Job 4

¹HĨNDĨ ĩo Elifazu, ũrĩa Mũtemani, agĩcokia, akĩũria atĩrĩ,

²Mũndũ ũgeria gũkũgwetera koigo-rĩ, hihi wanoga? ningĩ nũ ũngĩkĩhota kwĩgiria ndakaarie?

³Atĩrĩrĩ, wee-rĩ, nĩ andũ aingĩ wanaruta ũhoro, na moko marĩa maregeru nĩwe wanamekĩra hinya.

⁴Ndeto ciaku-rĩ, nĩcio cianatiirĩrĩra ũrĩa wendaga kũgũa, maru marĩa magondoku, nĩwe ũratũire ũmomagĩrĩria.

⁵Ĩndĩ rĩu wakinyĩrĩrũo nĩ maũndũ wee, nĩ kũũrũo worũo nĩ hinya; wakĩhutio nĩmo wee, no kũmaka wamaka.

⁶Mwĩhoko waku githĩ ti gwĩtigĩra Ngai, kũu ũtũire ũmwĩtigĩrĩte; wagĩrĩru wa mĩthiĩre yaku githĩ tiguo kĩĩrĩgĩrĩro gĩaku?

⁷Ta ririkana atĩrĩ, nĩ mũndũ ũrĩkũ wanatoma atarĩ ũũru ekĩte? kana arĩa arũngĩrĩru-rĩ, nĩ na kũ maanakĩgatĩka?

⁸Niĩ, ũrĩa nyonete, no atĩ arĩa marĩmaga waganu na kũhanda makahanda kĩnyamaro, nocio magethaga.

⁹Acio nĩ kũninwo maninagwo nĩ mĩhũmũ ya Ngai, magatomio nĩ itiiha rĩa marakara make.

¹⁰O hĩndĩ ĩrĩa mũrũthi ũrathunguruma, o hĩndĩ ĩrĩa ngatia ĩrĩ ũrũme ĩrararama-rĩ, magego ma mĩrũthi ĩo mĩĩthĩ nĩ kũhehenjwo mahehenjagwo.

¹¹Mũrũthi ũrĩa mũkũrũ ũgagĩkua nĩ kũũrũo nĩ ndĩa, nacio ciana cia ngatia ĩrĩa ya mũgoma ikahurunjũka.

¹²Gwĩ kohoro kaanginyĩrĩire na ngunguĩ, matũ makwa magĩkaigua ta karaheehanwo.

¹³Ndarĩ na macũrania njĩkĩrĩtwo nĩ cioneki cia ũtukũ, ihinda rĩrĩa andũ magwatagwo nĩ toro mũnene;

¹⁴Ngĩnyitwo nĩ guoya, o na kĩinaino, mahĩndĩ makwa mothe magĩgĩthingitha.

¹⁵Na hĩndĩ ĩo uthiũ-inĩ wakwa hakĩhĩtũkĩra roho; njuĩrĩ ciakwa ngĩigua ta ikũgũũka.

¹⁶Nakĩo kĩndũ kĩu gĩkĩrũgama, no ndiahotire gũkũũrana ũrĩa kĩhaana; maitho-inĩ makwa no kĩhũmba haarĩ: gwakirĩte ngiria, na ngĩcoka ngĩigua mũgambo, ũkiuga,

¹⁷Mũndũ na nĩagakua-rĩ, githĩ aahota gũtuĩka mũthingu harĩ Ngai? mũndũ-rĩ, aahota gũtuĩka mũtheru harĩ Ũrĩa wamũũmbire?

¹⁸Atĩrĩrĩ, o kinya ndungata iria ciake, we ndaciĩhokaga; o gwata araika acio ake, onaga ta mahĩtagia:

¹⁹Githĩ makĩria ti andũ, aya atũũri nyũmba cia ndaka, itina ciacio ciakĩtwo o rũkũngũ-inĩ, na nĩmamemendekaga ta ciĩhuruta?

²⁰Gatagatĩ-inĩ ka rũcinĩ na hwaĩ-inĩ gũthuthĩka magathuthĩka, gũthira magathira tene na tene na matekũrũmbũiyo.

²¹Githĩ mũkanda wa hema yao to kwambũrũo wambũragwo thĩinĩ wao? nĩ gũkua makuaga, na magakua matarĩ mohĩga.