Job 23

¹HĨNDĨ ĩo Ayubu agĩcokia akiuga atĩrĩ,

²O na ũmũthĩ ningĩ gũteta gwakwa no kũrũrũ: ihũra rĩrĩa ’hũrĩtwo nĩ iritũ gũkĩra mũcaĩre ũyũ ndĩ naguo.

³Na arĩ korũo nĩnjũĩ harĩa ingĩmuona, nginye o hau gĩikaro-inĩ gĩake!

⁴Ndatandaiya cira wakwa mbere yake, njiyũrie kanua gakwa ihooto.

⁵Ndenda kũmenya ciugo iria angĩnjokeria, njigue wega ũrĩa we angĩnjĩra.

⁶Nĩ kũgariũrana angĩgariũrana na niĩ na ũhoti ũcio wake mũnene? Aca! nĩ kũrũmbũiya angĩrũmbũiya ũhoro wakwa.

⁷Hau-rĩ, mũndũ mũrũngĩrĩru aahota gũcokanĩria ũhoro nake; nĩ kuohorũo ingĩkĩohorũo, ndekio nĩ mũnduĩri nginya tene.

⁸Atĩrĩrĩ, kwĩ hĩndĩ ngũmwetha na mbere, no ndangĩkorũo ho; rĩngĩ ngacoka na thutha, no ndingĩona harĩa arĩ:

⁹Ngarora ningĩ na mwena wa ũmotho harĩa araruta wĩra, na ndingĩmũringia riitho; we ekwĩhitha na mwena wa ũrĩo, ngakĩremwo nĩ kũmuona.

¹⁰No rĩrĩ, nĩamenyaga njĩra ĩrĩa ndĩrathiĩ nayo; aarĩkia kũngeria, ngoimĩra ’haana o ta thahabu.

¹¹Kũgũrũ gwakwa kũrũmagia o mũrato wa makinya make; njĩra yake nĩyo ndũire nũmĩrĩire, na ndirĩ ndamĩehũka.

¹²Ndirĩ ndahũndũka ngatigana na watho wa mĩromo yake; ciugo cia kanua gake ndĩcituĩte mũthithũ wĩ bata gũkĩra kwĩatha niĩ mwene.

¹³No ĩndĩ we nĩ wa kĩrĩko o kĩmwe, nũ ũngĩkĩhota kũmũgarũra? o ũrĩa ngoro yake ĩkwenda-rĩ, noguo ekaga.

¹⁴Ũndũ ũrĩa njathĩrĩirĩo nĩguo arahingia; nake nĩ wa maũndũ maingĩ mahaana ũguo.

¹⁵Tondũ ũcio nĩ gũtebeba ndebebaga ndĩ ũthiũ-inĩ wake; ndecũranĩria ũhoro wake, ngakĩmũguoyohera.

¹⁶Nĩ amu Mũrungu nĩaagithĩtie ngoro yakwa hinya, we Mwene-Hinya nĩwe ũkĩndebebetie;

¹⁷Nĩ gũkorũo ti nduma ĩno ĩtũmĩte ’make, na ndimakĩte nĩ ũndũ atĩ ndĩ mũhumbe ũthiũ nĩ nduma ndumanu.