Luke 9

¹NAKE agĩĩta arĩa ikũmi na erĩ mongane hamwe, akĩmahe hinya na wathani wa gwathaga ndaimono ciothe, na wa kũhonagia andũ mĩrimũ.

²Agĩcoka akĩmatũma mathiĩ makaheanage ũhoro wa ũthamaki wa Ngai, na makahonagie andũ arũaru.

³Nake akĩmera atĩrĩ, Mũtigakuue kĩndũ o na kĩ kĩa rũgendo rũanyu, o na mũtirima, kana mburungo, kana mũgate, kana mbia; na mũndũ ndagekuuĩre nguo igĩrĩ.

⁴Nayo nyũmba o ĩrĩa mũrĩtonyaga, ikaragai kuo, na muumage kuo mũgĩthiĩ.

⁵Na andũ othe arĩa matarĩmũgwataga ũgeni-rĩ, mũkiuma itũũra rĩu, thukiai magũrũ manyu rũkũngũ rũitĩke, rũtuĩke rũa ũira kũrĩ o.

⁶Magĩkiuma hau maarĩ, magĩthiĩ makĩhunguraga mĩciĩ, makĩhunjagia Ũhoro-ũrĩa-Mwega, na makĩhonanagia kũndũ guothe.

⁷Na rĩrĩ, Herode ũrĩa mũthamaki nĩaaiguire ũhoro wa maũndũ marĩa mothe mekirũo: nake akĩrigwo mũno, nĩ ũndũ nĩkwoigagwo nĩ andũ amwe atĩ Johana nĩaariũkĩte, akoima kũrĩ arĩa akuũ:

⁸angĩ makoiga atĩ Elija nĩonekete; angĩ nao makoiga atĩ mũnabii ũmwe wa tene nĩaariũkĩte.

⁹Nake Herode akiuga atĩrĩ, Johana nĩndamũtinithirie mũtwe: kaĩ ũyũ njiguaga ndeto icio ũhoro wake arĩ ũ? Agĩkĩenda kũmuona.

¹⁰Nao atũmwo maacoka, makĩĩra Jesu maũndũ marĩa mekĩte. Nake akĩehera kuo agĩthiĩ nao itũũra rĩetagwo Bethisaida.

¹¹No rĩrĩ, andũ a kĩrĩndĩ maamenya ũguo, makĩmũrũmĩrĩra: nake akĩmakũngũĩra akĩmaarĩria ũhoro wa ũthamaki wa Ngai; na arĩa maabatairio nĩ kũhonio, akĩmahonia.

¹²Narĩo riũa rĩgĩtua gũthũa; nao arĩa ikũmi na erĩ magĩũka kũrĩ we makĩmwĩra atĩrĩ, Ĩra andũ a kĩrĩndĩ mathiĩ, makinye mĩciĩ-inĩ, o na ng’ongo iria irĩ hakuhĩ, makaraare kuo, na mamathe irio: nĩ gũkorũo haha tũrĩ no werũ.

¹³Nowe akĩmera atĩrĩ, Mahei irio arĩ inyuĩ. Nao makĩmwĩra atĩrĩ, Tũtirĩ na kĩndũ, tiga mĩgate ĩtano na ciũngũyũ igĩrĩ; no anga tũthiire tũkagũrĩre andũ aya othe irio.

¹⁴Amu nĩhaarĩ arũme ta ngiri ithano. Nake akĩĩra arutwo ake atĩrĩ, Merei maikare thĩ, o gĩkundi andũ mĩrongo ĩtano, ĩtano.

¹⁵Nao magĩĩka ũguo, makĩmaikaria thĩ othe.

¹⁶Nake akĩoya mĩgate ĩo ĩtano na ciũngũyũ icio igĩrĩ, agĩcoka akĩrora Igũrũ, agĩcirathima, agĩcienyũranga, akĩnengera arutwo matwarĩre andũ a kĩrĩndĩ.

