Job 24

¹Nĩ kĩ kĩgiragia Mwene-Hinya araaragĩrie mahinda? nĩ kĩ gĩkĩgiragia arĩa mamũũĩ mone mĩthenya ĩo yake?

²Kũrĩ andũ makũũraga itĩ cia mũhaka; kũrĩ matunyanaga ndũru cia mbũri makerĩithĩria.

³Maingataga ndigiri ya ũrĩa ũtarĩ ithe magathiĩ nayo, na magathiĩ na ndegwa ya mũtumia wa ndigwa ĩtuĩke ngwatio ya thirĩ.

⁴Nĩ gũthengia mathengagia andũ arĩa akĩa njĩra, athĩni a thĩ makaya kwĩhitha meturanĩire hamwe.

⁵Ta monei, no ũndũ ũmwe na njagĩ irĩ werũ-inĩ, noguo marokagĩra wĩra wao wa kũhaara gĩa kũrĩa; gĩthaka-inĩ nĩkuo marutaga irio cia kũhe ciana ciao.

⁶Nĩmetuagĩra ngaragatha mĩgũnda-inĩ, na makeoyagĩra matigari ma thabibu cia andũ acio aaganu.

⁷Maraaraga njaga, matarĩ na nguo, nĩ kwaga maagaga gĩa kwĩhumbĩra heho-inĩ.

⁸Maconjoragio nĩ mbura ĩrĩa ya irĩma-inĩ, makahĩmbagĩria ndũmba ya ihiga nĩ kwaga ha kwĩũa.

⁹Kũrĩ andũ mahuragia mwana wa ngoriai o nyondo-inĩ, magakĩĩnyitĩra ngwatio ya thirĩ o harĩ athĩni acio:

¹⁰Nao magagĩthiaga njaga, matarĩ na nguo, na magakuuaga itĩa cia ngano o na marĩ ahũtu;

¹¹Nĩo a gũthondekaga maguta kwa andũ acio nja; nĩo makinyaga ihihĩro ciao cia ndibei o makĩrĩagwo nĩ nyota.

¹²Thĩinĩ wa itũũra kũrĩa andũ maingĩhĩire nĩ gũcayũo gũcayagwo, na gũgaikara gũgĩkayagwo nĩ ngoro cia andũ arĩa agurarie: na ũrimũ mũũru ũcio ũrekwo kuo, Ngai ndaũrũmbũyagia.

¹³Aya ningĩ nĩ a gĩkundi kĩa arĩa meregithanĩtie na ũtheri; njĩra ciaguo matingĩmenyana nacio, o na kana marũmanĩrĩre na mĩirigo yaguo:

¹⁴Mũũragani-rĩ, okagĩra o gwatherathera akorage andũ arĩa athĩni, o acio aagi, na ũtukũ agatuĩka ta mũici.

¹⁵Riitho rĩa gĩtharia narĩo rĩetagĩrĩra kũgĩe mairia, nakĩo gĩkoiga atĩrĩ, Gũtirĩ riitho o na rĩmwe rĩngĩnyona: na gĩgekunĩkania ũthiũ.

¹⁶Rĩrĩa kwĩ nduma nĩmenjaga nyũmba; mũthenya magatinda mehingĩire: matingĩmenyana na ũtheri.

¹⁷Amu harĩ o othe rũcinĩ nĩ ta nduma ya gĩkuũ, amu nduma ya gĩkuũ nĩmoĩ matebebia mayo.

¹⁸Inyuĩ mũkuuga atĩ mũndũ ta ũcio ahutũkaga narua ta arĩ o maĩ igũrũ: rũgai rũao gũkũ thĩ nĩ kũrumwo rũĩ rũrume; ndacokaga gũkerũra na ya mĩgũnda ya mĩthabibu.

¹⁹Riũa na ũrugarĩ nĩininaga maĩ ma tharunji, na noguo kwa-ngoma kũninaga andũ arĩa mehagia.

²⁰Nda ĩrĩa yamũciarire nĩ kũriganĩrũo ĩkariganĩrũo nĩwe; akarĩo nĩ igunyũ ikĩiguaga mũrĩo; ndarĩ hingo agacoka kũririkanwo: wogogani-rĩ, nĩ gũthuthĩka ũgathuthĩka o ta mũtĩ.

²¹Amu nĩarĩaga indo cia atumia arĩa thata mataciaraga akainina, na ndekaga mũtumia wa ndigwa wega.

²²No rĩrĩ, ing’ara icio Ngai nĩ gũtũũria aitũũragia na ũhoti wake: nĩciũkagĩra, o na rĩrĩa itangĩĩtĩkia atĩ ciacoka gũikara muoyo.

²³We nĩetĩkagĩria andũ acio matũũre na mwĩgangaro, nao makehoka ũhoro ũcio, o na maitho make nĩmacũthagĩrĩria njĩra ciao.

²⁴Gũtũũgĩra nĩmatũũgĩraga, na ihinda inyinyi rĩathira, makeeherera; ĩĩ-ni, nĩ gũcokio macokagio na thĩ, magathengio o ta andũ arĩa angĩ othe, magakĩrengwo ta igira cia mwere.

²⁵Na akorũo tiguo gũtariĩ, nũ ũkũ’hoota nduĩke mũhenania, agĩthatie ũhoro ũcio ndaaria?