Job 2

¹Ningĩ kwĩ mũthenya ũngĩ ariũ a Ngai maathiire kũrũgama mbere ya Jehova, o nake Shaitani agĩgĩthiĩ hamwe nao kũrũgama mbere ya Jehova.

²Nake Jehova akĩũria Shaitani atĩrĩ, Uuma kũ? Nake Shaitani agĩcokeria Jehova akiuga, Nyuma kũriũnga thĩ, ningĩ gũceeranga kuo o handũ na handũ.

³Nake Jehova agĩcoka akĩũria Shaitani atĩrĩ, Nĩũroranĩtie ũhoro wa ndungata yakwa Ayubu, ũkona atĩ kũu thĩ gũtirĩ mũndũ ũngĩ ũhaana take, nĩ gũtuĩka nĩ mũndũ ũtarĩ ũcuke na kũrũngĩrĩra nĩ mũrũngĩrĩru, mũndũ wĩtigĩrĩte Ngai na agathemaga maũndũ marĩa moru? Na kinya rĩu wĩkindĩru wake no aũgwatĩirie, o na tondũ ũraningĩrĩirie ũhoro wake, atĩ ndĩmũnine hatarĩ gĩtũmi.

⁴Nake Shaitani agĩcokeria Jehova akiuga, Nĩ gĩkonde kĩa mwĩrĩ gĩkũũrĩte kĩngĩ, ĩĩ-ni, o na mũndũ aaruta indo ciothe iria e nacio nĩguo akũũre muoyo wake.

⁵No rĩ’, ta coka ũtambũrũkie guoko, ũmũhutie mahĩndĩ, na nyama cia mwĩrĩ wake, nake ndarĩ hingo ategũkũruma o ũthiũ-inĩ waku.

⁶Nake Jehova agĩkĩĩra Shaitani, Atĩrĩ, nĩndamũiga moko-inĩ maku, no rĩrĩ, muoyo wake, mũtigĩre.

⁷Nake Shaitani agĩkiuma hau ũthiũ-inĩ wa Jehova, agĩthiĩ agĩgĩĩkĩra Ayubu ironda ii ruo mũno gwata makinya make ma magũrũ o kinya cũmbĩ.

⁸Nake akĩoya rũgĩo ethũage naruo, agĩikara thĩ harĩa haaitagwo mũhu.

⁹Hĩndĩ ĩo mũtumia wake akĩmwĩra atĩrĩ, Anga no ũgwatĩirie wĩkindĩru waku o na rĩu? Ruma Ngai, uumanie na ũgĩkue!

¹⁰Nowe akĩmwĩra atĩrĩ, Ũrĩ kwaria ta ũrĩa mũtumia aaragia wa arĩa matarĩ mbuguĩro. Nĩ atĩa? Githĩ tũrĩamũkagĩra maũndũ mega guoko-inĩ kwa Ngai, na tũtikanaamũkĩre moru? Thĩinĩ wa ũhoro ũcio wothe Ayubu ndaigana kũhĩtia na mĩromo yake.

¹¹Na rĩrĩ, rĩrĩa arata arĩa atatũ a Ayubu maaiguire ũũru ũcio wothe wamũkinyĩire, makiuma o mũndũ kwao, magĩũka, nao nĩ aya: nĩ Elifazu, ũrĩa Mũtemani, na Bilidadi, ũrĩa Mũshuhi, na Zofaru, ũrĩa Mũnaamathi. Magĩgĩathana gĩathĩ atĩ mathiĩ makamũcakaithie o makĩmũhoragĩria.

¹²Na rĩrĩa maatiirire maitho me haraya na makĩrigwo nĩwe, makĩrika kũrĩra mũno na mũgambo mũnene; magĩgĩtehũranga nguo ciao, o mũndũ o mũndũ, na makĩĩhurĩria rũkũngũ mĩtwe makĩrũerekagĩria na igũrũ.

¹³Magĩgĩikara thĩ hamwe nake mĩthenya mũgwanja na matukũ mene, na gũtirĩ wamũgambagia na kiugo o na kĩmwe, tondũ nĩmonaga atĩ kĩeha kĩrĩa e nakĩo nĩ kĩnene mũno.