Hosea 5

¹Iguani ũhoro ũyũ, inyuĩ athĩnjĩri-Ngai; thikĩrĩriai, inyuĩ a nyũmba ya Isiraeli; na mũtege matũ, inyuĩ a nyũmba ya mũthamaki, amu cira ũyũ nĩ wanyu; tondũ-rĩ, mũkoretwo mũrĩ mũtego kũu Mizipa, na mũrĩ wabu ya gũtegana yarĩtwo o kũu Taboru.

²Nao arĩa aregi-watho-rĩ, nĩ gũkĩrĩrĩria makĩrĩrĩirie gũtonya ũũragani-inĩ, no niĩ nĩ niĩ wa kũmakaania othe.

³Nĩnjũĩ Efiraimu, ningĩ ndikĩhithĩtwo Isiraeli; amu wee Efiraimu-rĩ, rĩu nĩũhũrĩte maraya, nake Isiraeli nĩ gũthũka athũkĩte.

⁴Ciĩko ciao-rĩ, itingĩreka magarũrũkĩre Ngai wao; tondũ thuti cia kwĩrirĩria ũmaraya ii thĩinĩ wao, na matiũĩ Jehova.

⁵O na mwĩgerero wa ngoro wa Isiraeli nĩuumbũraga ũhoro wake o ũthiũ-inĩ wake; nĩkĩo Isiraeli na Efiraimu makahĩngwo wĩhia-inĩ wao, o na Juda nake agakĩhĩngwo hamwe nao.

⁶Nao nĩmagathiĩ na ndũru ciao cia mbũri, o na ndũru ciao cia ng’ombe, magacarie Jehova; no matikamuona; nĩeeheretie harĩ o.

⁷Nĩ kũgarũka magarũkĩte Jehova na wara, tondũ wa gũciara ciana itariĩ ta kĩruka gĩtoyaine na Ngai; nako karũgamo-inĩ ka mweri nĩrĩo makahukio o ene hamwe na mĩgũnda yao.

⁸Ta huhani thongori kũu Gibea, na mũhuhe karumbeta kũu Rama, mũcoke muuge mbu kũu Bethi-aveni mũkiugaga ũũ: Wĩ muume thutha, Benjamini!

⁹Efiraimu agakirio ihooru mũthenya o ũrĩa wa gũkaananio. Atĩrĩrĩi, nĩ kuonania nyonanĩtie gatagatĩ-inĩ ka mĩhĩrĩga ya Isiraeli ũndũ ũrĩa ũrĩoneka o ma.

¹⁰Anene a Juda-rĩ, matariĩ ta arĩa mangĩkũũra itoka cia mĩhaka; nĩkĩo ngamaitĩrĩria marakara makwa o ta mũiyũro wa maĩ.

¹¹Efiraimu nake nĩ mũhinyĩrĩrie, naguo ũhoro wake ũkahotomio cira-inĩ, tondũ nĩonire arĩ wega arũmĩrĩre o maũndũ ma tũhũ.

¹²Nĩkĩo niĩ ndariĩ ta memenyi harĩ Efiraimu, o na ngatuĩka ta woru harĩ nyũmba ya Juda.

¹³Rĩrĩa Efiraimu eiguire ũrĩa aarũarĩte, nake Juda akĩona ũrĩa aagurarĩte-rĩ, hĩndĩ ĩo Efiraimu agĩthiĩ Ashuri, na akĩrekania kũrĩ mũthamaki ũrĩa wetagwo Jarebu; nowe-rĩ, ndarĩ hingo angĩkĩhota kũmũhonia ndũari yanyu; o na kana amũhonie nguraro cianyu.

¹⁴Amu-rĩ, niĩ nĩngatuĩka ta mũrũthi harĩ Efiraimu, o na ngakorũo ta ngatia nyanake harĩ nyũmba ya Juda. Niĩ, o niĩ, nĩngatamburanga, njoke ndĩĩthiĩre; o na ndahane, na gũtikagĩa mũndũ o na ũrĩkũ ũkahota kũhonokania.

¹⁵Nĩ gũthiĩ ngathiĩ njoke handũ hakwa mũira wa moimbũre mahĩtia mao, na marongorie ũthiũ wakwa; nao mona thĩna-rĩ, nĩmakanongoria na kĩyo.