¹⁷Nao makĩrĩa makĩhũna othe: gũgĩcoka gũkĩoyũo cienyũ iria ciatigarire ciondo ikũmi na igĩrĩ.

¹⁸Na gũgĩkinya atĩrĩ, hĩndĩ ĩrĩa aahoyaga Ngai keheri-inĩ, arutwo ake magĩkorũo marĩ hamwe nake. Nake akĩmoria atĩrĩ, Andũ a kĩrĩndĩ manduaga ũ?

¹⁹Nao makĩmũcokeria makiuga atĩrĩ, Moigaga atĩ wee nĩwe Johana Mũbatithania; na amwe angĩ moigaga atĩ nĩwe Elija; na angĩ moigaga atĩ mũnabii ũmwe wa tene nĩariũkĩte.

²⁰Nake akĩmoria atĩrĩ, Ĩ, inyuĩ na inyuĩ-rĩ, mũnduaga ũ? Nake Petero akĩmũcokeria akĩmwĩra atĩrĩ, Wee nĩwe Kristo ũrĩa wa Ngai.

²¹Nake akĩmakaania akĩmaatha atĩ matikere mũndũ o na ũmwe ũhoro ũcio,

²²akiuga atĩrĩ, Mũrũ wa Mũndũ ndarĩ hingo atakona mathĩna maingĩ, na aregwo nĩ athuri na athĩnjĩri-Ngai arĩa anene o na aandĩki-marũa, na oragwo, na acoke ariũkio mũthenya wa gatatũ.

²³Agĩcoka akĩĩra andũ othe atĩrĩ, Mũndũ o wothe angĩenda kũ’hikĩra nĩerege, na oyage, o mũthenya, mũtĩ wake wa kwambĩrũo, anũmagĩrĩre.

²⁴Nĩ gũkorũo mũndũ o wothe wendaga gũtũũria muoyo wake, ũcio nĩ kũũrũo akorũo nĩguo; na ũrĩa ũkorũo nĩ muoyo wake nĩ ũndũ wakwa, ũcio nĩakaũtũũria.

²⁵Nĩ ũndũ-rĩ, mũndũ eguna na kĩ, angĩĩgwatĩra thĩ yothe, na ate muoyo wake mwene kana orũo nĩguo?

²⁶Nĩ gũkorũo mũndũ o wothe angĩconoka nĩ niĩ, na aconokere ciugo ciakwa, nĩwe ũgaconokerũo nĩ Mũrũ wa Mũndũ rĩrĩa agoka arĩ na riri wake mwene, na wa Ithe, o na wa araika arĩa atheru.

²⁷No ngũmwĩra atĩrĩ na ma, Andũ aya marũgamĩte haha, nĩharĩ amwe ao matagacama gĩkuũ o na atĩa, mataambĩte kuona ũthamaki wa Ngai.

²⁸Na gũgĩkinya atĩrĩ thutha wa mohoro macio, ta matukũ manana maathira, agĩtwarana na Petero, na Johana, na Jakubu, akĩambata kĩrĩma nao, ahoere Ngai kuo.

²⁹Na akĩhoyaga-rĩ, ũthiũ wake ũkĩgarũrũka ũrĩa wahaanaga, nacio nguo ciake ikĩerũha, igĩkenga mũno.

³⁰Na rĩrĩ, hagĩkorũo athuri erĩ makĩaria nake, nĩo Musa na Elija;

³¹makĩmoimĩrĩra me na riri, makĩaria ũhoro wa ikua rĩake rĩrĩa akiriĩ gũkuĩra Jerusalemu.

³²Nake Petero, na arĩa maarĩ hamwe nake, magĩkorũo mahĩtĩtwo nĩ toro; no rĩrĩa maarahũkire, makĩĩigua, makĩona riri wake, o na makĩona athuri acio erĩ marũgamĩte hamwe nake.

