Job 39

¹Wee-rĩ, mbũri cia werũ-inĩ, iria itũũraga mahiga-inĩ, nĩwe ũmenyaga iciarĩro rĩacio? thwariga nĩwe ũrũmbũyagia rĩrĩa mĩgoma yacio ĩkuohoka?

²Wee nĩwe ũtuaga mĩeri ĩrĩa irĩhingagia, kana ũkamenya rĩrĩa igaciara?

³Ciĩthunanagĩra, igaciara tũũri twacio, ikeaũra ruo.

⁴Ciũri icio ciacio nĩigarĩĩraga; ciĩreraga o kũu rũriĩ gũtheri, ikaya gũgathiĩ, na iticicokerere.

⁵Njagĩ-rĩ, nũ wamĩrekereirie ĩthiage ĩtarĩ mũũria? kana rĩrĩ, njagĩ yo-rĩ, ũrĩa wamĩohorire mĩhĩndo nũ?

⁶To niĩ ndamĩheire werũ ũtuĩke mũciĩ wayo, ngĩtua rũng’ũrĩ rũa cumbĩ gĩtũũro kĩayo?

⁷Yo nĩ kũnyarara ĩnyaraire ironja rĩa itũũra, o na mũkaĩrĩrio wa mũhũri ndĩiguaga.

⁸Mũtambũko-inĩ wa irĩma nĩkuo ũrimũtho wayo, ĩhaarage kahuti o karĩa gothe karuru.

⁹Mbogo-rĩ, nĩĩngĩkirĩrĩria ĩgũtungatĩre, kana ĩĩtĩkĩre gũikara kiugũ gĩaku?

¹⁰Wakĩhota kuoha mbogo na mũkwa ĩgucagie mũraũ? yagĩĩtĩkĩra kũrĩma ituamba na ngari ĩkuumĩte o thutha?

¹¹Wamĩĩhoka, nĩ ũndũ atĩ ĩĩ na hinya mũnene, kana ũmĩtigĩre wĩra waku ĩrutage?

¹²Wakĩmĩĩtĩkia atĩ nĩĩrĩkũinũkagĩria kĩmera gĩaku, ĩgagĩkũũnganĩria ngano, ĩkĩrehage kĩhũrĩro-inĩ?

¹³Ithagu rĩa nyaga-rĩ, rĩbatabataga na gĩkeno, ĩndĩ mĩhĩko ĩo yayo, na njoya ciayo, nĩikĩrĩ tha?

¹⁴Tondũ-rĩ, ĩtigaga matumbĩ mayo tĩri-inĩ, atĩ magwatagĩre ũrugarĩ o hau rũkũngũ-inĩ,

¹⁵Ĩgakĩriganĩrũo nĩ atĩ maahota kũũragwo nĩ kũgũrũ kwene, kũrangwo marangwo nĩ nyamũ ya werũ-inĩ.

¹⁶Ĩthũkĩire ciana ciayo o ta itarĩ ciayo; ndĩnehaga, o na mĩnoga yayo ĩngĩtuĩka ya tũhũ,

¹⁷Nĩ gũkorũo Ngai nĩamĩagithĩtie ũũgĩ, akaaga kũmĩgaĩra mbuguĩro.

¹⁸Hĩndĩ ĩrĩa ningĩ yatua kwĩarahũra yũre-rĩ, ĩkanyarara mbarathi o gwata mũmĩhaici.

¹⁹Ĩ mbarathi-rĩ, nĩwe ũmĩĩkĩrĩte hinya? nĩwe ũmĩguĩkĩire ngingo na mũreera ũcio wayo wĩribaribaga?

²⁰Wee nĩwe ũtũmaga ĩrũũge ta ngigĩ? riri wa mũtiihĩre wayo-rĩ, ũrĩ itebebia!

²¹Nĩ gũtutia ĩtutagia kũu gĩtuamba-inĩ ĩgĩĩkenagĩra nĩ ũhoti ũrĩa ĩĩ naguo, ĩgagĩthiĩ gũtũnga ita.

²²Guoya nĩ gũtheka ĩũthekagĩrĩra, kũmaka ndĩngĩmaka, o na ndĩngĩgarũrũka yũre nĩ rũhiũ rũa njora.

²³Ĩthiaga ĩgĩkorakoragĩrũo nĩ thiaka wa mũmĩhaici, o ĩkĩmenũkagĩrũo nĩ mĩenjerere na thũgo cia mĩkũng’i.

²⁴Ĩgakĩhũmbũra thĩ nĩ ũrĩa ĩĩ na ũrũme na ĩkeha; karumbeta karĩ kũgamba ndĩngĩrũgama.

²⁵O karumbeta kaagamba ĩkoiga, Inũ! ĩiguaga thaha wa mbaara ĩĩ hanene, ĩkaigua mĩgoromoko ya njamba, na mũgũũthũkanĩro wa ita.

²⁶Ũũgĩ waku-rĩ, nĩguo ũtũmaga rũĩgĩ rũthang’ate igũrũ na rũgatambũrũkia mathagu rũkerekera o na gũthini?

²⁷Ĩ nderi-rĩ, nĩ gwatha gwaku gũtũmaga yambate o kwambata, ningĩ gĩtara kĩayo ĩkaara o igũrũ mũno?

²⁸Yo ĩtũũraga ihiga-inĩ o igũrũ; nĩho gĩikaro kĩayo, o kũu rũhĩa-inĩ rũa rũaro, handũ he mwĩgitĩro.

²⁹Kũu nĩkuo ĩcũagĩra ĩyonere ndĩa; maitho mayo makamĩonera kũraya mũno.

³⁰Njui ciayo ikundaga o thakame, na handũ harĩ andũ orage, nderi nĩho ĩrĩ.