Lamentations 3

¹NIĨ-RĨ, nĩ niĩ mũndũ ũrĩa wonete thĩna nĩ ũndũ wa rũcamiũ rũrĩa rũa matũkũya make.

²Nĩwe ũndwarĩte akanjeeria nduma-inĩ, thengia ũtheri-inĩ.

³Ti-itherũ atindaga akĩhiũria guoko nĩ ũndũ wakwa rĩngĩ na rĩngĩ o mũthenya wothe.

⁴Nyama cia mwĩrĩ wakwa, na rũũa rũaguo, nĩ kũgũnyaria acigũnyarĩtie, namo mahĩndĩ akamoinanga.

⁵Nĩ kũnjakĩrĩra anjakĩrĩire, akanjigĩrĩria na ũrũrũ wa nyongo, o na mĩnoga mĩnene.

⁶Andũirie kũndũ kũrĩa kwĩ nduma, o ta arĩa maakuire tene.

⁷Anjirigĩire na mbarĩ ciothe, ngaremwo nĩ kuumagara; nyororo yakwa nĩamĩritũhĩtie mũno.

⁸Ĩĩ-ni, ndakaya o na ndoiga mbu, ihoya rĩakwa no kũhingĩra arĩhingagĩra matũ.

⁹Ĩng’aratua ciakwa cia gũthiĩra acihingĩte na mahiga marĩa maacũhie, na tũcĩra twakwa agagĩtũgonyanga.

¹⁰Anduĩkĩire ta nyamũ ĩrĩa ĩĩtagwo nduba rĩrĩa yoheirie, kana ta mũrũthi ũikaraga kũrĩa kwĩgitĩtie.

¹¹Nĩ kũhong’ora ahong’orete mĩgendere yakwa, agakĩndamburanga; andigĩte ndĩ ihooru-inĩ.

¹²Agetete ũta wake na aka’handa nduĩke cabaa wa kũrathagwo na mũguĩ.

¹³Atũmĩte ciano cia thiaka wake i’hungure o higo-inĩ.

¹⁴Nduĩkĩte wa gũthekagĩrĩrũo nĩ kĩrĩndĩ giitũ gĩothe; nĩ niĩ rũĩmbo rũakĩo rũrĩa gĩtindaga gĩkĩina.

¹⁵Anjiyũrĩtie maũndũ marũrũ, na kũhũnia aka’hũnia mũgũta.

¹⁶Ningĩ nĩang’ethũrangithĩtie magego makwa na mũthanga, na nĩ kũ’huba a’hubĩte na mũhu.

¹⁷Wee-rĩ, nĩ gũikania waikanirie ngoro yakwa ĩraihanĩrĩrie na thayũ, ngĩya kũriganĩrũo nĩ hingo ĩrĩa ndagaacĩire.

¹⁸Ngiuga atĩrĩ, Hinya wakwa nĩ mũthiru, o gwata gũtanya kũrĩa ndĩratũire ndanyĩte harĩ Jehova.

¹⁹Ta kĩririkane thĩna wakwa na kĩnyarirĩko, gwata ũrũrũ wa mũgũta na wa nyongo.

²⁰Maũndũ macio ngoro yakwa no ĩmaririkaine, ĩkainama thĩinĩ wakwa.

²¹Ũhoro ũyũ nĩguo ngwĩririkania, na nĩkĩo ngũikara o ndanyĩte:

²²Atĩ nĩ ũndũ wa mĩtugĩre ya Jehova, nĩkĩo tũtaninĩtwo biũ! nĩ gũtuĩka tha ciake itirĩ hĩndĩ ithiraga.

²³Mĩtugĩre yake ĩrokaga ĩrĩ o mĩerũ rũcinĩ o rũcinĩ; kwĩhokeka gwaku-rĩ, nĩ kũnene mũno.

²⁴Ngoro yakwa yugaga ũũ, atĩ, Jehova nowe rũgai rũakwa; tondũ ũcio nĩndĩrĩmwĩtanyagĩra.

²⁵Jehova nĩaagagĩrĩra arĩa mamwetagĩrĩra, akaagagĩrĩra ngoro o ĩrĩa ĩmũrongoragia.

²⁶Nĩ wega mũndũ atanyage ũhonokio wa Jehova, awetagĩrĩre o akirĩte.

²⁷Mũndũ nĩaagĩrĩirũo nĩ gũikara na icoki ta ng’ombe rĩrĩa e mwanake.

²⁸Nĩecũnjũme, ekirĩre, nĩ ũndũ nĩ Ũcio ũmũigĩrĩire.

²⁹Nĩarũmanie kanua na tĩri; no gũgĩkorũo aahota kũgĩa na kĩĩrĩgĩrĩro.

³⁰Nĩerekerie rũthĩa na harĩ ũrĩa ũkũmũgũtha; nĩakĩiyũre kũmeneka o kũiyũra.

³¹Amu Mwathani ndangĩteana iteana rĩa tene na rene.

³²Thima-rĩ, o na ekanira kĩeha, no akaiguanĩra tha kũringana o na ũrĩa mĩtugĩre yake ĩrĩ mĩingĩ.

³³Amu ndonagia ciana cia kĩrĩndĩ thĩna kana agaciĩkĩra kĩeha nĩ kwenda kwa ngoro yake.

