Job 37

¹Ngoro yakwa o nayo nĩĩratetema, na kugũũka ĩkagũũka handũ hayo.

²Iguai ũrĩa mũgambo wake ũrakandũka, kĩiguei mũrurumĩ ũrĩa kanua gake kararurumĩria.

³Aũrekagia ũgatambũrũka ruungu rũa igũrũ o guothe, naruo rũheni rũake rũgakinya o ndere-inĩ cia thĩ.

⁴Thutha waruo nĩ mũgambo ũcokaga gũthunguruma: nĩwe ũraruruma na mũgambo ũcio wake mũkaru, na rĩrĩa mũgambo wake ũkũiguwo ndarigagĩrĩria heni.

⁵Mũrungu-rĩ, arurumaga na mũgambo wake mũrurumĩre ũrĩ magegania; nĩ maũndũ manene ekaga matangĩmenyeka nĩ ithuĩ.

⁶Amu nĩwe wĩraga tharunji, Itĩkĩra thĩ; mbura o nayo, rĩrĩa ĩkuura, o gwata iboboto cia mbura yake ĩrĩa nene;

⁷Agagĩkũnjaria moko ma andũ othe, nĩ getha othe mamenye nĩwe, akĩrĩ we wamombire.

⁸Hĩndĩ ĩo nyamũ nacio igathiĩ kwĩũa ciemo-inĩ, igagĩikara o imamo-inĩ ciacio.

⁹Mwena wa gũthini-rĩ, kuumaga kĩhuhũkanio, gĩgoka kiumĩte kũu nyũmba yakĩo; mwena wa gathigathini nakuo gũkoimaga heho.

¹⁰Mĩhũmũ ya Mũrungu nĩĩtũmaga kũgĩe mbarabu; maĩ, o na harĩa maaramĩire, magakĩgwatana.

¹¹O narĩo itu rĩrĩa imata nĩwe ũrĩritũhagia nĩ kũrĩiyũria ũigũ, na gũtambũrũkia agatambũrũkia itu rĩake rĩrĩa riumaga rũheni;

¹²Narĩo rĩkagarũrũo o na kũrĩa angĩrĩerekeria, matu macio mekage ũrĩa egũkĩmaatha gũkũ ũthiũ-inĩ wa thĩ kũrĩa guothe gũtũũragwo nĩ andũ,

¹³O na akorũo gĩtũmi kĩa amarehe nĩ aherithanie, kana nĩ athondeke thĩ yake, kana nĩ ũndũ wa kũiguanĩra tha.

¹⁴Ta thikĩrĩria ũhoro ũyũ, wee Ayubu: tithĩria hau, wĩcũranĩrie mawĩko ma Mũrungu ũrĩa me magegania.

¹⁵Wee nĩũũĩ ũrĩa Ngai aathaga maũndũ macio, na ũrĩa atũmaga rũheni rũa itu rĩake rũhenũke?

¹⁶Wee nĩũũĩ ũrĩa matu magiragio matugũke? wakĩmenya mwĩkĩre wa morirũ ma Ũcio mwene ũmenyi mũkinyanĩru?

¹⁷Wamenya kĩrĩa gĩtũmaga nguo ciaku ihiũhe rĩrĩa thĩ ĩkirĩte ki nĩ ũndũ wa rũhuho rũa gũthini?

¹⁸Matu-mairũ-rĩ, wee wahota gũtambũrũkia ta ũrĩa We ekĩte, o ũguo momĩte ta gĩcicio kĩa rũthuku?

¹⁹Ta gĩtũrute ũrĩa tũngĩmwĩra, amu ithuĩ tũtingĩmenya kwerekania ũhoro nĩ ũndũ wa nduma.

²⁰Hĩ! atĩ erũo ndĩ ũndũ ngwenda twarie? kaĩ kũrĩ mũndũ ũngĩkiuga amerũkio?

²¹Na rĩu andũ matingĩhota kũbara ũtheri ũcio ũcangaraire igũrũ, rĩu gũgĩũkĩte rũhuho rũkarĩenjũra.

²²Mwena wa gathigathini gũkuuma ũkengi ũhaana ta thahabu: Ngai-rĩ, riri ũrĩa e naguo ũrĩ wĩtigĩrithia mũnene.

²³Mwene-Hinya-rĩ, ithuĩ tũtingĩhota kũmũtuĩria; ũhoti wake nĩ mũnene mũno mũno, na tondũ wa ũrĩa e wa kĩhooto, o na ũthingu mũingĩ, ndarĩ hingo angĩogogana.

²⁴Tondũ ũcio andũ nĩ gwĩtigĩra mamwĩtigagĩra; we ndarũmbũragia andũ o na arĩkũ arĩa ngoro ciao ciĩonaga ta marĩ ogĩ.