Luke 6

¹GŨGĨGĨKINYA atĩrĩ, atĩ mũthenya ũmwe wa thabatũ agĩthiĩ akĩgera mĩgũnda-inĩ ya ngano: nao arutwo ake magĩtua ngira cia ngano, magĩcihuta na moko makĩrĩaga.

²Nao Afarisai amwe makiuga atĩrĩ, Kaĩ mũgwĩka ũndũ ũrĩa ũtarĩ rũtha gwĩkwo mũthenya wa thabatũ nĩkĩ?

³Nake Jesu akĩmacokeria akiuga atĩrĩ, Kaĩ mũtagĩthomete atĩrĩ, ũrĩa Daudi ekire rĩrĩa aarĩ mũhũtu, we mwene o na arĩa maarĩ nake;

⁴ũrĩa aatonyire nyũmba ya Ngai, akĩoya mĩgate ĩrĩa yaigagĩrũo Ngai akĩmĩrĩa, ningĩ akĩhe arĩa maarĩ nake; nayo nĩyo ĩrĩa ĩtarĩ rũtha kũrĩo nĩ mũndũ tiga athĩnjĩri-Ngai oiki?

⁵Agĩcoka akĩmera atĩrĩ, Mũrũ wa Mũndũ nĩ mwathani wa gwathaga mũthenya wa thabatũ.

⁶Na gũgĩkinya atĩrĩ, mũthenya ũngĩ wa thabatũ, atĩ nĩaatonyire thunagogi, akĩrutana: na kũu kwarĩ mũndũ wonjete guoko kwa ũrĩo.

⁷Nao aandĩki-marũa na Afarisai magĩikara mamũcũthĩrĩirie, mone kana nĩangĩhonania mũthenya wa thabatũ, nĩ getha mone ũndũ wa kũmũthitakĩra.

⁸Nowe akĩmenya meciria mao; akĩĩra mũndũ ũcio wonjete guoko atĩrĩ, Ũkĩra, ũrũgame hau gatagatĩ-inĩ. Nake agĩũkĩra akĩrũgama o hau aarĩ.

⁹Nake Jesu akĩmera, Ngũmũũria atĩrĩ, Kwĩ na rũtha gwĩkaga wega mũthenya wa thabatũ, kana gwĩkaga ũũru? Gũtũũria muoyo, kana kũũnina?

¹⁰Nake akĩmaroranga othe, agĩcoka akĩĩra mũndũ ũcio atĩrĩ, Tambũrũkia guoko. Nake agĩĩka ũguo: nakuo guoko gwake gũgĩcoka kwagĩra.

¹¹No rĩrĩ, andũ acio makĩrakara mũno ta magũrũkĩte, makĩũrania ũrĩa mangĩĩka Jesu.

¹²Gũgĩkinya atĩrĩ, o matukũ macio, atĩ nĩoimagarire agĩthiĩ kĩrĩma-inĩ akahoe Ngai: agĩkĩraara o akĩhoyaga Ngai.

¹³Na gwakĩa-rĩ, agĩĩta arutwo ake, agĩthura andũ ikũmi na erĩ kũrĩ o, akĩmatua atũmwo;

¹⁴nao nĩo aya, Simoni, ũrĩa aatuire rĩĩtwa rĩngĩ, Petero; na Andarea mũrũ wa nyina; na Jakubu na Johana, na Filipu na Baritholomayo,

¹⁵na Mathayo na Toma, na Jakubu wa Alufayo, na Simoni ũrĩa wetagwo Zelote,

¹⁶na Judasi wa Jakubu, na Judasi Mũisikariota, ũrĩa wamũkunyanĩire.

¹⁷Nake Jesu agĩikũrũka kĩrĩma nao, akĩrũgama handũ haaraganu, me na arutwo ake gĩkundi kĩnene, na andũ aingĩ arĩa moimĩte Judea guothe, na Jerusalemu, o na ndere-inĩ cia iria rĩrĩa rĩnene o kũrĩa Turo na Sidoni. Nao nĩmokĩte mamũigue akĩheana ũhoro, na mahonio mĩrimũ yao;

¹⁸nao andũ arĩa maanyamaragio nĩ ngoma thũku makĩhonio.

¹⁹Na andũ othe a kĩrĩndĩ kĩu makĩenda mamũhutie: nĩ gũkorũo hinya nĩwoimaga thĩinĩ wake, ũkamahonia othe.

