Job 38

¹HĨNDĨ ĩo Jehova agĩcokeria Ayubu ũhoro e kĩhuhũkanio-inĩ, akiuga atĩrĩrĩ,

²Nũ ũyũ ũrekĩra kĩrĩra nduma na ndeto itarĩ cia ũmenyo?

³Ta ĩhotore rĩu ta mũndũ mũrũme! amu nĩngũkũũria, nawe ũkĩ’menyithie.

⁴Atĩrĩ, rĩrĩa ndaakire gĩtina gĩa thĩ-rĩ, wee warĩ ha? ndũkiuge, akorũo wĩ na ũũgĩ wa kũmenya.

⁵Nũ wathimire kũrĩa ĩgũkinya? amu wee nĩũkĩũĩ; kana nũ wamĩtambũrũkĩirie rũrigi rũa kũgera?

⁶Makinya ma itugĩ ciayo-rĩ, maahandĩrĩirũo kĩ-inĩ? kana nũ waigire ihiga rĩayo rĩa koine,

⁷Hĩndĩ ĩrĩa njata cia rũcinĩ ciainire o hamwe, na ariũ a Ngai othe magĩkĩanĩrĩra nĩ gũkena?

⁸Kana nũ wahingĩire iria rĩrĩa inene na mĩrango rĩrĩa rĩatothokire rĩkiuma ĩhu-inĩ,

⁹Hĩndĩ ĩrĩa ndatuire matu nguo yarĩo, ngĩgĩtũma nduma ndumanu ĩtuĩke tama warĩo, ta ũrĩa ũrigicagĩrio mwana,

¹⁰Na ngĩrĩĩkĩrĩra mũhaka mũtue nĩ niĩ, ngĩkĩrĩhingĩra na mĩgĩĩko o na mĩrango,

¹¹Ngiuga, Ũrĩkinyaga o hau, na ndũkanaagarare; hau nĩho makũmbĩ maku megũgũmi marĩtĩmagĩrĩra.

¹²Gwata kĩambĩrĩria kĩa matukũ maku ũrĩ weathĩra atĩ gũkĩe, ũgakĩonereria ũtheri wa rũcinĩ harĩa ũkuumĩrĩra,

¹³Nĩguo ũkĩnyite thĩ icũrĩ ciayo, andũ arĩa aaganu maribaribwo mamiume?

¹⁴Hĩndĩ ĩo thĩ nĩĩgarũrũkaga ũrĩa ĩkũhaanaga, o ta rĩũmba rĩarĩkia gũturumwo na mũhũri, rĩekĩrũo rũũri, indo ciothe ikoimĩra o wega, nayo ĩgagĩikara ta yehumba nguo:

¹⁵Nao acio aaganu magagĩtunyũo ũtheri ũrĩa wao, nakuo guoko kũrĩa kũhang’arairio gũkoinĩka.

¹⁶Iria rĩrĩa inene-rĩ, ũrĩ watonya kinya matherũkĩro-inĩ marĩo? kana gũceera ũgaceera thĩinĩ wa ndia icio o kũu kũriku mũno?

¹⁷Ũrĩ hingo wanaguũrĩrio ihingo cia gĩkuũ? igukumo icio cia nduma ya gĩkuũ-rĩ, ũrĩ waciona, wee?

¹⁸Ĩ wariĩ wa thĩ, ĩĩ yothe, wee nĩũrĩkĩtie kũũmenya? ta uga, akorũo wothe nĩũkĩũũĩ!

¹⁹Ũtheri-rĩ, njĩra ya gũkinya gĩtũũro kĩaguo ĩrĩ ha? nayo nduma, nĩ na kũ kwayo,

²⁰Nĩguo ũmĩtware ũmĩcokie mũhaka wayo, ũgĩtuĩke nĩwĩkũũranĩire mĩirigo ya gũkinya nyũmba-inĩ yayo?

²¹Wee no ũkĩũĩ, amu wakĩrĩ o mũciare, na matukũ maku makĩgerũo nĩ maingĩ mũno!

²²Tharunji-rĩ, ũrĩ wagĩtonya kũrĩa ĩigĩtwo mĩthithũ, kana mĩthithũ ya mbura ya mbembe, wee nĩũmĩonete,

²³Ĩrĩa njigĩire hingo ya gũtũma mĩnyamaro, ngamĩiga nĩ ũndũ wa hingo ya mbaara na ya ita?

²⁴Nĩ njĩra ĩrĩkũ ũtheri ũgayanganagĩrio nayo? kana ĩrĩa rũhuho rũa irathĩro rũhunjagio nayo gũkũ thĩ?

²⁵Kĩboboto kĩa mbura-rĩ, nũ wagĩatũrĩire mũkaro wa gũũkagĩra, o na kana agĩtemera rũheni rũa marurumĩ njĩra,

²⁶Nĩguo atũme mbura yurage bũrũri ũtarĩ andũ, o werũ-inĩ, kũrĩa gũtarĩ kamũndũ;

²⁷Nĩ getha ĩhũnagie rũng’ũrĩ, o kũrĩa gũkirĩte ĩhooru, ĩgĩtũmaga kũmere nyeki ĩrĩa ya mũmerano?

²⁸Mbura-rĩ, nĩĩrĩ ithe? ningĩ nũ mũciari tũtaata tũrĩa twa ime?

²⁹Mbarabu-rĩ, yoimire nda ya ũ? nake nũ mũciari mbaa ĩrĩa yumaga igũrũ ĩĩ ngenyekenyi?

³⁰Nĩrĩo maĩ mehithaga ta mekunĩkĩirie na ihiga, ndia igũrũ gũgakĩgwatana nĩ heho.

³¹Wee-rĩ, nĩwe muohania kamanja karĩa ga Kĩrĩmĩra? kana muohori mĩgeto ya Karau?

³²Njata iria ciĩtagwo Mazarothu, wee wahota gũciumagaria o mahinda ma cio maakinya? kana Nduba na mũtongoro wa ciana ciayo-rĩ, watuĩka wa kũmĩonagĩrĩria njĩra?

³³Mĩathĩre ya kũrĩa igũrũ, wee nĩũmĩũĩ? nĩwe ũrũmĩtie ũtabania warĩo nĩguo rĩtabanagie thĩ?

³⁴Wee nĩũĩyũkagĩrĩria mũgambo waku ũkaarĩria matu, nĩguo gũũke mbura nyingĩ ĩkũhumbe?

³⁵Wee nĩwe ũtũmaga heni, ithiĩ ihiũke, nacio igagĩkwĩra, Ithuĩ aya?

³⁶Matu na mũthimbĩre wamo-rĩ, nũ wamekĩrire ũũgĩ? kana njata iria igũaga, nũ waciheire ũmenyi?

³⁷Matu-rĩ, nũ ũhotaga kũmagera, tondũ wa ũrĩa e na ũũgĩ? kana nũ ũkĩogekaga inya cia igũrũ,

³⁸Rĩrĩa rũkũngũ rũtondorokaga, nacio ngũgĩ ikagwatana hamwe?

³⁹Mũrũthi wa mũgoma-rĩ, wee nĩwe ũũguĩmithagia ũkawonera ndĩa, kana ũkininĩra ciana cia ngatia mũhaaha,

⁴⁰Rĩrĩa ciĩkonotete ciemo-inĩ ciacio, igagĩikara harĩa hagitaru nĩguo ciohagĩrie?

⁴¹Ĩ ihuru-rĩ, nũ ũrĩonagia irio ciarĩo, rĩrĩa tũcui twarĩo tũrarĩrĩra Mũrungu, na tũkaanganga nĩ kwaga gĩa kũrĩa?