Job 11

¹HĨNDĨ ĩo Zofaru, ũrĩa Mũnaamathi, agĩcokia akĩũria atĩrĩ,

²Ũingĩ wa ciugo-rĩ, githĩ ndũngĩgĩcokeka? nake mũndũ ũiyũirũo nĩ ndeto no atuĩke mũhootu?

³Andũ no mekirĩre nĩ ũndũ wa mwĩraho ũcio wĩ naguo? wakĩaria ũhoro wa kĩnyarari-rĩ, githĩ ndũrĩ mũndũ ũngĩgũconorithia?

⁴Amu wee, ũrĩa ũkuuga, nĩ ũũ: Ũhoro wakwa nĩ ũrĩa mũkembu, o na niĩ ndĩ mũtheru maitho-inĩ maku.

⁵Na arĩ korũo Ngai aaria arĩ we, atumũre mĩromo yake agũtarũre!

⁶Na acoke akuonie maũndũ marĩa ma hitho ma ũũgĩ-ũrĩa-wa-ma, nĩ gũkorũo ũũgĩ ũrĩa mũkinyanĩru nĩ wa mĩtunda mĩingĩ! Wamenya atĩ Ngai akũrĩhĩtie irĩhi inyinyi gũkĩra ũrĩa waganu waku wagĩgĩirũo.

⁷Githĩ wee wahota gũtuĩria maũndũ marĩa marikĩru ma Ngai? Mwene-Hinya-rĩ, maũndũ make wee wahinyia o kũmahinyia?

⁸Ũhoro wake ũtũũgĩire ta igũrũ; wee nĩ atĩa ũngĩĩĩkĩra? kũrika ũrikĩte gũkĩra kwa-ngoma; wee nĩ ũndũ ũrĩkũ ũngĩĩmenyera?

⁹Mũigana waguo nĩ mũraya kũrĩ thĩ, na ũkaarama kũrĩ iria rĩrĩa inene.

¹⁰Aatua kũhungurĩra harĩ andũ akĩmahingagĩra kĩoho-inĩ, na etanĩre cira-rĩ, nũ ũngĩkĩhota kũmũgiria?

¹¹Amu andũ arĩa a tũhũ, we nĩamoĩ; waganu no akĩwonaga, o na atawĩcũranĩirie.

¹²No andũ-rĩ, amu nĩ ibĩgĩ o ũguo, nĩ kwaga maagĩte meciria; ĩĩ-ni, mũndũ aciaragwo atariĩ ta gĩcaũ kĩa ndigiri ya gĩthaka.

¹³Wee-rĩ, ũngĩerekereria ngoro yaku wega, na ũmwarĩre moko ũmũhoe,

¹⁴Na gwakorũo guoko gwaku nĩgũkumbatĩirie ũndũ mwaganu, ũũthengie hanene, na ndũreke ũgenyũ ũtũũre hema-inĩ ciaku;

¹⁵Ũngĩĩka ũguo-rĩ, no ũtiire ũthiũ waku ũtarĩ na kaũũgũ, ĩĩ-ni, no wĩkindĩre, na ũtige gwĩtigĩra.

¹⁶Kĩnyamaro gĩkĩ wĩ nakĩo nĩ kũriganĩrũo ũngĩriganĩrũo nĩkĩo; wakĩririkana, no gũtuĩke ta ũrĩa mũiyũro wa maĩ ũririkanagwo ũrĩkĩtie kũhĩtũka.

¹⁷Mũtũũrĩre waku ũngĩtheraga gũkĩra mũthenya barigici, o na kũngĩgĩa nduma, yatuĩka ta ũtheri wa kĩroko.

¹⁸Watũũra o na mwĩhoko nĩ ũndũ ũkĩrĩ na kĩĩrĩgĩrĩro; ũngĩng’etangagia ũrĩa gũtariĩ, ũgĩcokaga kũhurũka na mwĩgangaro.

¹⁹O na gũkoma ũngĩkomaga, gũtarĩ ũngĩkũiguithia guoya; ĩĩ-ni, o na nĩ andũ aingĩ mangĩĩendagĩrĩria harĩ wee.

²⁰Ĩndĩ andũ arĩa aaganu-rĩ, maitho mao no mamicĩrĩre, nao nĩ kwaga makaaga harĩa mangĩangĩra; ũndũ ũrĩa makerĩgĩrĩra no kuumwo nĩ muoyo.