Job 41

¹Nyamũ ĩrĩa ĩĩtagwo kĩng’ang’i-rĩ, wahota kũmĩgucũrũria maĩ-inĩ na ndwano? kana ũkĩhihinyanie rũrĩmĩ rũayo na mũkanda?

²Wahota kũmĩĩkĩra mũhĩndo mũniũrũ? kana ũtũrĩkanie rũthĩa rũayo na mbogoro?

³Nĩngarĩ ĩngĩtindĩrĩra ĩgĩgũthaitha, kana ĩkwarĩrie na ciugo cia kũhoreria?

⁴Ĩĩ hingo ĩngĩĩtĩkĩra gwĩkĩra kĩrĩko nawe, atĩ ũthiĩ nayo ĩgatuĩke njaguti yaku nginya tene?

⁵Wathaka nayo ta ũrĩa nyoni ĩthakagio, kana ũmĩohere airĩtu aku mamĩmeemagie?

⁶Gĩtaatĩ gĩa ategi-a-ciũngũyũ-rĩ, nĩkĩngĩmĩtua thũgũrĩ wakĩo? yagayanwo nĩ ahũri-a-biacara?

⁷Nĩũngĩhota kũmĩiyũria rũũa rũayo mĩrarangai, kana ũiyũrie kĩongo kĩayo mĩcengi ĩrĩa ĩrathaga ciũngũyũ?

⁸Ta kĩmĩigĩrĩre guoko! ririkana mbaara ĩo, ndũkanagĩcokere.

⁹Atĩrĩ! kũmĩĩrĩgĩrĩra nĩ wĩra wa tũhũ: anga mũndũ to kũmaka aamĩona?

¹⁰Gũtirĩ o na ũrĩ ũrũme ũngĩeta kũmĩarahũra: nake akĩrĩ ũ, ũrĩa ũngĩkĩĩĩnyũmĩria niĩ?

¹¹Niĩ-rĩ, nũ waambire kũ’he kĩndũ nĩguo na niĩ ngacoka kũmũrĩha? ruungu rũa igũrũ o guothe kĩndũ gĩĩ kuo, o na kĩrĩkũ, no gĩakwa.

¹²Ũhoro wa miutha yayo-rĩ, ndingĩũkirĩra, kana hinya wayo ũrĩa wĩ mũnene, o na kana ũcũrũrũbe wayo kwagĩra.

¹³Nguo ĩo ĩĩ nayo mwĩrĩ, nũ ũngĩhota kũmĩcaũra? nũ ũngĩtonyia guoko matamu-inĩ macio mayo moinanĩre?

¹⁴Nũ ũngĩhota kũmĩemũria mĩrango ya ũthiũ wayo? magego mayo, ũguo mathiũrũrũkĩirie kanua, marĩ itebebia!

¹⁵Mĩtaratara ya makaracũ mayo nĩyo mwĩraho wayo, makomanĩte o gũkomana, ta mathingĩrĩirũo na mũhũra.

¹⁶Tondũ wa ũrĩa matumaine mũno, gũtirĩ karũhuho kangĩhota gũtonya gatagatĩ-inĩ kamo.

¹⁷Nĩ kũgwatana magwataine, magakĩrathĩkana, o ũndũ matangĩtigithũkanĩka.

¹⁸Mĩathimũro yayo nĩ kũmenũria ĩmenũragia ũtheri, namo maitho mayo no ta imone cia rũcinĩ ruoro rũgĩtema.

¹⁹Kanua kayo koimaga icinga njakanu, o na thandĩ cia mwaki igathandĩkaga ho.

²⁰Marima-inĩ ma iniũrũ rĩayo nĩhoimaga ndogo, ta ya nyũngũ ĩgĩtherũka, ĩrĩa ĩkũrugwo na ithanjĩ.

²¹Mĩhũmũ yayo no kũgwatia makara mwaki, kĩnua kĩayo nĩ rũrĩrĩmbĩ kiumaga.

²²Ngingo yayo nĩho hinya ũtũũraga, na mbere-inĩ yayo nĩ kĩmakanio gĩtũrũhaga ho.

²³Mĩnono ya nyama ciayo ĩnyitaine o kũnyitana: nĩ kũrũma ĩmĩĩrũmĩrĩirie; ndĩngĩenyenyeka.

²⁴Ngoro yayo ĩrũmĩte ta ihiga; ĩĩ-ni, ĩkarũma o ta ihiga rĩa ũthĩĩro.

²⁵Yeambararia-rĩ, o na andũ arĩa makandũi no gwĩtigĩra metigagĩra, magakĩmaka nĩ ũndũ wa gĩtuĩko kĩa nda.

²⁶Mũndũ aamĩikia rũhiũ, rũtirĩ ũndũ rũngĩhota; o na kana mwenjerere, kana iheti, kana gatimũ.

²⁷Kĩgera yonaga ta arĩ o mũnyeki mũũmũ, na kĩndũ kĩa rũthuku ĩkona ta arĩ o kĩrung’o kĩa mũtĩ kĩoru.

²⁸Mũguĩ ndũngĩtũma ĩhahũke; mahiga ma kĩgũtha harĩ yo magarũrũkaga magatuĩka maragara.

²⁹Njũgũma cionagwo nĩyo ta arĩ o rũhuti; mũhiũko wa gatimũ karĩa gaikĩtio thũgo no gũtheka ĩũthekagĩrĩra.

³⁰Mwara-nda wayo nĩ ta warĩtwo ngĩo njũgĩ: ĩiyũragia ndaka-inĩ ngururo ta cia ngari ĩrĩa ĩrigithaga ngano.

³¹Ĩtũmaga ndia ĩtherũke ta nyũngũ; maĩ ma iria ĩgakĩhũra makahaana ta maguta makĩringio, marĩa ma kwĩhaka.

³²Thutha wayo ĩtigaga yekĩra mũkirito ũgũkenga; mũndũ no kuuga ndia ĩrĩ na mbuĩ.

³³Gũkũ thĩ gũtirĩ nyamũ ĩngĩ ĩhaana tayo, nĩ ũrĩa yombirũo ĩtarĩ ya kũigua guoya.

³⁴Indo iria ndũũgĩru ciothe no kũrora ĩciroraga manyiira; nĩyo mũthamaki wa rũciaro ruothe rũrĩa rũĩ ngũrũ.