Job 13

¹Atĩrĩrĩ, maũndũ macio mothe riitho rĩakwa nĩrĩmonete, gũtũ gwakwa nĩkũmaiguĩte na gũgataũkĩrũo nĩmo.

²Ũrĩa inyuĩ mũũĩ, o na niĩ nĩndĩũũĩ: niĩ ti atĩ ndĩ kĩrimũ kũrĩ inyuĩ.

³No niĩ-rĩ, ndenda njarie na Mwene-Hinya, Mũrungu nĩwe ngwĩrirĩria tũcire nake.

⁴Inyuĩ-rĩ, mũrĩ athondeki ndeto cia maheni, inyuothe mũrĩ o ahuhi-aimbia.

⁵Na arĩ korũo mwetĩkĩra gũkira ki! ũguo watuĩka ũũgĩ harĩ inyuĩ.

⁶Rĩu iguai ihooto ciakwa, thikĩrĩriai ndeteri ici cia mĩromo yakwa.

⁷Nĩ Mũrungu mũracirĩrĩra na wogogi? na nĩ ũndũ wake mũraaria ũrĩa-ma?

⁸Nĩ kũmũtĩa mũmũtĩĩire maũthĩ? nĩ Mũrungu mwendete kũrũĩrĩra?

⁹Angĩkĩmũtuĩria-rĩ, ũguo watuĩka wega? kana nĩmũngĩmũhenia, ta ũrĩa mũndũ ahenagia ũrĩa ũngĩ?

¹⁰We ndarĩ hingo atarĩmũkũma, mwatuĩka a gũtĩanĩra maũthĩ na hitho.

¹¹Githĩ ũtũũgĩru wake ndũngĩgĩtũma mũmake, na mũgũĩrũo nĩ guoya nĩ ũndũ wake?

¹²Mĩgambo ĩo yanyu ya ũcamba nĩ thimo hũthũ o ta mũhu, ihooto cianyu no ta mĩĩgito ya rĩũmba.

¹³Ta ĩkirĩrei, mũndige, niĩ ndĩĩarĩrĩrie, o ũrĩa ndĩĩkĩona, nyone!

¹⁴No kwĩrĩa ngwĩrĩa mwĩrĩ wakwa na magego, ngũkĩanĩka muoyo wakwa na hĩ.

¹⁵Kũnjũraga nĩekũnjũraga; ndirĩ ũndũ ũngĩ njetereire; no ndirĩ hingo itegũtiirĩrĩra ikĩro ciakwa ndĩ o harĩ we.

¹⁶Ũndũ ũyũ naguo nĩguo ũgũtuĩka wa gũtũma ’honoke, atĩ gũtirĩ gĩthagathago kĩngĩkinya mbere yake.

¹⁷Ta gĩthikĩrĩriei ũhoro wakwa wega, ũguo nguuga-rĩ, ta nĩũtonye matũ manyu.

¹⁸Cira wakwa nĩndĩũthuranĩire; nĩnjũĩ atĩ ngũkorũo ndĩ o wa kĩhooto.

¹⁹Nũ ũngĩhota kũngararia? korũo nĩkũrĩ, no gũtumia ngũgĩtumia, nduĩkane.

²⁰No rĩrĩ, ndigithia o maũndũ maya merĩ, na ndigũkĩĩhitha ũthiũ waku:

²¹Atĩrĩ, guoko gwaku, kweherie haraya na niĩ, narĩo itebebia rĩaku, reke rĩtige kũndua nda.

²²Hĩndĩ ĩo no gĩĩtane, na nĩngwĩtĩka; kana ũreke niĩ njarie, nawe ũnjokerie.

²³Nĩ rĩrĩ, mawaganu makwa, na mahĩtia, nĩ maigana? wĩhia wakwa, o gwata ũhĩtia-rĩ, kĩ’menyithie.

²⁴Wĩhithĩte ũthiũ nĩ ũndũ kĩ, ũgakĩndua thũ yaku?

²⁵Nĩũngĩgariũrana na ithangũ rĩragũrũkio nĩ rũhuho? nĩũngĩthingatana na maragara?

²⁶Amu nĩ maũndũ marũrũ wandĩkĩte nĩ ũndũ wakwa, ũgakĩngaĩra igai rĩa mawaganu ndekire rĩrĩa ndarĩ mũnyinyi;

²⁷Na nĩũnjohereire ndungu cia mĩtĩ magũrũ, na ũkandĩithagia ikĩro ciakwa ciothe; ũkururĩte mũkururo ũgathiũrũrũkĩria makinya ma magũrũ makwa,

²⁸Niĩ mũndũ ũtuĩkĩte ta kĩndũ kĩoru, kĩrĩa kĩrathirĩrĩkĩra, akahaana ta nguo ndĩĩku nĩ tũgunyũ.