Job 36

¹NINGĨ Elihu agĩtwara ũhoro na mbere, akiuga atĩrĩ,

²Ta njĩtĩkĩria hanini, nĩguo nguonie; amu kũrĩ o ciugo ndigairie cia gũcirĩrĩra Ngai nacio.

³Ngũrehe ũmenyi ngĩũrutaga kũnene, nyonanie atĩ Mũnyũmbi nĩwe wĩ na ũthingu.

⁴Amu ti-itherũ ndeto ciakwa ti cia maheni: ũyũ mwĩ nake-rĩ, nĩ mũndũ wĩ na ũmenyo mũkinyanĩru.

⁵Atĩrĩ, Mũrungu nĩ kĩhoti, na ndarĩ mũndũ airaga: nĩ mũhoti na ũhoti wa ngoro.

⁶Ndatũũragia arĩa aaganu muoyo, no nĩatuagĩra andũ arĩa athĩnie na kĩhooto.

⁷Andũ arĩa athingu-rĩ, ndarĩ hĩndĩ angĩĩhũgũra maitho ndakamone, no nĩamaikaragĩria gĩtĩ kĩa ũnene hamwe na athamaki, maikarage ho kinya tene, nao magagĩtũũgĩra.

⁸Ningĩ maakorũo marĩ ohe, magekĩrũo bĩngũ, matuĩke nĩ nga cia ũthĩnĩki imanyitĩte,

⁹Nĩ kũmonia amonagia wĩko wao ũrĩa ũtariĩ, agakĩmonia mehia mao, mamenye nĩ maũndũ ma mwĩgerero mekĩte.

¹⁰Nĩ kũhingũra ahingũraga matũ mao nĩguo mataarĩke, na akamaatha atĩ mahũndũke matigane na waganu.

¹¹Nao metĩkĩra kũigua, magĩcoke kũmũtungatagĩra-rĩ, hĩndĩ ĩo nĩ kũhingia makahingia matukũ mao o na wega, magĩte mĩaka yao marĩ o na maũndũ ma gĩkeno.

¹²Na maarega kũigua, nĩ kũninwo makaninwo na njomo, nĩ gũkua magakua matarĩ maagĩa na ũmenyi.

¹³No rĩrĩ, andũ arĩa me na ngoro cia ũthagathago matũũraga o maigĩte marakara: kũrĩra matingĩmũrĩrĩra rĩrĩa aramoha.

¹⁴Acio makuaga marĩ o anyinyi, mĩoyo yao ĩgathira ta ya arĩa methũkagia.

¹⁵Mũndũ mũthĩnĩku-rĩ, amũtharaga ũũru-inĩ na njĩra ya thĩna ũcio e naguo, agakĩmahingũra matũ na njĩra o ĩo ya kũhinyĩrĩrio.

¹⁶Ĩĩ-ni, o nawe nĩendaga akũgucĩrĩrie uume harĩa ũhatĩkĩrĩirio akuumĩrie kũndũ kwariĩ, kũrĩa gũtarĩ ũkunderu; hĩndĩ ĩo kĩrĩa ũrĩigagĩrũo metha-inĩ yaku kĩhunjage maguta.

¹⁷No rĩrĩ, wee nĩ kũiyũrũo ũiyũirũo nĩ mũcirĩre wa arĩa aaganu: no mũhaka ũnyitwo o nawe nĩ cira o na ituĩro rĩrĩa rĩa kĩhooto.

¹⁸Kĩĩmenyerere, ndũkagucĩrĩrio nĩ marũrũ ũtuĩke wa ndendwa, ningĩ-rĩ, tiga gwĩtĩkĩra kwehũka nĩ ũrĩa gĩgũkũũri gĩkũneneha.

¹⁹Ũtonga waku arĩ guo nĩũngĩkĩigana wa gũkũruta hatĩ-inĩ? o na kana nditi ciothe cia ũhoti ũcio wĩ naguo?

²⁰Tiga gũkĩhũmĩrĩra ũtukũ, nĩrĩo ihinda rĩrĩa irĩndĩ ituĩkanaga irĩ o gwacio.

²¹Ĩrĩithie, ndũkae kwerekera na waganu-inĩ, amu nĩguo wee ũthurĩte handũ ha gũthĩnĩka.

²²Atĩrĩrĩ: Mũrungu, tondũ wa ũhoti wake, nĩekaga maũndũ manene mũno: nũ ũngĩ mũrutani take?

²³Nũ ũkĩmwĩraga njĩra ĩrĩa ekũgera? ningĩ nũ ũngĩmwĩra, Wee nĩwĩkĩte wogogi?

²⁴Ririkanaga kũgathĩrĩria wĩra wake, ũrĩa wanainĩrũo nĩ andũ.

²⁵Kĩrĩndĩ gĩothe nĩgĩtũire kĩũcũthagĩrĩria; andũ-rĩ, mawĩroragĩra marĩ o kũraya.

²⁶Atĩrĩ, Mũrungu nĩ mũnene, na ithuĩ tũtimũũĩ; mĩaka yake ndĩngĩtuĩrĩka ũrĩa ĩigana.

²⁷Amu-rĩ, agucagia tũtaata twa maĩ o agĩtwambatagia, tũrĩa tũcokaga gũtuĩka mbura yumĩte thaarũ-inĩ wayo;

²⁸Ĩgagĩitĩrĩrio thĩ nĩ matu macio me igũrũ, makiuragĩria andũ o makĩmĩingĩhagia.

²⁹Nĩngarĩ kwĩ mũndũ ũngĩmenya ũrĩa matu matandayagio, kana amenye ũhoro wa marurumĩ ma hema-inĩ ĩo aikaraga?

³⁰One ũrĩa ahunjagia ũtheri wake ũkamũthiũrũrũka kũu arĩ, agacoka akaũhumbĩra na ndia iria nene cia iria!

³¹Maũndũ macio nĩ kũherithia aherithagia irĩndĩ namo, ningĩ kũheana akaheana bũthi wa irio.

³²Rũheni-rĩ, nĩethayaga moko naruo, akarũatha atĩ rũrathe o kĩrĩa rũaikĩrio.

³³Mũgambĩre waruo nĩ rũrongoro rũake ũrehage, mahiũ namo ũkamamenyithia atĩ kũrĩ kĩhuhũkanio kĩroka.