Luke 5

¹NA gũgĩkinya atĩrĩ, hĩndĩ ĩmwe rĩrĩa kĩrĩndĩ kĩamũhatĩkaga gĩkĩigua Ũhoro wa Ngai-rĩ, Jesu aakorirũo arũgamĩte rũtere-inĩ rũa iria rĩa Genesareti;

²nake akĩona marikabu igĩrĩ ciikaire rũtere-inĩ rũa iria rĩu; no atahi a ciũngũyũ nĩmoimĩte marikabu-inĩ, na nĩ gũthambia maathambagia ngara ciao cia ndigi.

³Nake agĩtonya marikabu ĩmwe yarĩ ya Simoni, akĩmũthaitha amĩtwaratware hanini, yume rũtere-inĩ. Agĩcoka agĩikara thĩ, akĩruta kĩrĩndĩ ũhoro, arĩ marikabu-inĩ.

⁴Na aatiga kwaria, akĩĩra Simoni atĩrĩ, Ta twaratwara marikabu harĩa hariku, mũikũrũkie ngara cianyu cia ndigi iria-inĩ mũtahe ciũngũyũ.

⁵Nake Simoni akĩmũcokeria akĩmwĩra atĩrĩ, Mũnene witũ, nĩtũrutire wĩra wa hinya ũtukũ wothe, na tũtinagwatia kĩndũ o na kĩ: no rĩrĩ, nĩ ũndũ wa kiugo kĩu gĩaku nĩngũikũrũkia ngara iria cia ndigi.

⁶Nao maarĩkia gwĩka ũguo, magĩtaha ciũngũyũ nyingĩ ma; nacio ngara ciao cia ndigi igĩtuĩkatuĩka;

⁷nao makĩheneria arĩa maarutithanagia wĩra nao, marĩ marikabu-inĩ ĩrĩa ĩngĩ, atĩ moke mamateithie. Magĩgĩũka makĩiyũria marikabu icio cierĩ ki, nacio ikĩenda kũhorokera maĩ-inĩ.

⁸Nake Simoni Petero ona ũguo, akĩinamĩrĩra maru-inĩ ma Jesu, akiuga atĩrĩ, Ta njeherera, Mwathani, nĩ gũkorũo ndĩ mũndũ mwĩhia.

⁹Nĩ ũndũ we, o na andũ othe arĩa maarĩ hamwe nake, nĩmaagĩĩtwo nĩ kĩgeganio nĩ ũndũ wa ciũngũyũ icio nyingĩ maatahĩte;

¹⁰o na gwata Jakubu na Johana, ariũ a Zebedi, arĩa maarutithanagia wĩra na Simoni. Nake Jesu akĩĩra Simoni atĩrĩ, Tiga gwĩtigĩra, nĩ ũndũ kuuma rĩu nĩũrĩtahaga andũ.

¹¹Nao maarĩkia gũtwara marikabu ciao rũtere-inĩ, magĩtiga indo ciao ciothe, makĩmũrũmĩrĩra.

¹²Na gũgĩkinya atĩrĩ, hĩndĩ ĩrĩa aarĩ itũũra rĩmwe, hagĩkorũo harĩ mũndũ warĩ na mangũ mwĩrĩ wothe: nake ona Jesu, agĩĩturumithia ũthiũ thĩ, akĩmũthaitha akiuga atĩrĩ, Mwathani, ũngĩenda-rĩ, wahota kũ’honia ’there.

¹³Nake agĩtambũrũkia guoko akĩmũhutia, akiuga atĩrĩ, Nĩngwenda; honio ũthere. Na kahinda o kau mangũ makĩmũtiga, agĩthera.

¹⁴Nake agĩcoka akĩmwatha atĩ ndakere mũndũ o na ũmwe: no kũmwĩra aamwĩrire atĩrĩ, Thiĩ ũkeyonanie kũrĩ mũthĩnjĩri-Ngai, na ũkarutĩre Ngai indo cia ũguo watherio, o ta ũrĩa Musa aathanire, ituĩke kĩmenyithia kũrĩ andũ.

¹⁵No rĩrĩ, ngumo yake ĩgĩkĩria gũtambũka mũno: nao andũ, kĩrĩndĩ kĩingĩ ma, makĩũngana maigue ũhoro, na mahonio mĩrimũ yao.

¹⁶Nowe akĩehera hau, agĩthiĩ werũ-inĩ ahoyagĩre Ngai kuo.

¹⁷Na matukũ macio gũgĩkinya atĩ mũthĩ ũmwe nĩ kũrutana aarutanaga; na rĩrĩ, hagĩkorũo he Afarisai na arutani a watho wa Ngai, arĩa moimĩte matũũra mothe ma Galili na Judea o na Jerusalemu, maikaire thĩ o hakuhĩ na hau aarĩ: naguo hinya wa Mwathani warĩ nake, nĩguo ahonanie.

¹⁸Na rĩrĩ, andũ makĩrehe mũndũ warĩ na mũrimũ wa gũkua ciĩga akuuĩtwo na gĩtanda: na magĩcaria ha kũmũtonyeria thĩinĩ, mamũige o harĩ we.

