Job 12

¹HĨNDĨ ĩo Ayubu agĩcokia ũhoro akiuga,

²Kaĩ no kwĩrũo nĩ inyuĩ kĩrĩndĩ inyuiki-ĩ! ũũgĩ-ũrĩa-wa-ma ũgathiranĩra na inyuĩ o rĩrĩa mũgakua!

³No rĩrĩ, niĩ na niĩ ndĩ na meciria o ta inyuĩ; niĩ ti atĩ ndĩ kĩrimũ kũrĩ inyuĩ: maũndũ ta macio nũ ũtamoĩ?

⁴Niĩ-rĩ, nĩ kũhaana ’haanĩte ta ũrĩa ũtuĩkĩte itheko harĩ andũ a kwao, o niĩ mũndũ wathathayagia Ngai, nake akamwamũkĩria; mũndũ mũthingu, o ũrĩa ũtarĩ ũcuke-rĩ, agagĩtuĩka itheko rĩa gũthekagĩrĩrũo.

⁵Ũrĩa ũtũire earaganĩtie-rĩ, we agĩĩciria, mũtino wene nĩ kũũraria aũraragia; kĩrario kĩu gĩtũũraga kĩĩhaarĩrĩirie arĩa magũrũ mao matirũkaga.

⁶Hema cia atunyani nĩcio ciikaraga igaacĩire; andũ arĩa marakaragia Mũrungu-rĩ, nĩo maikaraga na mwĩhoko; moko-inĩ mao Ngai nĩaitagĩrĩra indo.

⁷Ta no kĩũrie nyamũ, nacio ikũrute ũhoro; kĩũrie nyoni cia rĩera-inĩ, o nacio nĩigũkwĩra.

⁸Kana ũkĩarĩrie thĩ, nayo nĩĩgũkũruta; o gwata ciũngũyũ cia iria-inĩ nĩigũkuumbũrĩra.

⁹Indo icio ciothe-rĩ, nĩ kĩrĩkũ gĩtoĩ atĩ nĩ guoko kwa Jehova gwĩkaga ũguo?

¹⁰Nake, muoyo wa kĩndũ gĩothe gĩtũũraga ũrĩ o rũhĩ-inĩ rũake, o gwata mĩheehũ ya mĩĩrĩ ya andũ othe.

¹¹Githĩ gũtũ gũtiroragia ciugo o ta ũrĩa karakara ĩĩcamagĩra irio?

¹²Ũũgĩ, atĩ, wĩ na athuri arĩa akũrũ, na kũraihia matukũ nĩkuo kwene ũtaũku.

¹³Atĩrĩrĩ, ũũgĩ o na ũhoti, mwene cio nĩ Ũcio; ũtaaro o na ũtaũku-rĩ, nĩwe wĩ nacio.

¹⁴We nĩamomoraga, gũkarema gũcoka gwakĩka; ahingagĩra mũndũ, na kũmũhingũrĩra gũtingĩhoteka.

¹⁵We-rĩ, nĩarigagĩrĩria maĩ, namo makahũa; rĩrĩ rĩngĩ akamatũma, magagĩtugũrania thĩ.

¹⁶Nĩwe mwene hinya o na mũhingia wa maũndũ; mũhenio na mũhenania, erĩ no ake.

¹⁷Ene-kĩrĩra, amatwaraga agathiĩ nao marĩ acume, na atui-cira nĩatũmaga matuĩke irimũ.

¹⁸Wohani wa athamaki nĩaũregerũraga, nao ene akamoha njohero na mũkwa.

¹⁹Athĩnjĩri-Ngai o nao, amatwaraga agathiĩ nao marĩ acume, na akang’aũra andũ arĩa njamba.

²⁰Andũ arĩa mehokeirũo ũciri, nĩaagaagagia mĩario yao, na athuri akamatunya ũthurania.

²¹Anene-rĩ, nĩ kũmaagithia amaagithagia bata, na nĩaregeragia ndoho cia andũ arĩa me hinya.

²²Aguũragia maũndũ marĩa marikĩru akamaruta nduma-inĩ, gwata nduma ĩrĩa nene ta ya gĩkuũ akamiumĩria ũtheri-inĩ.

²³Nĩwe ũnenehagia ndũrĩrĩ, agacoka akainina; atũmaga ndũrĩrĩ ithegee, na agacoka agacitwara ũkombo-inĩ.

²⁴Atongoria a irĩndĩ cia thĩ, nĩamaagaagagia meciria, agatũma matororage baraganya-inĩ, o kũrĩa gũtarĩ njĩra;

²⁵Magatũũra mahambatangaga nduma-inĩ matarĩ ũtheri mangĩona, agagĩtũma matũgũgage ta mũndũ mũrĩu.