³⁴Gũthethera mĩgwate yothe ya thĩ nĩ kũmĩranga na makinya-rĩ,

³⁵Kũhong’orera mũndũ ũndũ wake ũrĩa wa kĩhooto ũthiũ-inĩ wa Ũrĩa-wĩ-Igũrũ-Mũno-rĩ,

³⁶Kũhotomeria mũndũ cira wake-rĩ, Mwathani ndangĩgatha maũndũ macio.

³⁷Nũ ũrĩa uugaga ũndũ, naguo ũgakinya, Mwathani ataathanĩte atĩ ũndũ ũcio ũtuĩke?

³⁸Githĩ kanua ka Ũrĩa-wĩ-Igũrũ-Mũno tiho hoimaga maũndũ marĩa moru o na marĩa mega?

³⁹Mũndũ ũrĩ muoyo-rĩ, nĩ kĩ gĩgĩtũmaga atete, mũndũ agakĩng’ung’ua akĩherithĩrio mahĩtia make?

⁴⁰Nĩtwĩthuuthuuriei mĩthiĩre iitũ, na tũmĩrorie, tũcokerere Jehova.

⁴¹Nituoere Mũrungu o ũcio wĩ matu-inĩ ngoro ciitũ o hamwe na moko maitũ.

⁴²Ithuĩ-rĩ, nĩ ithuĩ twĩhĩtie tũgakũrema; wee nawe ũgakĩrega gũtuohera.

⁴³Nĩwĩhumbĩire na marakara ũgagĩtũthingata; kũũragana nĩũũraganĩte na ndũnaigua tha.

⁴⁴Wĩhumbĩire na itu, nĩ getha kũhoya gwitũ gũtikahungure.

⁴⁵Ũtũmĩte tũtuĩke ta makũro na mahuti gatagatĩ ka iruka cia andũ.

⁴⁶Thũ ciitũ ciothe nĩitwathamĩirie tũnua.

⁴⁷Tũkorereirũo nĩ guoya o na irima rĩrĩa rĩa gĩkuũ, o gwata ũninani na wanangi.

⁴⁸Riitho rĩakwa rĩikaire o rĩkĩnyũrũrũkagia maĩ maigana ta njũĩ, nĩ ũndũ wa kwanangwo kwa mwarĩ ũyũ wa kĩrĩndĩ giitũ.

⁴⁹Riitho rĩakwa rĩitaga maĩ rĩtegũtumia, rĩgaikara o rĩkĩmaitaga rĩtegũtigithĩria,

⁵⁰Kinya rĩrĩa Jehova arĩng’etia arĩ igũrũ, erorere e kũu matu-inĩ.

⁵¹Riitho rĩakwa no kũnduura rĩnduuraga, nĩ ũndũ wa andũ-a-nja a gĩtũũro gĩkĩ giitũ.

⁵²Arĩa matuĩkĩte thũ ciakwa tũhũ-rĩ, manguĩmĩte na hinya o ta ũrĩa kũgũĩmagwo nyoni.

⁵³Nĩmatinĩrĩirie muoyo wakwa nĩ kũnjikia thĩinĩ wa kanyũmba ga korokoro karĩ thĩ mũno, na makarekia ihiga igũrũ rĩakwa.

⁵⁴Ndahubirũo nĩ maĩ magĩikũrũkagĩra igũrũ rĩa mũtwe wakwa; ngĩkiuga atĩrĩ, Ndĩ kũninwo!

⁵⁵Ngĩkaĩra rĩĩtwa rĩaku, wee Jehova, ndĩ kanyũmba ga korokoro o kau karĩ thĩ mũno.

⁵⁶Wee nawe ũkĩigua mũgambo ũcio wakwa, atĩ, Tiga kũhumbĩra gũtũ ngĩheeha, o ngĩgũkayagĩra!

⁵⁷Mũthenya ũcio ndagũkaĩire-rĩ, nĩwa’thengereire, ũkiuga atĩrĩ, Tiga gwĩtigĩra!

⁵⁸Ĩ Mwathani-ĩ, nĩwe wacirĩrĩire ngoro yakwa macira mayo; muoyo wakwa nĩwe waũkũũrire.

⁵⁹Wee Jehova, nĩwonete ũrĩa njogogetwo; tua cira wakwa arĩ wee.

⁶⁰Wee nĩwonete mwĩrĩhĩrio wao wothe, ũgakĩona maũndũ mothe marĩa maana’thugundĩra.

⁶¹Kũigua nĩũkĩiguĩte rũnyenya rũao, wee Jehova, o gwata maũndũ macio mothe maana’thugundĩra;

⁶²Nĩũiguĩte mĩromo ya acio maanjũkĩrĩire, na meciria marĩa matindaga makĩĩnjirĩria mũthenya ũgathũa.

⁶³Ta no kĩĩrorere magĩikara thĩ o na magĩũkĩra: no niĩ rũĩmbo rũao.

⁶⁴Wee Jehova, nĩũkamarĩha irĩhi rĩringaine na wĩra wa moko mao.

⁶⁵Ũkamekĩra ngoro nyũmũ: kĩrumi gĩaku kĩroikara nao!

⁶⁶Ũkaingatana nao ũrĩ o na marakara, ũmanine mathire gũkũ ruungu ruothe rũa igũrũ rĩu rĩa Jehova.