Job 35

¹NINGĨ Elihu agĩcoka o ho, akiuga atĩrĩ,

²Ũhoro ũyũ-rĩ, nĩguo wĩoneire atĩ nĩ wa kĩhooto, ũkiuga ũũ: Ũthingu wakwa nĩũkĩrĩte wa Mũrungu?

³Ningĩ ũkĩũria atĩ wagunwo na njĩra ĩrĩkũ? ningĩ atĩrĩ: Ndagwata uumithio ũrĩkũ gũkĩra rĩrĩa ingĩtũire njĩhagia?

⁴Niĩ-rĩ, nĩngũkũhũndũrĩra ũhoro, wee o hamwe na thiritũ ĩno yaku.

⁵Atĩrĩrĩ, ta cũthĩrĩria kũrĩa matu-inĩ, wone; rora igũrũ, ũrĩa rĩtũũgaraire gũgũkĩra.

⁶Kũhĩtia ũngĩtuĩka nĩũhĩtĩtie, ũkĩrĩ ũndũ wĩkĩte Ũcio? o na mehia maku mangĩkorũo me maingĩ-rĩ, nĩ ũndũ ũrĩkũ ũkĩmũhutĩtie naguo?

⁷Ningĩ ongorũo wĩ mũthingu-rĩ, kĩrĩa ũkĩmũheete nĩ kĩ? kana nĩ kĩ ekũgwata guoko-inĩ gwaku?

⁸Ũmaramari waku no mũndũ tawe ũngĩtuuria, ũthingu waku naguo no mwana wa mũndũ ũngĩguna.

⁹Andũ-rĩ, gũkaya nĩmakayaga nĩ kũhinyĩrĩrio na maũndũ maingĩ; nĩmoigaga mbu nĩ ũndũ wa guoko gwa kĩrĩ-hinya.

¹⁰No gũtirĩ ũngĩũria ũũ: E kũ Ngai Mũnyũmbi, ũrĩa ũtũmaga mũndũ aine nĩ gũkena, hĩndĩ kũrĩ ũtukũ,

¹¹O ũrĩa ũtũrutaga maũndũ kũrĩ ũrĩa arutĩte nyamũ cia werũ-inĩ, na agatũũhĩgia kũrĩ nyamũ cia igũrũ iria irĩ njoya?

¹²Gũkaya nĩmakayaga, na gũtirĩ ũngĩmetĩka, nĩ ũndũ wa mwĩtũũgĩrio wa andũ aaganu.

¹³Mũrungu-rĩ, ndarĩ hĩndĩ angĩigua ũhoro ũtarĩ wa ma, o na kũrũmbũria, Mwene-Hinya ndangĩũrũmbũria.

¹⁴Githĩ makĩria ti rĩrĩa ũkuuga atĩ wee ndũkũmuona; atĩ cira wĩ mbere yake, nawe nĩ gweterera ũmwetereire!

¹⁵No rĩu, tondũ atĩ ndarokaga o gũkinyĩria mũndũ marakara, ũgagĩtua atĩ ndarũmbũragia mũno mwĩgerero.

¹⁶Ayubu-rĩ, atumũrĩte kanua gake na ũhoro wa tũhũ; nĩaarĩtie ndeto nyingĩ itarĩ cia ũmenyo.