Job 10

¹Ngoro yakwa nĩĩgĩĩte na kĩnyiria nĩ gũtũũra muoyo: nĩngwĩtetera itekwĩrigĩrĩria; ngwaria nĩ ũrĩa ngoro yakwa ĩĩ na ũcũngũ.

²Ngwĩra Ngai atĩrĩ, Tiga gũkĩndua mwĩhia; nyonia ũndũ ũrĩa ũrandũithĩria.

³Githĩ wona arĩ wega ũhinyanĩrĩrie, ũrurũke wĩra wa moko maku, nakĩo kĩrĩko kĩa andũ arĩa aaganu ũkĩmũrĩkĩre?

⁴Anga maitho maku no ta ma mwĩrĩ, kana muonere waku anga ũkĩrĩ ta wa mũndũ?

⁵Anga matukũ maku namo no ta ma mũndũ, mĩaka yaku anga no ta matukũ ma andũ,

⁶Tondũ ũrakĩũrĩrĩria waganu wakwa, na ũgatuĩria ũrĩa ’hĩtĩtie?

⁷Na no ũkĩũĩ ndirĩ mwaganu, ningĩ gũtirĩ ũngĩhota gũteithũra mũndũ guoko-inĩ gwaku.

⁸Moko maku nomo maangũmbanirie, ũgĩkĩnyũmba ũkĩndũngania mbarĩ ciothe; ningĩ rĩu ũgacoka kũnyananga.

⁹Ta no kĩririkane atĩ wanyũmbire ta rĩũmba: ningĩ nĩũcoke ũndue o rũkũngũ?

¹⁰Anga ndwanyonoririe ta iria, ũgĩcoka ũkĩ’matia ta makindi marĩo?

¹¹Wa’humbĩrire na rũũa na nyama, na ũkĩndathĩkania na mahĩndĩ na mĩkiha.

¹²Wanjĩtĩkĩririe kũgĩa na muoyo, na gũtuga ũkandugaga, naguo ũmenyereri waku noguo ũtũirie roho wakwa.

¹³No rĩrĩ, maũndũ maya-rĩ, ũgĩkorũo o ũmahithĩte ngoro-inĩ yaku; nĩnjũĩ atĩ ũhoro ũyũ ũtũire o naguo.

¹⁴Ndahĩtia, nĩũnjĩkagĩra rũũri, na ndũngĩnjohora ũtige kũnjũria waganu wakwa.

¹⁵Ndakĩagana-rĩ, kaĩ ndĩ na mũtino mũnene-ĩ! na ndatuĩka mũthingu, o narĩo ndingĩinamũra mũtwe, nĩ ũrĩa ’nyararĩkĩte o ngĩonaga mĩtandiũko ĩno ndĩ nayo.

¹⁶Na mũtwe wakwa wetiira-rĩ, wee ũgakĩnguĩma ta mũrũthi, ũkanjĩka o rĩngĩ maũndũ ma kũgegania.

¹⁷Nĩ gwĩthĩhia wĩthĩhagia aira aku a kũnyumbũra, o ũkĩngĩragĩrĩria mang’ũrĩka maku; ngakĩharũkagĩrũo nĩ ita o igĩkũũranaga na ingĩ.

¹⁸Nĩ ũndũ ũrĩkũ wagĩtũmire ũndute ihu-inĩ? nĩ gũtuĩkana ingĩatuĩkanire, na ndionwo nĩ maitho ma mũndũ o na ũmwe:

¹⁹Ingĩatuĩkĩte ta itarĩ ndagĩa; no gũkuuo ingĩakuuirũo ndwarũo mbĩrĩra-inĩ o ndoima ihu-inĩ.

²⁰Matukũ makwa githĩ to manyinyi? No gĩtige; tigana na niĩ, nĩguo ngenyũke hanini,

²¹Itanathiĩ kũndũ kũrĩa itagacoka kuuma, bũrũri ũrĩ nduma, gwata ĩrĩa nene ya gĩkuũ;

²²Nĩguo bũrũri ũrĩa wĩ nduma ndumanu, no ta nduma yo nyene; ũrĩa ũtũũraga o nduma ya gĩkuũ, ũkaaga ũndũ o na ũrĩkũ mũhaarĩrie, na ũtheri wakuo ũhaananaga o na nduma.