Lamentations 5

¹Ĩ JEHOVA-Ĩ, ririkana maũndũ maya magĩtũkorete! ta rora, ũkĩone ũmeneku witũ.

²Igai riitũ rĩrĩa twagaĩirũo nĩ igarũre rĩkarorio na kũrĩ andũ ageni, mĩciĩ iitũ ĩgagĩtuĩka ya andũ a rũrĩrĩ.

³Tũtuĩkĩte ciana cia ngoriai ciũrĩtwo nĩ maithe, manyina maitũ nao makahaana ta a ndigwa.

⁴Maĩ maitũ tũkĩnyua, no mbia; ngũ iria ciitũ nĩ kwenderio twendagĩrio.

⁵Arĩa matũthingataga marĩ o makano-inĩ maitũ: tũnogete, na tũkaaga hĩndĩ tũngĩhurũka.

⁶Nĩtũng’athanĩte na andũ a Misiri, ona Aashuri o nao nĩguo tũhote kũiganwo nĩ irio.

⁷Maithe maitũ nĩmaahĩtirie, na rĩu matirĩ ho, na ithuĩ nĩ ithuĩ tũkuuĩte mũrigo wa mawaganu mao.

⁸Twathagwo nĩ ndungata, na gũtirĩ wa gũtũteithũra tuume moko-inĩ ma cio.

⁹Tuonaga irio nĩ gũtonyia mĩoyo iitũ ũgwati-inĩ nĩ ũndũ wa njomo ĩrĩa ĩrĩ werũ-inĩ.

¹⁰Njũa cia mĩĩrĩ iitũ ii na mwaki o ta icua nĩ ũndũ wa ũrugarĩ ũrĩa mũnene wa mũndũ mũrĩe nĩ ng’aragu.

¹¹Atumia nĩ kũgwatwo maagwatagwo na hinya gũkũ Zayuni, nginya airĩtu-rĩ, makagwatagĩrũo matũũra-inĩ ma Juda.

¹²Anene akuo, kũrĩ maacuuririo na moko mao, ningĩ athuri, mothiũ mao makaagithio gĩtĩo.

¹³Aanake magĩtuĩka a gũkuuithagio mahiga ma gĩthĩi, nacio ciana itũgũgage nĩ gũkuuithio ngũ.

¹⁴Athuri-rĩ, nĩmatigĩte gũikaraga boi-inĩ, aanake nao magatiga gũthiaga rũĩmbo.

¹⁵Ngoro ciitũ rĩu nĩithirĩte gĩkeno; ndũrũhĩ ciitũ ikagarũrũka igatuĩka mũcakayo.

¹⁶Thũmbĩ ya ũnene nĩ ngũu ĩgatuuma mũtwe: kaĩ ithuĩ twĩ na haaro-ĩ! amu kũhĩtia nĩ ithuĩ twanahĩtia.

¹⁷Tondũ ũcio ngoro ciitũ nĩciũrĩtwo nĩ hinya; tondũ wa maũndũ macio-rĩ, maitho maitũ magakĩira.

¹⁸Tondũ atĩrĩ, kĩrĩma gĩa Zayuni-rĩ, kĩo nĩgĩkirĩte ihooru; ngũcũ rĩu nĩcio icũgacũgaga kuo.

¹⁹Wee, Jehova-rĩ, ũikaraga o ho mĩndĩ na mĩndĩ; gĩtĩ gĩaku kĩa ũnene gĩkinyagĩrĩra njiaro na njiaro.

²⁰Nĩ ũndũ kĩ ũkũriganĩrũo nĩ ithuĩ gwata tene, ũgagĩtũtiganĩria hingo ndaya ũũ?

²¹Jehova, tũgarũre ũtwerekerie na kũrĩ wee, na nĩtũgũkũgarũrũkĩra; erũhia matukũ maitũ macoke o ta ũrĩa maatariĩ tene;

²²Tiga ũgĩkorirũo ũtũregete o gũtũrega, ũgagĩtũrakarĩra o mũno makĩria.