Job 5

¹Ta gĩĩtane; nĩngarĩ kũrĩ ũngĩgwĩtĩka? acio atheru-rĩ, nĩ ũrĩkũ ũngĩmwangĩra?

²Amu kĩng’ũrĩko kĩa ngoro nĩ kũũraga kĩũragaga kĩrimũ, mũndũ mũkĩgu-rĩ, gĩtubunyĩko no kũmũninithia.

³Ndanona mũndũ kĩrimũ akĩgwata na mĩri: no rĩrĩ, o rĩmwe ngĩruma ũikaro wake.

⁴Ciana ciake nĩiraihĩrĩirio nĩ ũhonokio, igakĩhũhũcagwo gũgĩcirũo thome-inĩ, na itingĩona wa gũciteithũra.

⁵Magetha ma cio, mũndũ ũrĩa mũhũtu nĩwe ũmarĩaga, akĩmoyagĩra o mĩigua-inĩ ya rũgiri-inĩ rũacio, nacio indo ciacio ikoragwo ciathamĩirio kanua nĩ mũtego.

⁶Nĩ ũndũ-rĩ, ũũru ti kuuma uumaga tĩri-inĩ, na thĩna ti kũmera ũmeraga thĩ,

⁷No rĩrĩ, andũ maciaragwo marĩ a kuonaga thĩna, o ta ũrĩa thandĩ cia mwaki irĩ o cia gũthang’ata.

⁸Korũo nĩ niĩ-rĩ, nĩ Mũrungu ingĩrongoria, ’he Ngai ũhoro wakwa,

⁹O we ũrĩa wĩkaga maũndũ manene matangĩtuĩrĩka, maũndũ me magegania matangĩtarĩka;

¹⁰O we ũrĩa uuragĩria thĩ mbura, agagĩtũmaga mĩgũnda yarahe maria.

¹¹Andũ arĩa matetũũgĩragia amaigaga handũ hatũũgĩru, nao arĩa marĩ na kĩeha maambatagio makaigwo ũhonokio-inĩ.

¹²Methugunda ma andũ arĩa aara nĩ gũthatia amathatagia, moko mao magakĩremwo nĩ kũhingia ũndũ ũrĩa ũmabatairie.

¹³Nĩ kũgwatia agwatagia andũ arĩa ogĩ na wara wao ene, andũ arĩa ahĩngĩcanu-rĩ, ũrĩa macirĩire gwĩka ũgakĩrĩgarĩgio.

¹⁴Matũngagwo nĩ nduma mũthenya, na mũthenya barigici makahambataga o ta arĩ ũtukũ.

¹⁵Nĩ kũhonokania ahonokanagia harĩ rũhiũ rũrĩa ruumaga tũnua twao, agakĩhonokia mũndũ ũrĩa mũkĩa guoko-inĩ kwa ũrĩa wĩ na hinya;

¹⁶Ũrĩa mũhũthũ agakĩgĩa na kĩĩrĩgĩrĩro, naguo wogogani ũkehumba kanua.

¹⁷Atĩrĩrĩ, mũndũ ũrarũithio nĩ Ngai nĩwe wa gũkena: tondũ ũcio-rĩ, ihũra rĩa Mwene-Hinya menya ũrĩtirike.

¹⁸Nĩ gũkorũo nĩatuuragia mũndũ, agacoka akoha wega; gũtihia nĩamũtihagia, na moko make nomo macokaga kũmũhonia.

¹⁹We nĩegũgũteithũra o na ũrĩ na mathĩna matandatũ, ĩĩ-ni, o na wakorũo wĩ na mũgwanja, gũtirĩ ũũru ũngĩkũhutia.

²⁰Hingo ya ng’aragu no agũkũũre harĩ gĩkuũ, na hĩndĩ ya mbaara agũkũũre hinya-inĩ wa njomo.

²¹Ũgũtũũra ũhithĩtwo mĩario mĩũru ĩhaana ta rũcamiũ, na gwoka mwanangĩko, wee ndũkawĩtigĩra.

²²Mwanangĩko-rĩ, na ng’aragu, no gũthekerera ũrĩcithekagĩrĩra, o na ndũrĩĩtigagĩra nyamũ njũru iria ii mabũrũri-inĩ.

²³Amu ũgũtũũra wĩ karĩko na mahiga ma werũ-inĩ, o nacio nyamũ cia gĩthaka itũũre ciiguaine nawe.

²⁴Ũrĩikaraga ũũĩ atĩ hema-inĩ yaku kũrĩ o na thayũ, na wathiĩ kũrora kiugũ gĩaku ũrĩkoraga gũtirĩ kĩndũ kĩũrĩte.

²⁵O na ningĩ ũgũtũũra ũmenyete atĩ mbeũ yaku nĩ kũingĩha ĩkaingĩha, rũciaro rũaku rũtuĩke rũingĩ ta nyeki ya thĩ.

²⁶Ũgakinya ithikĩro-inĩ rĩaku ũhingĩtie ũkũrũ, o ta ũrĩa gĩtĩa kĩa ngano kĩinũkagio hingo ya kũgetha yakinya.

²⁷Ũhoro ũcio-rĩ, ithuĩ nĩtũũthuuthuurĩtie, tũgakora nĩguo; kĩũigue wee, na ũwĩmenyere.