mĩtĩ mĩthemba mĩthemba, tondũ kĩĩgunyĩ kĩayo nĩ kĩega; nĩkĩo aarĩ anyu mahũraga maraya o na ahiki anyu matharanagia.

¹⁴No-rĩ, niĩ ndikaherithia aarĩ anyu maahũra maraya, kana ’hũre ahiki anyu maatharania; amu-rĩ, o ene nĩ gũthiĩ mathiaga thiritũ na maraya, na makaruta magongona hamwe na amaraya; nao andũ arĩa matangĩkuũkĩrũo nĩ ũhoro nĩ gũthuthangwo magathuthangwo.

¹⁵O na kũngĩkorũo atĩ wee Isiraeli nĩũhũraga maraya-rĩ, no Juda nĩagĩtige kwĩhia; ningĩ inyuĩ-rĩ, ta tigai gũcoka gũkinyaga Giligali, kana mwambatage mũthiĩ Bethi-aveni, o na kana mwĩhĩte na mwĩhĩtwa wa kuugaga atĩrĩ, Ta ũrĩa Jehova e muoyo.

¹⁶Amu-rĩ, Isiraeli nĩmaremete ta mori nemi; na rĩu Jehova nĩekũmarĩithia ta kagondu karekereirio baraganya-inĩ.

¹⁷Efiraimu nĩegwatanĩtie na mĩhianano, kĩrekei aikare.

¹⁸O na kĩndũ kĩao gĩa kũnyua nĩkĩgagatĩte, nao no kũhũra mahũraga maraya hĩndĩ ciothe; ningĩ anene ake-rĩ, nĩ kwenda mendete mũno maũndũ ma ũũra-thoni.

¹⁹Nao nĩ kũũmbũrũo mombũrĩtwo nĩ rũhuho; nao nĩ gũconorithio magaconorithio nĩ ũndũ wa magongona marĩa maanaruta.