¹⁹Nao maaga ũrĩa mangĩmũtonyia nĩ ũndũ wa kĩhatĩkano kĩa andũ, makĩhaica nyũmba igũrũ, makĩmũikũrũkia na gĩtanda gĩake o gatagatĩ ka andũ, matharĩtie matubarĩ, makĩmũiga o harĩ Jesu.

²⁰Nake ona ũrĩa metĩkĩtie, akiuga atĩrĩ, Mũndũ ũyũ, nĩwoherũo mehia maku.

²¹Nao aandĩki-marũa na Afarisai magĩitĩka gwĩciria, makiuga atĩrĩ, Kaĩ ũyũ arĩ ũ, ũkũruma Ngai? Nũ ũngĩhota kuohanĩra mehia, tiga o Ngai we wiki?

²²Nowe Jesu akĩmenya meciria mao, akĩmacokeria akĩmera atĩrĩ, mũgwĩciria atĩa ngoro-inĩ cianyu?

²³Ũndũ ũrĩa ũtarĩ hinya nĩ ũrĩkũ? Nĩ kwĩra mũndũ, Nĩwoherũo mehia maku, kana nĩ kũmwĩra, Ũkĩra, wĩtware?

²⁴No rĩrĩ, nĩ getha mũmenye atĩ Mũrũ wa Mũndũ arĩ na hinya gũkũ thĩ wa kuohanĩra mehia (agĩcoka akĩĩra mũndũ ũcio warĩ na mũrimũ wa gũkua ciĩga), Ndakwĩra atĩrĩ, Ũkĩra, woe gĩtanda gĩaku, ũinũke gwaku.

²⁵Na kahinda o kau agĩũkĩra o hau maarĩ, akĩoya kĩrĩa aakomeire, akĩinũka gwake akĩgoocaga Ngai.

²⁶Nao othe makĩgwatwo nĩ kĩgeganio makĩgooca Ngai; magĩkĩigua guoya ma, makiuga atĩrĩ, Kaĩ ũmũthĩ nĩtuonete maũndũ marĩa tũtarĩ twona-ĩ!

²⁷Na rĩrĩ, maũndũ macio maathira, akiuma hau aarĩ, akĩona mũndũ warĩ mwĩtia mbia cia igoti wetagwo Lawii, aikaire thĩ handũ harĩa haarutagĩrũo mbia cia igoti, akĩmwĩra atĩrĩ, Nũmĩrĩra.

²⁸Nake agĩtiga indo ciake ciothe, agĩũkĩra akĩmũrũmĩrĩra.

²⁹Nake Lawii akĩmũrugĩra iruga rĩnene nyũmba-inĩ yake: na nĩhaarĩ andũ gĩkundi kĩnene, etia mbia cia igoti o na andũ angĩ, maikaire thĩ makĩrĩa irio hamwe nao.

³⁰Nao Afarisai o na aandĩki-marũa ao magĩtetia arutwo ake, makĩmoria atĩrĩ, Nĩ kĩ gĩtũmaga mũrĩanĩre na etia mbia cia igoti o na andũ ehia, na mũnyuanĩre nao?

³¹Nake Jesu akĩmacokeria akĩmera atĩrĩ, Andũ arĩa agima matibataragio nĩ mũthondekani, no arĩa arũaru.

³²Ndiokire gwĩta andũ arĩa athingu, no arĩa ehia, nĩ getha merire.

³³Nao makĩmwĩra atĩrĩ, Arutwo a Johana nĩmehingaga kũrĩa irio hĩndĩ nyingĩ, magathaithaga Ngai; nao arutwo a Afarisai nĩmekaga o ũguo; no arutwo aku-rĩ, nĩmarĩaga na makanyuaga.

³⁴Nake Jesu akĩmera atĩrĩ, Githĩ mwakĩhota gũtũma andũ a kĩhikanio-inĩ mehinge kũrĩa irio rĩrĩa mũhikania arĩ hamwe nao?

³⁵Ĩndĩ matukũ nĩmagoka rĩrĩa mũhikania agathengio kũrĩ o, na hĩndĩ ĩo nĩmakehinga kũrĩa irio, o matukũ macio.

³⁶Ningĩ akĩmera na ngerekano atĩrĩ, Gũtirĩ mũndũ ũngĩtehũra nguo njerũ yume ndamĩ, arate nguo ngũrũ nayo; nĩ ũndũ angĩĩka ũguo, aakorũo atembũrĩte ĩrĩa njerũ, na ningĩ ndamĩ ĩo ya nguo njerũ na nguo ĩrĩa ngũrũ itingĩaganĩrĩra.

³⁷Na gũtirĩ mũndũ ũngĩĩkĩra ndibei ya mũhihano mondo ngũrũ; nĩ gũkorũo angĩmĩĩkĩra, ndibei ĩo ya mũhihano yaya gũtembũra mondo icio, nayo ĩitĩke thĩ, nacio mondo ciũre.

³⁸No rĩrĩ, ndibei ya mũhihano yagĩrĩirũo nĩ gwĩkĩrũo mondo njerũ.

³⁹Na gũtirĩ mũndũ wananyua ndibei ngũrũ ũngĩcoka kwenda ĩrĩa ya mũhihano: tondũ nĩekuuga atĩrĩ, ĩrĩa ngũrũ nĩyo njega.