Luke 10

¹NA rĩrĩ, maũndũ macio maathira, Mwathani agĩthura andũ angĩ mĩrongo mũgwanja, akĩmatũma o andũ erĩ, erĩ, mathiĩ mbere yake matũũra mothe o na kũndũ guothe kũrĩa aakiriĩ gũthiĩ we mwene.

²Agĩkĩmera atĩrĩ, Magetha nĩ maingĩ, no aruti wĩra nĩ anyinyi: nĩ ũndũ ũcio thaithai Mwathani mwene magetha atĩ atũme aruti wĩra mathiĩ magetha-inĩ make.

³Wĩthiĩrei: atĩrĩ, ndamũtũma ta tũbũri o kũrĩa kwĩ njũi.

⁴Tigai gũkuua o na kamondo ga thendi, kana mburungo, kana iratũ: na mũtikageithie mũndũ njĩra-inĩ.

⁵Na rĩrĩ, nyũmba o yothe ĩrĩa mũrĩtonyaga, ambagai kuuga atĩrĩ, Thayũ ũrogĩa nyũmba ĩno.

⁶Na kũngĩkorũo nĩkũrĩ mũndũ wendaga thayũ kuo, thayũ ũcio wanyu nĩũgaikara nake; na kũngĩkorũo gũtirĩ, thayũ ũcio wanyu nĩũkamũcokerera.

⁷Ningĩ ikaragai nyũmba o ĩo, mũrĩage na mũnyuage o kĩrĩa mũrĩheagwo: nĩ gũkorũo mũruti wĩra nĩaagĩrĩirũo nĩ kũheagwo mũcara wake. Tigai gũthama nyũmba ĩmwe mũgathiĩ ĩngĩ.

⁸Na ningĩ o itũũra rĩrĩa rĩothe mũrĩtonyaga, nao andũ akuo mamũgwate ũgeni-rĩ, rĩagai o irio iria mũngĩheo:

⁹na honagiai arĩa arũaru marĩ kuo, na mũmerage atĩrĩ, Ũthamaki wa Ngai nĩũmũkuhĩhĩirie.

¹⁰No rĩrĩ, itũũra rĩrĩa rĩothe mũrĩtonyaga, nao andũ akuo maage kũmũgwata ũgeni-rĩ, umagarai mũgathiĩ njĩra-inĩ ciarĩo, muuge atĩrĩ,

¹¹O na rũkũngũ rũa itũũra rĩanyu rũrĩa rũtũgwatĩte magũrũ, nĩtwarũhuura, rũtuĩke rũa kũmuumbũra: ĩndĩ mũmenye atĩrĩ, atĩ ũthamaki wa Ngai nĩũmũkuhĩhĩirie.

¹²Ngũmwĩra atĩrĩ, atĩ Sodomu nĩgũkagĩa murũ, mũthenya ũcio, gũkĩra itũũra rĩu.

¹³Wee, Korazini, kaĩ wĩ na haaro-ĩ! O nawe, Bethisaida, kaĩ wĩ na haaro-ĩ! Nĩ ũndũ-rĩ, ciĩko cia hinya iria ciekirũo kwanyu ingĩekirũo Turo na Sidoni, andũ akuo nĩmangĩaherire tene, maikarĩte thĩ mehumbĩte makũnia, na makehurĩria mũhu mĩtwe.

¹⁴No rĩrĩ, Turo na Sidoni nĩgũkagĩa murũ cira-inĩ kũrĩ inyuĩ.

¹⁵Nawe Kaperinaumu, ũũĩ nĩ gũtũũgĩrio ũgatũũgĩrio ũkinye Igũrũ? He! Nĩ kũharũrũkio ũkaharũrũkio ũkinye kwa-ngoma.

¹⁶Mũndũ ũrĩa ũmũiguaga inyuĩ, nĩ niĩ aiguaga; na ũrĩa ũmũregaga inyuĩ, nĩ niĩ aregaga; na ũrĩa ũndegaga niĩ-rĩ, nĩaregaga Ũrĩa wandũmire.

¹⁷Nao andũ acio mĩrongo mũgwanja makĩhũndũka makenete, makiuga atĩrĩ, Mwathani, o na ndaimono nĩciathĩkaga nĩ ithuĩ nĩ ũndũ wa rĩĩtwa rĩaku.

¹⁸Nake akĩmera atĩrĩ, Nĩnyonete Shaitani akĩgũa ta rũheni ruumĩte Igũrũ.

¹⁹Atĩrĩrĩ, nĩndĩmũheete wathani nĩ getha mũkinyangagĩrĩrie nyamũ-cia-thĩ, o na tũng’aurũ; o na ngamũhe wathani ũkĩrĩte hinya wothe wa thũ iitũ: na gũtirĩ kĩndũ gĩkamwĩka ũũru, o na atĩa.

²⁰Ĩndĩ tigagai gũkena nĩ ũndũ ngoma nĩciathĩkaga nĩ inyuĩ; no mũkenage nĩ ũndũ marĩĩtwa manyu nĩmaandĩkĩtwo o Igũrũ.

²¹Na rĩrĩ, o thaa ĩo agĩkena, arĩ na Roho Mũtheru, akiuga atĩrĩ, Ndakũgatha, Awa, wee Mwathani wa Igũrũ o na wa thĩ, nĩ ũndũ nĩũhithĩte andũ arĩa ogĩ na imenyi maũndũ macio, ũkamaguũrĩria tũkenge: noguo, Awa, nĩ gũkorũo ũguo nĩguo wonire wagĩrĩire.