²⁰Nake agĩtiirĩra arutwo ake maitho, akiuga atĩrĩ: Gũkena-rĩ, nĩ inyuĩ athĩni: nĩ gũkorũo ũthamaki wa Ngai nĩ wanyu.

²¹Gũkena-rĩ, nĩ inyuĩ mũhũtaga rĩu: nĩ gũkorũo nĩmũgacoka kũhũnio. Gũkena-rĩ, nĩ inyuĩ mũrĩraga rĩu: nĩ gũkorũo nĩmũgacoka gũtheka.

²²Gũkena-rĩ, nĩ inyuĩ rĩrĩa andũ makamũmena, na meamũre kũrĩ inyuĩ, na mamũcambie, na mathũkĩrĩrie rĩĩtwa rĩanyu nĩ ũndũ wa Mũrũ wa Mũndũ.

²³Mũthenya ũcio kenai na mũtũhatũhe; nĩ ũndũ-rĩ, igai rĩanyu nĩ rĩnene o Igũrũ: nĩ gũkorũo ũguo noguo maithe mao mekaga anabii.

²⁴No rĩrĩ, kaĩ mũrĩ na haaro-ĩ, inyuĩ itonga: nĩ gũkorũo nĩmũrĩkĩtie kuona kũnyamarũrũo kwanyu.

²⁵Kaĩ mũrĩ na haaro-ĩ, inyuĩ mũhũnaga rĩu: nĩ gũkorũo nĩmũgacoka kũhũta. Kaĩ mũrĩ na haaro-ĩ, inyuĩ mũthekaga rĩu: nĩ gũkorũo nĩmũgacoka gwĩthikĩra na kũrĩra.

²⁶Kaĩ mũrĩ na haaro-ĩ, o inyuĩ, rĩrĩa andũ othe makamũgathagĩrĩria: nĩ gũkorũo ũguo noguo maithe mao mekaga anabii arĩa a maheni.

²⁷No rĩrĩ, ngũmwĩra atĩrĩ inyuĩ mũrathikĩrĩria, Endagai thũ cianyu, na mwĩkage wega arĩa mamũmenaga,

²⁸na ningĩ mũrathimage arĩa mamũrumaga, na mũhoyagĩre arĩa mamũcambagia.

²⁹Na rĩrĩ, mũndũ wa gũkũringa rũthĩa rũmwe, mũhũgũkĩrie rũrĩa rũngĩ naruo; na ũrĩa wa gũgũtunya nguo yaku ya igũrũ, ndũkamũgirie athiĩ na nguo ĩrĩa ya thĩinĩ o nayo.

³⁰O mũndũ ũrĩa wothe ũgũkũhoya kĩndũ, mũhe; na ũrĩa ũngĩgutunya indo ciaku, ndũkamũrandũre.

³¹Na rĩrĩ, o ũrĩa mwendaga gwĩkwo nĩ andũ, mekagei o ũguo.

³²Rĩu-rĩ, mũngĩkorũo mwendaga o arĩa mamwendaga inyuĩ, mũkĩrĩ na ngatho ĩrĩkũ? Nĩ gũkorũo ehia nao nĩmendaga andũ arĩa mamendaga.

³³Na ningĩ, mũngĩkorũo mwĩkaga wega o arĩa mamwĩkaga wega inyuĩ, mũkĩrĩ na ngatho ĩrĩkũ? Nĩ gũkorũo ehia nao nĩmekaga o ũguo.

³⁴Ningĩ mũngĩkorũo muohoragĩra o arĩa mwĩhokete atĩ nĩmakamũrĩha, mũkĩrĩ na ngatho ĩrĩkũ? Nĩ gũkorũo o na andũ ehia nĩmohoragĩra ehia angĩ, nĩ getha magacokagĩrio indo ciiganaine na iria maarutire.

³⁵No rĩrĩ, endagai thũ cianyu, na mũciĩkage wega, o na muohoranagĩre, mũtegwĩkũũĩra mũndũ, na igai rĩanyu rĩgatuĩka rĩnene, na nĩmũgatuĩka ariũ a Ũrĩa-wĩ-Igũrũ-mũno: nĩ gũkorũo we nĩatugaga arĩa matacokagia ngatho, o na arĩa oru.

³⁶Iguanagĩrai tha o ta ũrĩa Ithe wanyu nake aiguanagĩra tha.

