Job 9

¹HĨNDĨ ĩo Ayubu agĩcokia akiuga atĩrĩ,

²Ti-itherũ nĩnjũĩ atĩ ũhoro ũcio noguo: no rĩrĩ, mũndũ angĩkĩhota atĩa gũtuĩka wa kĩhooto harĩ Mũrungu?

³Angĩenda kũgariũranĩra ũhoro nake, ndangĩhota kũmũcokeria kĩũria o na kĩmwe gĩa ciũria ngiri.

⁴Ngoro yake ĩĩ na ũũgĩ-ũrĩa-wa-ma, o na e na hinya mũno: nũ wanakĩmũũmĩra na agĩikara ahoroheirũo?

⁵Akĩrĩ we ũrĩa ũthengagia irĩma, na itingĩkorũo ikĩmenya agĩciturũra nĩ ũrĩa arakaire;

⁶Na nowe ũthukathukaga thĩ ĩkoima handũ hayo, itugĩ ciayo igakĩinaina;

⁷Na nowe wathaga riũa, rĩgatĩra kũratha, nacio njata agathinga itigathere;

⁸Na nowe watambũrũkirie igũrũ arĩ o wiki, na agathiaga agĩkinyaga makũmbĩ ma iria na makinya;

⁹Ningĩ nowe mũũmbi wa njata iria ciĩtagwo Nduba, na Karau, o na Kĩrĩmĩra, o na icungo cia igũrũ iria irĩ mwena wa gũthini;

¹⁰Arĩ we mwĩki maũndũ manene matangĩtuĩrĩka, o maũndũ me magegania matangĩtarĩka.

¹¹Atĩrĩ, ahĩtũkagĩra o haha ndĩ, na ndingĩmuona, agathiĩ na mbere akabuĩria, na niĩ ndimenye.

¹²Kwĩnyitĩra nĩenyitagĩra: nũ ũngĩhota kũmũgiria? nũ ũngĩkĩmũũria, Nĩ atĩa ũreka?

¹³Ngai-rĩ, ndangĩcokacokia marakara make; arĩa mateithagia Rahabu no mainamĩrĩire thĩ harĩ we.

¹⁴Makĩria githĩ ti niĩ itangĩhota kũmũcokeria ũhoro, ngĩthure ciugo cia gũcokanĩria nake?

¹⁵O na ingĩtuĩka ndĩ na kĩhooto, niĩ ndingĩmũcokeria, no gũthaitha ingĩthaitha ũcio mũnjirithia.

¹⁶O na ingĩkorũo ndĩmwĩtĩte, nake akanjĩtĩka, o narĩo ndingĩĩtĩkia atĩ aathikĩrĩria mũgambo wakwa.

¹⁷Amu no kũnyuna anyunangaga na kĩhuhũkanio, akĩingĩhagia nguraro ciakwa tũhũ.

¹⁸Ndarekaga ’hũmũke, no kũiyũria anjiyũragia ũcũngũ.

¹⁹Korũo nĩ ũhoro wa hinya wa makarau ngwaria, no oige, Niĩ ũyũ! korũo nĩ cira, atĩ tũcire, no orie, Nũ ũngĩndua gĩathĩ?

²⁰O na ndatuĩka ndĩ na kĩhooto, kanua gakwa mwene no kandue mwĩhia; o na ndatuĩka ndĩ mũndũ ũtarĩ ũcuke, no onanie atĩ ndĩ mũremi.

²¹O na rĩu ndirĩ hĩndĩ itarĩ mwagu-ũcuke! niĩ-rĩ, ndikwĩrĩrĩra; muoyo wakwa nĩ gũtirika ndĩũtirikĩte.

²²Ũhoro no ũmwe; tondũ ũcio nĩngiugĩte atĩrĩ, Aninaga arĩa aagu-ũcuke o na arĩa aaganu o ũndũ ũmwe.

²³Korũo nĩ mũmitĩko ũhobanĩirie andũ ũkamamitũra-rĩ, we no athekerere arĩa matarĩ na wĩhia nĩ ũguo marakĩgerio.

²⁴Thĩ nĩ kũrekererio ĩrekereirio moko-inĩ ma andũ arĩa aaganu; atua-cira arĩa me kuo nĩamahumbĩte mothiũ: aagĩkorũo tiwe, nũ?

²⁵Matukũ makwa nĩmarathira na ihenya rĩkĩrĩte rĩa mũkinyia-wa-ũhoro; no kũhuhũka mahuhũkaga; matirĩ mũnyaka wonekaga.

²⁶Mabuĩragia magathiĩ, ta tũmacua tũrĩa tũhiũhi mũno, kana ta hũngũ ĩgĩcuhũkĩra ndĩa yayo.

²⁷Ndoiga, Nĩngwĩriganĩria kĩeha kĩrĩa ndĩ nakĩo, nĩngũgĩtiga gũtuka gĩthiithi, ngenyũke

²⁸Ndoiga ũguo-rĩ, ngagĩĩtigĩra mathĩna maya ndĩ namo; nĩnjũĩ ndũriuga atĩ ndiĩhĩtie.

²⁹Ndirĩ hĩndĩ itarĩtuwo o mwĩhia; ngũkĩĩnogia tũhũ nĩ ũndũ kĩ?

³⁰O na ingĩĩthamba na maĩ ma tharunji, na moko makwa ndĩmatherie o mũno mũno,

³¹Wee ndũrĩ hingo ũtangĩndikia gĩcoro-inĩ, nguo ciakwa mwene i’nyire.

³²Amu-rĩ, we to mũndũ ta niĩ, atĩ ndahota kũmũhũndũrĩra ũhoro, tũrokanĩre tũcire tũteithũranwo.

³³Gũtirĩ wa gũtũtuithania, atĩ atũigĩrĩre guoko gwake ithuerĩ.

³⁴Ta nĩanjehererie rũthanju rũake, itebebia rĩake rĩgĩtige kũndua nda:

³⁵Hĩndĩ ĩo ndakĩaria, na itekũmwĩtigĩra; nĩ amu ngoro-inĩ yakwa ti ũguo ndariĩ.