³³Na gũgĩkinya atĩrĩ, hĩndĩ ĩrĩa andũ acio maatiganaga nake, mathiĩ, Petero akĩĩra Jesu atĩrĩ, Mũnene witũ, nĩtwagĩrĩirũo nĩ gũikara gũkũ; reka twake ithũnũ ithatũ, kĩmwe gĩaku, na kĩmwe kĩa Musa, na kĩmwe kĩa Elija: nake ndoĩ ũrĩa oigaga.

³⁴Na akĩaragia maũndũ macio-rĩ, gũgĩũka itu rĩkĩmahumbĩra; nao magĩĩtigĩra nĩ ũndũ wa kũhumbĩrũo nĩrĩo.

³⁵Na mũgambo uumĩte itu-inĩ rĩu ũkiuga atĩrĩ, Ũyũ nĩwe Mũrũ wakwa, o ũrĩa ndĩĩthurĩire: mũiguagei.

³⁶Na hĩndĩ ĩrĩa mũgambo ũcio waiguirũo, Jesu agĩcoka kuonwo arĩ wiki. Nao magĩkira, na matierire mũndũ o na ũmwe matukũ macio ũndũ o wothe wa maũndũ macio monire.

³⁷Na gũgĩkinya atĩrĩ, mũthenya ũyũ ũngĩ maaikũrũka kĩrĩma, Jesu agĩtũngwo nĩ kĩrĩndĩ kĩingĩ ma.

³⁸Na rĩrĩ, mũndũ ũmwe wa kĩrĩndĩ kĩu akĩanĩrĩra akiuga atĩrĩ, Mũrutani, ndagũthaitha ũrore mũrũ wakwa; nĩ gũkorũo nĩ mwana wakwa wa mũmwe:

³⁹na rĩrĩ, arĩ na ngoma ĩmũnyitaga, na kahinda o kau agaitĩka gũkaya, nayo ngoma nĩĩmũthiorangaga, ĩgatũma arute mũhũyũ, na nĩ hinya mũno ĩkĩmũtiga, na nĩĩmũtihũrũrangagia ũũru.

⁴⁰Na nĩndĩrathaithire arutwo aku mamĩrute; nao mararemwo.

⁴¹Nake Jesu agĩcokia akiuga atĩrĩ, Rũciaro rũrũ rũtetĩkagia na rũtũrĩku, ngũtũũra na inyuĩ ndĩmũkiragĩrĩria nginya hĩndĩ ĩ? Ta rehe mũrũguo haha.

⁴²Na agĩũkaga-rĩ, ndaimono ĩkĩmũtungumania thĩ, ĩkĩmũthiora ũũru. Nowe Jesu agĩkaania ngoma ĩo thũku, akĩhonia kĩhĩĩ kĩu, agĩgĩcokeria ithe.

⁴³Nao othe makĩgegeara nĩ ũndũ wa ũkaru ũcio mũnene wa Ngai. Na hĩndĩ ĩrĩa andũ othe maagegaga nĩ ũndũ wa maũndũ marĩa mothe ekaga, akĩĩra arutwo ake atĩrĩ,

⁴⁴Iguai wega na mũririkane mohoro maya: nĩ gũkorũo Mũrũ wa Mũndũ nĩakaneanwo moko-irĩ ma andũ.

⁴⁵Nao matiigana gũtaũkĩrũo nĩ ũhoro ũcio, nĩ ũndũ nĩmaahithĩtwo matikaũmenye: na magĩĩtigĩra kũmũũria gĩtũmi kĩaguo.

⁴⁶Na gũkĩgĩa ngarari kũrĩ o, atĩ nĩ ũrĩkũ wao ũngĩtuĩka mũnene kũrĩ arĩa angĩ.