²²Nĩ’nengeretwo maũndũ mothe nĩ Awa: na gũtirĩ mũndũ ũũĩ Mũriũ tiga Ithe witũ; ningĩ gũtirĩ mũndũ ũũĩ Ithe witũ tiga o Mũriũ, o na ũrĩa o wothe Mũriũ endaga kũmũguũrĩria.

²³Nake akĩĩhũgũrĩra arutwo ake, akĩmera atĩrĩ, hatarĩ muugio, Gũkena-rĩ, nĩ maitho marĩa monaga maũndũ marĩa inyuĩ muonaga:

²⁴nĩ gũkorũo ngũmwĩra atĩrĩ, atĩ anabii o na athamaki aingĩ nĩmendaga kuona maũndũ marĩa inyuĩ muonaga, na matiamonire; magakĩenda kũigua maũndũ marĩa mũiguaga, na matiamaiguire.

²⁵Na rĩrĩ, mũrutani ũmwe wa watho akĩrũgama akĩmũgeria, akĩmũũria atĩrĩ, Mũrutani, ngwĩka atĩa nĩ getha ngagaĩrũo muoyo ũtagathira?

²⁶Nake Jesu akĩmũũria atĩrĩ, Kwandĩkĩtwo atĩa watho-inĩ wa Ngai? Ũthomaga atĩa?

²⁷Nake akĩmũcokeria akiuga atĩrĩ, Enda Mwathani Ngai waku na ngoro yaku yothe, o na muoyo waku wothe, o na hinya waku wothe, o na gwĩciria gwaku guothe; na ningĩ enda mũndũ wa itũũra rĩanyu, o ta ũrĩa wĩendete wee mwene.

²⁸Nake akĩmwĩra atĩrĩ, Nĩwacokia ũhoro o wega: ĩkaga o ũguo na nĩũgũtũũra muoyo.

²⁹Nake mũndũ ũcio, akĩenda gwĩtua mwega, agĩcoka akĩũria Jesu atĩrĩ, Mũndũ ũrĩa wĩtagwo ũũ, Mũndũ wa itũũra riitũ, nĩ ta ũrĩkũ?

³⁰Nake Jesu akĩmũcokeria akiuga atĩrĩ, Kwarĩ mũndũ wathereraga athiĩ Jeriko, oimĩte Jerusalemu; nake agĩkorũo nĩ atunyani, nao makĩmũruta nguo ciake na makĩmũhũra, magĩthiĩ, makĩmũtiga atigairie hanini atumbũkane.

³¹Na gũgĩtuĩka atĩrĩ, atĩ nĩkwarĩ mũthĩnjĩri-Ngai wathereraga, akĩgera njĩra ĩo: nake ona mũndũ ũcio, akĩhĩtũkĩra o mũkĩra-inĩ ũrĩa ũngĩ wa njĩra.

³²O ũguo taguo Mũlawii ũmwe nake agĩkinya o handũ hau, nake aamuona, akĩhĩtũkĩra o mũkĩra-inĩ ũrĩa ũngĩ wa njĩra.

³³No rĩrĩ, Mũsamaria ũmwe agĩthiĩ ũgeni agĩkinya o hau aarĩ: nake aamuona, akĩringwo nĩ tha,

³⁴agĩthiĩ harĩ we, akĩmuoha kũrĩa aatihangĩtio, agĩgũitĩrĩria maguta na ndibei; agĩcoka akĩmũhaicia igũrũ rĩa nyamũ yake mwene, akĩmũtwara o kinya nyũmba ya ageni, akĩmũmenyerera.

³⁵Na mũthenya ũyũ ũngĩ akĩruta ciringi igĩrĩ akĩnengera mwene nyũmba ĩo ya ageni, akĩmwĩra atĩrĩ, Mũmenyagĩrĩre; na rĩrĩ, o kĩndũ kĩrĩa kĩngĩ ũngĩruta nĩ ũndũ wake, nĩngakũrĩha rĩrĩa ngacoka.

³⁶Rĩu-rĩ, andũ acio atatũ-rĩ, ũgwĩciria nĩ ũrĩkũ wao wekire mũndũ ũcio wakorirũo nĩ atunyani o ta ũrĩa mũndũ angĩĩkwo nĩ mũndũ wa itũũra rĩao?

³⁷Nake mũrutani ũcio wa watho akĩmũcokeria atĩrĩ, Nĩ ũcio wamũiguĩrĩire tha. Nake Jesu akĩmwĩra atĩrĩ, Thiĩ, ũgekanage o ta ũguo.

³⁸Na rĩrĩ, hĩndĩ ĩrĩa methiagĩra na njĩra agĩtonya mũciĩ ũmwe: na mũtumia wetagwo Maritha akĩmũgwata ũgeni nyũmba-inĩ yake.

³⁹Nake aarĩ na mwarĩ wa nyina wetagwo Mariamu, nake aaikarĩte thĩ magũrũ-inĩ ma Mwathani, agathikagĩrĩria ũrĩa oigaga.

⁴⁰Nowe Maritha nĩaahang’aga mũno akĩmathĩra andũ aingĩ; agĩũka harĩ Jesu akĩmwĩra atĩrĩ, Mwathani, kaĩ ũtekũũria atĩ mwarĩ wa maitũ nĩandigĩte ndĩmũmathĩre ndĩ nyiki? Ndũkĩmwĩre andeithie.

⁴¹Nowe Mwathani akĩmũcokeria akĩmwĩra atĩrĩ, Maritha, Maritha, nĩũtangĩkĩte na ũkenyarira nĩ ũndũ wa maũndũ maingĩ:

⁴²no ũndũ ũmwe ũbataranĩtie: na rĩrĩ, Mariamu nĩethurĩire rũĩga rũrĩa rũega, o rũrĩa atangĩtunyũo.