Job 16

¹HĨNDĨ ĩo Ayubu agĩcokia akiuga atĩrĩ,

²Maũndũ ta macio nĩndĩkĩiguĩte maingĩ: inyuothe mũrĩ o athathayani a kĩnyamaro!

³Ũhoro wa mũhũhũtĩko-rĩ, no ũrĩthira? wee nĩ ũndũ ũrĩkũ ũratũma wambarare ũgakĩnjokeria?

⁴Niĩ na niĩ ndahota kwaria o ta ũguo mũraaria; ngoro cianyu ingĩrĩ harĩa ngoro yakwa ĩrĩ, ndahota kũmũrathĩkanĩria ciugo o na ndĩmũinagĩrie mũtwe arĩ niĩ.

⁵Kanua, o na niĩ ndamũũmĩrĩria nako, ũhorerania wakwa wa mĩromo o naguo no kũmũhoreria.

⁶Ningĩ, o na ndaaria, kĩeha gĩakwa gĩtikũhorereka, na ndegiria, nĩ ũndũ ũrĩkũ ndaahũthĩrio?

⁷Ĩndĩ rĩu We nĩa’nogetie, akandua hinya: thiritũ yakwa yothe, Ngai, nĩũmĩkirĩtie ihooru.

⁸Na niĩ nĩ kũngũgũnyaria ũngũgũnyarĩtie, ũguo ũtuĩke ũira wa gũtũma ’hootwo, ũhĩnju ũyũ ndĩ naguo ũgakĩnyambararĩra, ũkanyumbũra ndĩ o ho.

⁹Nĩ kũndambura arandambura nĩ ũrĩa arakarĩte; atuĩkĩte o wa kũ’nyarira; kũhagarania nĩa’hagaranagĩria magego; mũmuku ũcio wakwa nĩ kũngũũrĩra angũũragĩra maitho.

¹⁰Andũ-rĩ, nĩ gwathamia manjathamagĩria tũnua twao; mangũthaga ikai o makĩnjukaga; manyũnganĩire magakĩ’harũkagĩra o hamwe.

¹¹Mũrungu nĩa’nenganĩrĩte harĩ arĩa ithagathago, agakĩnjikia moko-inĩ ma andũ arĩa aaganu.

¹²Ndaikaire o ’horoheirũo, nake akĩrika kũmbebera; ĩĩ, nĩguo, nĩ kũnyita aa’nyitire ngingo, akĩndemania ngĩhehenjeka: ningĩ nĩ kũ’handa a’handĩte nduĩke cabaa wake wa kũrathagwo.

¹³Mĩguĩ yake ĩkũngora yumĩte mĩena mĩena; nĩanjatũranĩtie o higo gatagatĩ, na ndaigue tha; gwata nyongo yakwa agakĩmĩita thĩ.

¹⁴Andũrangĩte akanjĩkĩra mĩahuha o handũ na handũ; akanguthũkagĩra na nditi ta njamba ya hinya.

¹⁵Rũũa rũa mwĩrĩ wakwa nĩndumĩrĩire makũnia, naruo rũhĩa rũakwa ngarũkomia tĩri-inĩ.

¹⁶Ũthiũ wakwa nĩ gũthũkio ũthũkĩtio nĩ kũrĩra, na imone-inĩ ciakwa nĩhokĩte nduma ta ya gĩkuũ.

¹⁷Na itakĩrĩ na ũndũ wa ũtoi moko makwa mekĩte, o na mahoya makwa no makembu.

¹⁸Wee thĩ ĩno-rĩ, menya gũkahumbĩra thakame yakwa, nako kayũ gakwa menya gũkareka kone ha kũhurũkĩra!

¹⁹Atĩrĩ, o na rĩu mũira wakwa e ho matu-inĩ, kũu igũrũ-rĩ, nĩkũrĩ ũngĩnjirĩrĩra.

²⁰Arata akwa no kũndenda marandenda, ĩndĩ maitho makwa maraita maithori harĩ Ngai,

²¹Etĩkĩre gũtiirĩrĩra kĩhooto kĩa mũndũ harĩ Ngai, o na kĩa mũrũ wa mũndũ harĩ ũrĩa ũngĩ matũũrainie.

²²Amu tũmĩaka tũngĩ tũnini twahinga, nĩngagera njĩra ĩrĩa itagacoka kũhũndũka.