⁴⁷Nake Jesu aamenya meciria ma ngoro ciao, akĩrehe kaana agĩkarũgamia mwena-inĩ wake,

⁴⁸agĩcoka akĩmera atĩrĩ, Mũndũ o wothe ũngĩĩtĩkĩra kaana gaka nĩ ũndũ wa rĩĩtwa rĩakwa, nĩ niĩ etĩkĩra: nake ũrĩa ũngĩnjĩtĩkĩra niĩ, nĩetĩkĩrĩte Ũrĩa wandũmire: nĩ gũkorũo ũrĩa wĩ mũnyinyi kũrĩ arĩa angĩ thiritũ-inĩ yanyu, ũcio nĩwe mũnene.

⁴⁹Nake Johana akĩmũcokeria akĩmwĩra atĩrĩ, Mũnene witũ, nĩtũronire mũndũ akĩruta andũ ndaimono na rĩĩtwa rĩaku, na tũramũkaania, nĩ gũkorũo ndatwaranaga na ithuĩ.

⁵⁰No Jesu akĩmwĩra atĩrĩ, Mũtikamũkaanie: nĩ gũkorũo ũrĩa ũtarĩ ũthũ na inyuĩ, ũcio nĩ wanyu.

⁵¹Na gũgĩkinya atĩrĩ, rĩrĩa matukũ make ma gũtwarũo Igũrũ maakuhĩhĩirie kũhinga, agĩthiĩ o arũngĩrĩirie arorete Jerusalemu,

⁵²akĩrekia arekio mathiage mbere yake: nao magĩthiĩ, magĩtonya itũũra rĩmwe rĩa Asamaria, mamũthondekere handũ.

⁵³Nao andũ akuo makĩrega kũmũgwata ũgeni, nĩ ũndũ nĩonagwo ta arorete Jerusalemu.

⁵⁴Na rĩrĩ, arutwo ake Jakubu na Johana mona ũguo, makĩmũũria atĩrĩ, Mwathani, nĩũkwenda twĩtie mwaki uume Igũrũ ũmanine, [o ta ũrĩa Elija ekire]?

⁵⁵Nowe akĩĩhũgũra akĩmakaania [akiuga atĩrĩ, Mũtiũĩ roho ũrĩa mũrĩ aguo, ũrĩa ũtariĩ;

⁵⁶tondũ Mũrũ wa Mũndũ ndokire kũnina mĩoyo ya andũ, no kũmĩhonokia.] Magĩgĩthiĩ mũciĩ ũngĩ.

⁵⁷Na hĩndĩ ĩrĩa maathiaga, marĩ njĩra, mũndũ ũmwe akĩmwĩra atĩrĩ, Nĩndĩĩkũrũmagĩrĩra kũrĩa guothe ũrĩthiaga.

⁵⁸Nake Jesu akĩmwĩra atĩ, Mbwe ii na marima, o na nyoni cia rĩera-inĩ nĩirĩ na itara; no rĩrĩ, Mũrũ wa Mũndũ ndarĩ handũ o na ha kũigĩrĩra mũtwe.

⁵⁹Agĩcoka akĩĩra mũndũ ũngĩ atĩrĩ, Nũmĩrĩra. Nake mũndũ ũcio akĩmwĩra atĩrĩ, Mwathani, njĩtĩkĩria nyambe ’thiĩ ngathike awa.

⁶⁰Nowe akĩmwĩra atĩrĩ, Tiga arĩa akuũ methikagĩre akuũ ao ene; nowe, thiĩ, ũkahunjanagĩrie ũhoro wa ũthamaki wa Ngai.

⁶¹Na mũndũ ũngĩ nake akĩmwĩra atĩrĩ, Nĩndĩĩkũrũmagĩrĩra, Mwathani; no amba ũnjĩtĩkĩrie ’thiĩ ngoigĩre andũ arĩa marĩ gwitũ ũhoro.

⁶²Nowe Jesu akĩmwĩra atĩrĩ, Mũndũ o wothe angĩnyita mũraũ na acoke arore na thutha, ndaagĩrĩirũo nĩ gũtuĩka wa ũthamaki wa Ngai.