Job 33

¹No rĩrĩ, wee Ayubu, ta igua ndeto ici ciakwa, ũhoro wakwa wothe ũũthikĩrĩrie.

²One, kanua gakwa rĩu nĩndagatumũra; rũrĩmĩ rũakwa rũrĩ kwaria, rũrũ rũa kanua gakwa.

³Ciugo ciakwa nĩikũheana ũhoro mwerekereru o ũrĩa wa ngoro yakwa, mĩromo yakwa yuge ũmenyi wayo hatarĩ na kohinga.

⁴Nĩ roho wa Mũrungu wanyũmbire, mĩheeho ya Mwene-Hinya nĩyo ĩndũũragia muoyo.

⁵Akorũo nĩũkũhota-rĩ, kĩ’hũndũrĩre ũhoro, ta haarĩria ciugo ciaku ũrĩ haha mbere yakwa, ũkiumĩre.

⁶Atĩrĩ, mbere ya Mũrungu niĩ ndariĩ o tawe; o na niĩ nĩ kũũmbwo ndombirũo na rĩũmba.

⁷Itebebia rĩakwa-rĩ, rĩtingĩgũtua nda ũritũ wakwa ndũngĩkũhihinya.

⁸Nĩ ma, nĩwarĩtie o ngĩiguaga na matũ, ngakĩigua mũgambo waku ũkiuga atĩrĩ:

⁹Niĩ ndĩ mũtheru, ndirĩ na mehia; niĩ ndirĩ ũũru njĩkĩte, thĩinĩ wakwa waganu gũtirĩ;

¹⁰Nĩ rĩ’, We nĩ gũ’thigana a’thiganaga, nĩ kũndua anduĩte thũ yake;

¹¹Nĩanjohereire ndungu magũrũ, na nĩandĩithagia ikĩro ciakwa ciothe.

¹²Atĩrĩrĩ, nĩngũgũcokeria ũhoro: ũkiuga ũguo-rĩ, ndũrĩ na kĩhooto, nĩ gũkorũo Ngai nĩ mũnene kũrĩ andũ.

¹³Ũrakĩgiana nake nĩkĩ nĩ ũndũ atĩ maũndũ make o na ũmwe ndaheanaga gĩtũmi kĩaguo?

¹⁴Amu kwaria, Mũrungu nĩaaragia rĩmwe, ĩĩ-ni, o na rĩa kerĩ, andũ mangĩaga kũrũmbũria.

¹⁵Nĩ kĩroto-inĩ, kĩoneki-inĩ gĩa ũtukũ, andũ maagwatwo nĩ toro mũnene, hĩndĩ ĩrĩa makomete ũrĩrĩ,

¹⁶Nĩrĩo ahingũraga andũ matũ, na ũtaaro ũrĩa maataarũo akawĩkĩra rũũri,

¹⁷Nĩ getha atigithie mũndũ rĩĩthugunda rĩrĩa ethugundĩte, na athiĩkĩrĩrie mũndũ mwĩtĩo, atigane naguo;

¹⁸Agakĩriĩrana roho wake na irima, akagiria muoyo wake ũkaninwo na njomo.

¹⁹Hĩndĩ ĩngĩ mũndũ akaherithio na ruo arĩ ũrĩrĩ, agaikara o agĩatagio nĩ mahĩndĩ matangĩtigithĩria,

²⁰O kinya ngoro yake ĩgathũũra irio, roho wake ũgagĩthũũra o na kandũ karĩa ga ũthuro.

²¹Nyama cia mwĩrĩ wake nĩihwererekagĩra, ikaya gũthira, na mahĩndĩ make marĩa mataronagwo makoimĩra.

²²Ĩĩ-ni, roho wake ũkaya gũkuhĩhĩria irima, muoyo wake ũgagĩthengerera harĩ arĩa maninanaga.

²³Gwakorũo kũrĩ mũraika arekeirio, mũtaũranĩri, ũmwe wa arĩa ngiri, wa kuonia mũndũ ũrũngĩrĩru ũrĩa ũmwagĩrĩire-rĩ,

²⁴Hĩndĩ ĩo akamũkinyĩria wega wake, akoiga, Ũyũ nĩohorũo nga ndagatuĩke wa kũharũrũka irima; nĩnyonete kĩmũkũũri.

²⁵Hĩndĩ ĩo nyama cia mwĩrĩ wake igagĩĩthĩha kũrĩ cia mwana, agagĩcokererũo nĩ matukũ make marĩa ma ũnyinyi:

²⁶Ahoyaga Ngai, nake agatuĩka wa kũmũiguĩra wega; ũthiũ wa Ngai aawĩrorera, nĩ gũkena akenaga: nake-rĩ, agatũma mũndũ ta ũcio acokwo nĩ ũthingu wake.

²⁷Nĩ kũina ainaga e mbere ya andũ arĩa angĩ, akoiga atĩrĩ, Niĩ nĩndahĩtirie, ũhoro ũrĩa mwerekereru-rĩ, ngĩwagania; na ũũru ũcio ndiigana kũwĩrĩhĩrio.

²⁸Nĩ gũkũũra akũũrĩte roho wakwa ndũgatonye irima, muoyo wakwa ũgĩtũũre o wonaga ũtheri.

²⁹One, maũndũ macio mothe Mũrungu nĩekaga; kerĩ, o na gatatũ, ageka mũndũ ũguo,

³⁰Nĩguo ahũndũre roho wake uume irima-inĩ, atheragĩrũo nĩ ũtheri ũrĩa wonagwo nĩ arĩa me muoyo.

³¹Thikagĩrĩria, wee Ayubu, ũkaigua ũhoro wakwa; wĩkirĩre, niĩ njaragie.

³²Akorũo wĩ na ũndũ wa kuuga, njokeria. Aria, amu ũrĩa ngwenda no gũtuĩke atĩ wĩ mũthingu.

³³Na akorũo ndũrĩ naguo, no gĩ’thikĩrĩrie; wee ĩĩkirĩre, niĩ ngũrute ũũgĩ.