Job 34

¹NINGĨ Elihu agĩcoka o ho, akiuga atĩrĩ,

²Inyuĩ andũ aya ogĩ, iguai ndeto ciakwa; ndegerai matũ, inyuĩ amenyu maũndũ.

³Amu gũtũ kũroragia ciugo o ta ũrĩa karakara ĩĩcamagĩra irio.

⁴Nĩtwĩthurĩrei ũndũ ũrĩa wagĩrĩire, ũndũ ũrĩa ũkĩrĩ mwega-rĩ, ithuĩ tũkĩũmenye.

⁵Nĩ gũkorũo Ayubu oigĩte ũũ: Niĩ ndĩ mũthingu, no Mũrungu nĩ gũte ateete kĩhooto gĩakwa;

⁶O na ndatuĩka ndĩ na kĩhooto-rĩ, nduĩtwo o mũrongo; ndĩ mwĩkĩre ngurara ĩtangĩhoneka, na itarĩ ũndũ njĩhĩtie.

⁷Ĩ nĩ mũndũ ũngĩ ũrĩkũ ũhaana ta Ayubu, kũnyua ndendwa ta ũrĩa kũnyuagwo maĩ,

⁸Agagĩtuĩka wa ndundu ya arĩa eki maũndũ ma waganu, agakĩgĩa thiritũ na andũ arĩa imaramari!

⁹Nĩ amu oigĩte atĩrĩ, atĩ, Mũndũ ndangĩgunwo o na hanini nĩ kũgĩa ũiguano na Ngai.

¹⁰Tondũ ũcio, no gĩ’thikĩrĩriei, inyuĩ mwĩ na mbuguĩro: kũrogira Mũrungu angĩĩka ũndũ mwaganu! Mwene-Hinya-rĩ, kũrogira angĩĩka ũndũ wa wogogi!

¹¹Amu wĩra ũrĩa mũndũ arutĩte nĩguo akamũrĩha, atũme mũndũ o wothe agwate kĩrĩa kĩringaine na mĩthiĩre yake.

¹²Ĩĩ-ni, nĩ ma, Mũrungu ndarĩ hingo angĩĩka waganu, we Mwene-Hinya ndangĩhong’ora cira.

¹³Nũ wamũtuire mũramati amũramatagĩre thĩ? kana rĩrĩ, mabũrũri mothe, ũrĩa wamaaranirie nũ?

¹⁴Angĩkĩgarũra ngoro yake ĩmũcokerere, agĩre roho wake, mĩheeho yake ĩkĩmũhũndũkĩre-rĩ,

¹⁵Arĩa othe me mwĩrĩ no mathiranĩre o hamwe; andũ maacoka gũtuĩka o rũkũngũ.

¹⁶Akorũo wĩ mũndũ mũtaũku-rĩ, kĩigue ũhoro ũyũ; thikĩrĩria mũgambo wakwa ũrĩa nguuga.

¹⁷Atĩrĩ, mũthũũri kĩhooto-rĩ, aakĩhota gũtuĩka mwathani? Ũcio mũthingu, o Ũcio kĩhoti, githĩ wamũtua mwĩhia?

¹⁸O ũcio wĩraga mũthamaki, Wĩ mũũra-huhũ! namo makang’ũ ma bũrũri akamera, Mũrĩ aaganu!

¹⁹Na ndatĩagĩra anene maũthĩ, na ndangĩrora itonga gũkĩra arĩa ahũthũ, nĩ gũtuĩka othe no wĩra wa moko make.

²⁰Gũkua makuaga na mbũkĩrĩra, o ũtukũ gatagatĩ; andũ nĩ kũinaina mainainaga, makehuta, na arĩa ihoti magathengio o na matahutĩtio na guoko.

²¹Nĩ gũkorũo maitho make nĩ gũcũthĩrĩria macũthagĩrĩria mĩthiĩre ya mũndũ, agakĩonaga ikĩro ciake ciothe.

²²Gũtirĩ nduma, kana handũ o na hairĩte ta gĩkuũ, harĩa eki a waganu mangĩĩhitha naho.

²³Nĩ amu we ndabataragio nĩ gũcũrania ũhoro wa mũndũ makĩria, atĩ aambe akinye mbere ya Mũrungu nĩguo acirithio.

²⁴Arĩa ihoti-rĩ, amahehenjaga na ategũtinda akĩhaarana, na mathenya mao agacokia andũ angĩ.

²⁵Kwĩmenyera nĩakĩĩmenyagĩra ũrĩa mekaga, agakĩmang’aũra ũtukũ, magathuthurĩka.

²⁶Amaringaga ta ũrĩa aringaga arĩa imaramari, o harĩa mekuonerũo wega nĩ andũ arĩa angĩ;

²⁷Nĩ ũndũ nĩ kwehũka mehũkire magĩtiga kũmũrũmĩrĩra, magĩkĩrega kũrũmbũria njĩra ciake o na ĩrĩkũ;

²⁸Magĩgĩtũma akinyĩrĩrũo nĩ mũkayo wa andũ arĩa ahũthũ, akĩigua gũkaya kwa arĩa maathĩnagio.

²⁹We rĩrĩa arehete ũhoreri-rĩ, nũ ũngĩhota kũmũtua mwĩhia? ningĩ ehitha ũthiũ, nũ ũngĩkĩhota kũmuona? o na gwatuĩka nĩ rũrĩrĩ rũĩkĩtwo ũguo, kana mũndũ, o ũndũ ũmwe:

³⁰Nĩ getha mũndũ gĩthagathago ndagatũũre athamakaga, gũtigakĩgĩe mũndũ ũngĩgwatia kĩrĩndĩ na mũtego.

³¹Mũrungu-rĩ, gũkĩrĩ mũndũ wanamwĩra ũũ, ’Herithĩtio, na hatarĩ ũũru njĩkĩte:

³²Ũndũ ũrĩa itoine, kĩnyonererie arĩ wee; korũo kwĩ wogogi ndĩ naguo, ndigacokera?

³³Irĩhi rĩake githĩ no rĩtuwo ta ũrĩa wee ũkwenda, tondũ ũrarĩrega? hau-rĩ, nowe ũngĩthura, ti niĩ: no kĩarie uuge ũrĩa ũkũmenya.

³⁴Andũ arĩa me na mbuguĩro-rĩ, ũrĩa mangĩnjĩra, o mũndũ ũrĩa mũũgĩ ũkũigua ngĩaria, no atĩrĩ,

³⁵Atĩ Ayubu aarĩtie ta atarĩ na ũmenyi, na ũhoro wake ũkaaga ũgerekereri.

³⁶Na arĩ korũo Ayubu aatũũra ageragio o nginya gĩturi, nĩ ũndũ wa ũrĩa acoketie ũhoro ta andũ arĩa aaganu!

³⁷Tondũ nĩonganĩrĩirie ũhĩtia wake na ũremi; ahũrĩte hĩ o haha tũrĩ, na akaingĩhia ciugo ciake cia kũng’athĩria Mũrungu.