Job 14

¹Mũndũ mũciare nĩ mũndũ mũka-rĩ, aikaraga o matukũ manyinyi, namo makaiyũra mĩtangĩko.

²Atumũkaga ta kĩro, agacoka agatuwo; ahĩtũkaga na ihenya ta kĩĩruru, na ndangĩkindĩria.

³Nawe githĩ mũndũ ta ũcio wamũkũũrĩra maitho; nĩ mũndũ ta niĩ ũngĩtwara cira-inĩ atĩ tũcire nawe?

⁴Nũ ũngĩkĩhota kũruta kĩndũ gĩtheru thĩinĩ wa kĩrĩa kĩĩ gĩko? gũtirĩ o na ũmwe ũngĩhota.

⁵Kuona atĩ matukũ ma mũndũ nĩ matare, na mũigana wa mĩeri yake wee ũrĩ o naguo, ũgagĩkorũo nĩũmũtuĩrĩire mĩhaka ĩrĩa atangĩagarara-rĩ,

⁶Mũhũgũkĩre, ũgĩtige kũmũbara, nĩguo ahorohe agĩkarĩkia mũthenya wake ta mũthũkũmi.

⁷Amu mũtĩ-rĩ, nĩwĩrĩgagĩrĩrũo atĩ watemwo nĩũgacoka gũthundũra, na atĩ mathethũka maguo matingĩaga.

⁸O na mũri waguo wakũrĩra thĩ, na gĩthukĩ kĩaguo gĩatumbũkĩra tĩri-inĩ,

⁹Tondũ wa mũrukĩ wa maĩ-rĩ, nĩũgathethũka, na ũmerie honge o ta mũtĩ wa mũmerano.

¹⁰No mũndũ-rĩ, akuaga agathirĩrĩkĩra; mũndũ-rĩ, aarĩkia gũtuĩkana, hĩndĩ ĩo agĩaga kũ?

¹¹O ta ũrĩa maĩ mahũaga magathira iria-inĩ, na ta ũrĩa rũũĩ rũhũagĩrĩra rũkang’ara,

¹²No taguo mũndũ akomaga thĩ atarĩcoka gũũkĩra: nginya o rĩrĩa igũrũ rĩkarindũka, o matirĩ hingo makahindũka, kana maramũkio moimwo nĩ toro.

¹³Na arĩ korũo nĩ kũ’hitha wetĩkĩra kũ’hitha kwa ngoma, ũtũũre ũnjigĩte hitho-inĩ, ũgĩgathirũo nĩ marakara! korũo wetĩkĩra kũndua gĩathĩ, ũgacoka kũndirikana rĩo!

¹⁴Mũndũ aakua-rĩ, nĩkũngĩhoteka acoke muoyo rĩngĩ? niĩ ndeterera matukũ makwa mothe ma gũtũũra ita-inĩ, o nginya hingo yakwa ya kwaũrũo ĩkinye.

¹⁵Hĩndĩ ĩo wetana, na niĩ ndagwĩtĩka; nĩ kwĩrirĩria ũngĩkorũo ũkĩĩrirĩria wĩra ũyũ wa moko maku.

¹⁶No rĩu nĩ gũtara ũtaraga makinya makwa; ũhĩtia wakwa anga to kũrĩithia ũrĩĩthanagia naguo?

¹⁷Wĩhia wakwa nĩ mũtonyie mondo, nayo ĩkohwo ĩkaihũrĩrĩrũo mũhũri; waganu wakwa, wee nĩ kũũhingĩra ũũhingiĩre.

¹⁸No rĩrĩ, o na kĩrĩma gĩkĩharaharũrũka nĩgĩthirathiraga, ndũmba ya ihiga nayo nĩĩgũũkaga.

¹⁹Maĩ nĩmathiragia mahiga; mũiyũro wamo nĩũikũrũkagia tĩri wa thĩ: o nawe-rĩ, nĩ kũnina ũninaga kĩĩrĩgĩrĩro kĩa andũ.

²⁰Mũndũ nĩ gũtoria ũmũtoragia tene na tene, agethiĩra; ũgarũraga gĩthiithi gĩake ũrĩa kĩhaana, ũkamwĩra athiĩ.

²¹Ariũ ake macokaga gũtuĩka a gũtĩwo, na ndakoragwo oĩ; kana makanyihĩrĩrio, nowe ndangĩmenya ũrĩa marona.

²²No gũtuurũo atuuragwo nĩ mwĩrĩ wake mwene, nayo ngoro yake mwene ĩgatũũra o ĩrĩraga.