Job 15

¹HĨNDĨ ĩo Elifazu, ũrĩa Mũtemani, agĩcokia akĩũria atĩrĩ,

²Mũndũ mũũgĩ-rĩ, nĩangĩgĩcokia ũhoro na ũmenyi ũtariĩ ta rũhuho? nĩangĩiyũria nda yake rũhuho ruumĩte na irathĩro?

³Nĩangĩgĩcira akiugaga mohoro matarĩ kĩguni, kana mĩgambo ĩtarĩ na wega ĩngĩrehe?

⁴Wee-rĩ, nĩ andũ ũraninĩra guoya, na ũkagiria maikare na wĩkĩrĩri ũrĩa wagĩrĩire harĩ Mũrungu.

⁵Kanua gaku, nĩ waganu waku ũragataara, na nĩ rũrĩmĩ rũa mũndũ mwara wĩthurĩire.

⁶Kanua gaku mwene nĩko karagũtua mwĩhia, ti niĩ; mĩromo yaku, wee mwene, nĩyo ĩrakuumbũra.

⁷Wee nĩwe mũndũ ũrĩa waambire gũciarũo? kana nĩ gũkonorũo wagĩkonorirũo o gũtaanagĩa irĩma?

⁸Wee anga ũrĩ mũthikĩrĩria wa ndundu ya Ngai? ũũgĩ nĩwe wĩrigĩirie naguo?

⁹Nĩ atĩa ũũĩ, ithuĩ tũtoĩ? nĩ ũndũ ũrĩkũ ũmenyete tũtatũire naguo?

¹⁰Ithuĩ tũrĩ na athuri arĩa marĩ mbuĩ, o arĩa akũrũ mũno, arĩa magĩtĩte matukũ maingĩ mũno gũkĩra thoguo.

¹¹Ũthathai ũrĩa uumĩte kwĩ Mũrungu, nĩ kũũira ũũirĩte, ũkaira ũhoro ũcio ũragĩkũhutia o kahora?

¹²Ngoro yaku ĩragũikia nĩkĩ? na nĩ kĩ gĩgũtũma ũmenamenie maitho,

¹³Ũgakĩhũgũrĩra Mũrungu roho waku na rũng’athio, o kinya ũgatumũra kanua gaku na ndeto ta icio?

¹⁴Mũndũ akĩrĩ kĩo kĩ, atĩ ahote gũtuĩka mũtheru? ũrĩa mũciare nĩ mũndũ mũka-rĩ, akĩrĩ kĩo kĩ, atĩ ahote gũtuĩka mũthingu?

¹⁵Atĩrĩrĩ, o kinya arĩa ake atheru, we ndamehokaga; igũrũ o narĩo ti-itherũ maitho-inĩ make.

¹⁶Githĩ makĩria ti mũndũ, na nĩ mũmaramaru akabutha o kũbutha, na nĩanyuaga ũgenyũ ta ũrĩa kũnyuagwo maĩ!

¹⁷Atĩrĩrĩ, nĩngũkuonia ũhoro; wee ta no kĩnjigue; nguumbũra ũrĩa ndaneonera:

¹⁸(Nĩ ũhoro ũtũire ũheanagwo nĩ andũ arĩa ogĩ maheetwo nĩ maithe mao, nao makĩaga kũũhitha;

¹⁹Na nĩ arĩa maaheetwo bũrũri ũgĩtuĩka wao oiki, na gũtirĩ mũndũ mũgeni watuĩkanagia kũrĩ o:)

²⁰Nĩ atĩrĩ, Mũndũ mwaganu atũũraga o atandiũkaga matukũ make mothe, mĩaka o ĩrĩa mũnyarirani agereirũo ya gũtũũra.

²¹Matũ make maikaraga o makĩiguaga mĩrurumo ĩkũmũtuĩkĩria; o rĩrĩa aikaire na thayũ akaharũkĩrũo nĩ mũtahani.

²²Ndetĩkagia atĩ nĩagacoka kuuma nduma-inĩ; ũrĩa onaga nĩ atĩ nĩetereirũo nĩ njomo.

²³Onaga ta angĩtuĩka wa kũũrũra ahaarage irio, oragie, Ikuoneka kũ? oĩ atĩ mũthenya ũrĩa wa nduma ũmũikarĩte ĩkuhĩ ũmwĩhaarĩrĩirie.

²⁴Mĩnyamaro na ruo rũa ngoro nĩ kũmũmakia imũmakagia; igakĩmũhoota o ta atharĩkĩirũo nĩ mũthamaki wĩthagathagĩire ita:

²⁵Na gĩtũmi nĩ ũndũ nĩ Mũrungu atambũrũkĩirie guoko akamũũgita, agakĩng’athĩria Mwene-Hinya-Wothe:

²⁶Nĩ kũmũguthũkĩra aamũguthũkĩire na nditi eũmĩtie ngingo agwete ngo yake ĩĩ na ngundi iria ndungu:

²⁷Tondũ ningĩ nĩeguĩkĩire ũthiũ wake na ũnoru, na akenoria hũnĩro na mĩnono ya rũambũ;

²⁸Ningĩ nĩetũũrĩire mĩciĩ ĩrĩa yorĩte, agagĩtũũra nyũmba itangĩatũũrirũo nĩ mũndũ, ciatigairie ituĩke o irũndo cia mahiga.

²⁹Ndangĩtũũra e mũtongu; indo ciake itigaikara, ningĩ kĩmera gĩake gĩtigacunjura thĩ.

³⁰Ndarĩ hingo agacoka kuuma nduma-inĩ; honge ciake nĩ kũũmio ĩkomio nĩ rũrĩrĩmbĩ, nake no athiĩ arindũke nĩ mĩhũmũ ya kanua ka Ngai.

³¹Nĩatige kwĩhoka maũndũ ma tũhũ, ndakehenie, amu ũthũmbi ũrĩa akaruta ho ũgatuĩka o tũhũ.

³²Kũhingio ũkahingio o ihinda rĩake rĩtanakinya; mathũmbĩ make matigatũũra me maigũ.

³³Agaita thabibu ciake iteruĩte ta ũrĩa mũthabibu ũitaga, na ahũrũrũke mbũĩ ta mũtamaiyũ wa mũgũnda.

³⁴Amu arĩa a thiritũ ya ithagathago matũũraga marĩ athatu, nacio hema cia arĩa endi mahaki nĩ kũrambũrũo iramb��ragwo nĩ mwaki.

³⁵Ihu rĩrĩa magĩaga narĩo nĩ rĩa kĩũnũhu, na gũciara mageciaragĩra waganu, nda yao no ũrĩa-ma ĩthugundaga.