Job 40

¹NINGĨ Jehova agĩcokeria Ayubu atĩrĩ,

²Ũrĩa ũkwenda kũng’otha-rĩ, nĩakĩgariũrane na Mwene-Hinya? ũrĩa ũrarũithia Ngai, ta nĩacokie!

³Hĩndĩ ĩo Ayubu agĩcokeria Jehova, akiuga ũũ:

⁴Niĩ-rĩ, ndirĩ bata o na hanini; ngũgĩgũcokeria atĩa? nĩndehumba kanua na guoko.

⁵Kwaria nĩnjarĩtie rĩmwe, na ndiona wa gũcokia; ĩĩ-ni, o na ngaaria kerĩ, na ndikĩrĩ ũndũ ũngĩ nguuga.

⁶Hĩndĩ ĩo Jehova agĩcokeria Ayubu ũhoro e kĩhuhũkanio-inĩ, akiuga atĩrĩrĩ,

⁷Rĩu ta ĩhotore ta mũndũ mũrũme: nĩngũkũũria, nawe ũkĩ’menyithie!

⁸Kĩhooto kĩrĩa nduaga maũndũ nakĩo, githĩ no ũkĩrarie? niĩ githĩ wandua mwĩhia, nĩ getha wee ũtuĩke mũthingu?

⁹Anga wee ũkĩrĩ na guoko ta kwa Mũrungu? nawe-rĩ, wahota kũruruma na mũgambo ta wake?

¹⁰Ta kĩĩguĩke rĩu ũnene o na ũtũũgĩru; ĩhumbe ũtĩĩku o na ũkaru!

¹¹Itũrũra mĩiyũro ya marakara maku, bara mũndũ o wothe mwĩgereri, ũkĩmũnyihie.

¹²Kĩbare acio egereri, o mũndũ o mũndũ, ũmũkomererie na thĩ; gũterema ũtereme andũ arĩa aaganu o kũu marũngiĩ.

¹³Moimbĩkanie tĩri-inĩ o hamwe; kĩmathae mothiũ na nduma kũu hitho-inĩ.

¹⁴Hĩndĩ ĩo niĩ na niĩ nĩngũgwĩtĩkĩrĩria atĩ guoko kwa ũrĩo gwaku mwene kwahota gũkũhonokia.

¹⁵Rĩu-rĩ, ta bara nyamũ ĩrĩa ĩĩtagwo nguuũ, ĩo ndombire hamwe nawe: ĩrĩaga nyeki o ta ng’ombe.

¹⁶Rora ũkandĩru ũrĩa ĩĩ naguo njohero, na hinya ũrĩa ĩĩ naguo mĩkiha yayo ya nda.

¹⁷Gĩthita kĩayo ĩgĩkĩhang’ia, no ta mũtarakwa: nga cia ciero ciayo ikĩndĩtwo ta mĩhĩndo.

¹⁸Mahĩndĩ mayo mahaana ta mĩberethi ya rũthuku; mbaru no ta irung’o cia igera.

¹⁹Nyamũ ĩo nĩyo kĩndũ kĩa mbere cĩũmbe-inĩ cia Mũrungu: rũhiũ rũu rũayo nĩ mũmĩũmbi wamĩheire.

²⁰Irio ciayo nĩ irĩma imĩciaragĩra, arĩ kuo gũtũhagwo nĩ nyamũ ciothe.

²¹Ĩmamaga mĩtĩ-inĩ ĩrĩa ĩrĩ mwĩgunyĩ, gĩthaara-inĩ kũrĩa kwĩhithĩte, o kũrĩa kwĩ na mũtondo.

²²Mĩtĩ ĩo ĩrĩ mwĩgunyĩ ĩmĩgitagĩra na kĩĩgunyĩ kĩayo, na ĩgaikara ĩĩ ndigicĩrie nĩ mĩcũgũcũgũ ya rũũĩ-inĩ.

²³O na rũũĩ rũaiyũra mũno, gũtebeba ndĩngĩtebeba: no gwĩkindĩra ĩikaraga ĩĩkindĩire o na rũũĩ ta Jorodani rũamĩtumbuthũkĩra kinya o kanua-inĩ.

²⁴Gũkĩrĩ mũndũ ũngĩmĩnyita rĩrĩa ĩĩhũgĩte, kana amĩtũre mũniũrũ amĩĩkĩre kĩana kĩa rũrigi?