³⁷Ningĩ mũtikanekũũanĩre, na inyuĩ ene mũtikanekũũĩrũo: mũtikanatuanĩre, na mũtikanatuĩrũo: ohanagĩrai na nĩmũkoherũo:

³⁸heanagai, na nĩmũkaheo; mũgererũo na kĩgeri kĩrĩa kĩega, o kĩrĩa gĩkindĩrĩtwo na gĩthukathukĩtwo, na kĩrĩa kĩhũmbĩrĩirũo o kinya irio igaitĩka thĩ, nokĩo mũkaheo nakĩo na kiunĩrũo nguo-inĩ cianyu. Nĩ gũkorũo o kĩgeri kĩrĩa mũgeranagĩra nakĩo, nĩkĩo mũgacoka kũgeragĩruo nakĩo.

³⁹Ningĩ akĩmaarĩria na ngerekano atĩrĩ, Kaĩ mũndũ mũtumumu angĩkĩhota kuonereria mũndũ ũngĩ mũtumumu njĩra? Githĩ o erĩ matingĩgũa irima-inĩ?

⁴⁰Mũrutwo ti mũnene kũrĩ mũmũruti: no rĩrĩ, mũndũ o wothe rĩrĩa akaigania, nĩagatuĩka o ta mũmũruti.

⁴¹Na rĩrĩ, nĩ kĩ gĩtũmaga ũrore kĩhuti kĩrĩa kĩĩ riitho rĩa mũrũ wa thoguo, na ndũkũũria mũgogo ũrĩa wĩ riitho rĩaku mwene?

⁴²Kana wakĩhota atĩa kwĩra mũrũ wa thoguo atĩrĩ, Mũrũ wa awa, ta reke ngũrute kĩhuti kĩu kĩĩ riitho rĩaku, ũtakĩonete wee mwene mũgogo ũrĩa wĩ riitho rĩaku mwene? Wee, hinga ĩno, amba ũrute mũgogo ũrĩa wĩ riitho rĩaku mwene, na hĩndĩ ĩo nĩũkuona wega ũrute kĩhuti kĩu kĩĩ riitho rĩa mũrũ wa thoguo.

⁴³Nĩ gũkorũo gũtirĩ mũtĩ mwega ũciaraga maciaro mathũku; na ningĩ gũtirĩ mũtĩ mũthũku ũciaraga maciaro mega.

⁴⁴Tondũ o mũtĩ, o mũtĩ, ũmenyekaga nĩ ũndũ wa maciaro maguo mwene. Nĩ ũndũ-rĩ, andũ matituaga ngũyũ ciigua-inĩ, o na kana magatua thabibu mitare-inĩ.

⁴⁵Mũndũ ũrĩa mwega arutaga kĩrĩa kĩega mũthithũ-inĩ ũrĩa mwega wa ngoro yake; nake ũrĩa mũũru arutaga kĩrĩa kĩũru mũthithũ-inĩ ũrĩa mũũru: nĩ gũkorũo kanua gake kaaragia o maũndũ marĩa maiyũire ngoro.

⁴⁶Na ningĩ mũnjĩtaga Mwathani ũyũ, Mwathani ũyũ, nĩkĩ, na mũtiĩkaga maũndũ marĩa ndĩmwĩraga?

⁴⁷O mũndũ ũrĩa wothe ũũkaga kũrĩ niĩ, na akaigua mohoro makwa akameka-rĩ, nĩngũmuonia ũrĩa ahaana;

⁴⁸ahaanaine na mũndũ ũrĩa waakaga nyũmba, akenja thĩ, akarikia mũkaro mũno, agacoka agaaka gĩtina kĩayo igũrũ rĩa rũnyanjara: na rĩrĩa kwagĩire kĩguũ, maĩ makĩo magĩtherera makĩhũra nyũmba ĩo na nditi, makĩremwo nĩ kũmĩenyenyia, nĩ ũndũ nĩyaakĩtwo wega ma.

⁴⁹No rĩrĩ, mũndũ ũrĩa ũiguaga na akaaga gwĩka-rĩ, ũcio ahaanaine na mũndũ ũrĩa waakire nyũmba igũrũ rĩa tĩri, ĩtarĩ njake wega gĩtina; nayo ĩkĩhũrũo na nditi nĩ maĩ ma kĩguũ, na kahinda o kau kĩhoboka, na gũthuthĩka kwa nyũmba ĩo kwarĩ kũnene ma.