Job 22

¹HĨNDĨ ĩo Elifazu ũrĩa Mũtemani agĩcokia, akĩũria atĩrĩ,

²Mũndũ-rĩ, aakĩhota kũgĩa na ũndũ ũngĩguna Mũrungu? mũndũ ũrĩa mũũgĩ, ũũgĩ wake nowe mwene ũgunaga.

³No anga Mwene-Hinya nĩangĩĩkenera nĩ ũndũ waku gũtuĩka mũthingu? arĩ nyongeri angĩgwata nĩ ũndũ waku kwagĩria mĩthiĩre yaku nĩguo ĩtuĩke mĩkinyanĩru?

⁴No anga nĩarakũrũithia nĩ ũndũ atĩ nĩũmwĩtigagĩra? nĩngarĩ arĩ guo gĩtũmi gĩa agũtonyie cira-inĩ?

⁵Ũndũ kũrĩ, githĩ ti atĩ ũũru waku nĩ mũnene, mawaganu maku magakĩaga gĩturi?

⁶Amu wanenyitĩra ngwatio harĩ mũrũ wa thoguo na hatarĩ thirĩ, na andũ maarĩ njaga ũkamacuma tũkuo tũrĩa maarĩ natuo.

⁷Ũtũire ũregaga kũhe andũ arĩa anogu maĩ manyue, na ũkaimaga arĩa ahũtu irio.

⁸No rĩrĩ, karau atuĩkage atĩ nowe mwene itĩri; mũndũ wa gwĩkĩrĩrũo-rĩ, agĩtuĩke nowe wa gũtũũra kuo.

⁹Ũtũire ũhũndũraga atumia a ndigwa matarĩ na kĩndũ, nacio ciana itarĩ maithe ikoinangwo moko.

¹⁰Nĩkĩo rĩu ũthiũrũrũkĩirio nĩ mĩtego, na ũgatebebagio nĩ guoya ũgĩũkaga na kĩguũ,

¹¹O na kana ũgatumanĩrũo nĩ nduma, ũkaremwo nĩ kuona, o na ũkahumbwo nĩ maĩ mokĩte ma mũiyũro.

¹²Githĩ Ngai ndarĩ o igũrũ igũrũ? ningĩ ũraihĩrĩru wa njata-rĩ, ta kĩone ũrĩa ihaicĩte na igũrũ!

¹³Nawe ũkuuga atĩrĩ, Mũrungu amenyaga ũhoro ũrĩkũ? nduma ĩkĩrĩ kuo ndumanu ũũ, no anga angĩhota gũcirithia andũ?

¹⁴Athiĩkĩrĩirio nĩ matu mamata, akaaga kuona, na kũrĩa aceeraga no igũrũ o gacũmbĩrĩ!

¹⁵Njĩra ĩo ngũrũ nĩyo ũkũrũmĩrĩra, ĩo yanagerũo nĩ andũ aaganu?

¹⁶Nao makĩhurio magĩthengio ihinda rĩao rĩtaanakinya, arĩa gĩtina kĩao gĩatuĩkire ta rũũĩ, gĩgĩitũrũrũka;

¹⁷O arĩa merire Mũrungu, Thiĩ, tigana na ithuĩ! makĩũria atĩrĩ, Mwene-Hinya-rĩ, angĩtũteithia ũhoro ũrĩkũ?

¹⁸Na nowe waiyũrĩtie nyũmba ciao indo njega. (Ũtaaro wa acio aaganu ũrondaihĩrĩria mũno!)

¹⁹Arĩa athingu monaga ũguo magakena, andũ arĩa matekaga ũũru magagĩthekerera andũ acio,

²⁰Makiugaga atĩrĩ, Acio maratũũkagĩrĩra nĩ amitĩku-ni! nacio indo iria ndige nĩo ikarambio nĩ mwaki!

²¹Ta no kĩĩmenyithanie na Ngai, ũgĩcoke gũikaraga na thayũ: njĩra ĩo noyo ya gũkũrehere maũndũ mega.

²²Ta ĩtĩkĩra kĩrĩra kĩrĩa gĩkuuma kanua gake, ũkĩige ciugo ciake ngoro-inĩ yaku.

²³Wacokerera Mwene-Hinya-rĩ, nĩ gwaĩkĩka ũrĩakĩka, wagĩĩtĩkĩra gũthengia ũgenyũ kũraya na hema ciaku.

²⁴Ningĩ mũthithũ waku wa ũtonga ũũrekie thĩ tĩri-inĩ, thahabu ĩrĩa ya Ofiri-rĩ, ũmĩrekie ngomongo-inĩ cia rũũĩ-inĩ;

²⁵Nake Mwene-Hinya nĩwe ũgũtuĩka mũthithũ waku, atuĩke ta betha harĩ wee, ĩrĩa ya bata.

²⁶Amu Mwene-Hinya hĩndĩ ĩo nĩ kũmwĩkenera ũrĩmwĩkenagĩra, ũgatiira ũthiũ ũgakĩrora Ngai.

²⁷Kũhoya ũrĩmũhoyaga, nake agakũigua, nawe ũgacoka ũkahingia mĩĩhĩtwa yaku.

²⁸Ningĩ watua atĩ kũrĩ ũndũ ũgwĩka, ũndũ ũcio no ũkũrĩĩrĩre; ikĩro ciaku irĩtheragĩrũo nĩ ũtheri.

²⁹Rĩrĩa ũngĩkorũo ũthikanĩtio ũkagũa, ũkoiga, Nĩkuoyanagwo! nake no ahonokie ũcio ũtarĩ na maitho ma ngũrũ.

³⁰Akahatũra o kinya ũrĩa ũtangĩaga ũcuke: ĩĩ-ni, ũcio akahatũrũo nĩ ũndũ wa gũthera kwa moko maku.