Job 3

¹THUTHA ũcio Ayubu agĩtumũra kanua, akĩruma mũthenya ũrĩa aaciarirũo.

²We Ayubu agĩgĩcokia ũhoro akiuga:

³Mũthenya ũrĩa niĩ ndaciarirũo-rĩ, ũrotoma! o hamwe na ũtukũ ũrĩa woimirie atĩ, Kũrĩ mwana wa mũndũ mũrũme wagĩirũo ihu!

⁴Mũthenya ũcio ũrotuĩka o nduma; Ngai nĩamenye gũkaũrũmbũiya arĩ igũrũ, o na ũroaga gũthererũo nĩ ũtheri!

⁵Nduma-rĩ, o gwata ĩrĩa nene ya gĩkuũ, ĩrowĩnyitĩra ũtuĩke wayo; nĩũtũũre ũhumbĩirũo nĩ itu; kĩrĩa gĩothe gĩcingimanagia mũthenya kĩrowĩkĩra icanjama!

⁶Ũtukũ ũcio naguo-rĩ, ũrokumbatwo nĩ nduma ndumanu: nĩũmenye gũkagwatanio na matukũ ma mwaka; ũroaga gũtaranĩrio na mĩeri!

⁷Ĩĩ-ni, ũtukũ ũcio ũrotũũra wĩ mũthatu; ihinda rĩaguo nĩkũmenye gũkanoigwo rũkemi!

⁸Ũroekĩrũo ndirũ nĩ arĩa mekagĩra mĩthenya ndirũ, arĩa moĩ kwarahũra nyamũ ĩrĩa ĩĩtagwo rĩwiathani!

⁹Njata ciaguo cia hĩndĩ ya gũkĩa irotuĩka nduma; ũrokĩrorereria ũtheri na ũwage, o na ndũkanakĩone imone cia kĩroko:

¹⁰Nĩ ũndũ ndũigana kũhinga mĩirigo ya nda ya maitũ, na ndũkĩigana gũthiĩkĩrĩria maitho makwa matikonane na thĩna.

¹¹Ĩ nĩ kĩ kĩagiririe ngue o ndaciarũo? nĩ kĩ kĩagiririe nduĩkane o ndoima nda?

¹²Nĩ ũndũ kĩ niĩ ndaamũkĩirũo maru-inĩ, kana ngĩamũkĩrũo nyondo-inĩ, atĩ nĩguo ngĩongage?

¹³Tiga nĩ ũguo, rĩu nĩ gũkoma ingĩkomete ngakira; rĩu ingĩrĩ toro; nĩ kũhurũka ingĩhurũkĩte,

¹⁴Hamwe na athamaki na ene-kĩrĩra a mabũrũri, arĩa meakĩire kũrĩa gũtarĩ andũ kwĩ na ihooru;

¹⁵Kana ngagĩa hamwe na anene arĩa maarĩ na thahabu, arĩa-ni maaiyũrĩtie nyũmba ciao betha.

¹⁶O na nĩ kaba itangĩatuĩkire mũndũ, ’haane ta kĩhuno gĩte, nduĩke ta twana tũrĩa tũtarĩ twona ũtheri.

¹⁷Kũu-rĩ, arĩa aaganu nĩmatigĩte gocogoco, o na ningĩ kuo arĩa anogu nĩ kũhurũka mahurũkaga.

¹⁸Kũu-rĩ, andũ arĩa anyite mĩgwate maarahĩte o hamwe, matigambagio nĩ mũgambo wa mũnyabara.

¹⁹Andũ arĩa matarĩ igweta, gwata arĩa marĩ, othe me kuo, o na ngombo ĩgatiga gwathagwo nĩ mũmĩathi.

²⁰Nĩ ũndũ kĩ ũtheri ũheagwo mũndũ wa kĩnyamaro, muoyo-rĩ, ũgakĩheagwo arĩa maikaraga me na ũcũngũ ngoro,

²¹O arĩa meriragĩria gĩkuũ, na gĩtingĩũka, na makĩenjagĩrĩra mũno o na gũkĩra managĩ marĩa mahitharu,

²²Arĩa-ni makenaga, magakenũrũrũka, makaigua wega mũno, maakinyĩrĩra mbĩrĩra?

²³Nĩ ũndũ kĩ ũtheri ũkĩheagwo mũndũ ũũrĩirũo nĩ njĩra, mũndũ mũhingĩrĩrie nĩ Ngai?

²⁴Amu-rĩ, ithenya rĩa ndĩe irio no gũthũmũka gũũkaga ho. Na mũraramo wakwa ũitũrũrũkaga o ta maĩ.

²⁵Amu ndetigĩra ũndũ, norĩo ũkũngorerera, ũndũ o ũcio ngũiguĩra guoya, noguo ũnginyagĩrĩra.

²⁶Ndihotaga kũhorera, kana gũkirĩrĩria, o na kana kũhurũka; no gĩtangĩko gĩũkaga.