Luke 7

¹NAKE aarĩkia kwaria mohoro make mothe akĩiguagwo nĩ kĩrĩndĩ, agĩtonya Kaperinaumu.

²Na rĩrĩ, mũndũ mũna warĩ mũnene wa athigari igana aarĩ na ngombo ĩrĩa endete, nayo nĩyarũarire na yarĩ hakuhĩ gũkua.

³Nake aaigua ũhoro wa Jesu, akĩmũrekeria athuri amwe a Ayahudi makamũthaithe oke ahonie ngombo ĩo yake.

⁴Nao maakinya harĩ Jesu, makĩmũringĩrĩria ma, makiuga atĩrĩ, Mũndũ ũcio nĩaagĩrĩirũo nĩ gwĩkwo ũguo nĩwe:

⁵nĩ gũkorũo nĩendaga rũrĩrĩ ruitũ, nake we mwene nĩaatwakithĩirie thunagogi iitũ.

⁶Nake Jesu agĩthiĩ nao. Na hĩndĩ ĩrĩa aakinyire hakuhĩ na nyũmba, mũnene ũcio wa athigari igana akĩmũtũmĩra arata ake makamwĩre atĩrĩ, Mwathani, tiga kwĩnogia ũgĩũka: nĩ gũkorũo ndiagĩrĩire atĩ ũtonye nyũmba yakwa thĩinĩ:

⁷o na nĩkĩo nyonire atĩ ndiagĩrĩirũo nĩ gũũka harĩ we niĩ mwene; no kiuge kiugo, nayo ndungata yakwa nĩĩkũhona.

⁸Nĩ gũkorũo o na niĩ ndĩ mũndũ wathagwo, na ndĩ na athigari njathaga; na ndera ũmwe, Thiĩ, nĩathiaga; na ndera ũngĩ, Ũka, nĩokaga; na ndera ngombo yakwa, Ĩka ũũ, noguo ĩĩkaga.

⁹Nake Jesu aaigua mohoro macio, akĩgega nĩ ũndũ wa mũndũ ũcio, akĩĩhũgũrĩra kĩrĩndĩ kĩrĩa kĩamũrũmĩrĩire agĩkĩĩra, Ngũmwĩra atĩrĩ, ndirĩ ndona gwĩtĩkia kũnene ũũ Isiraeli guothe.

¹⁰Nao andũ acio maatũmĩtwo magĩcoka mũciĩ, magĩkora ngombo ĩo ĩrĩ honu biũ.

¹¹Na gũgĩkinya atĩrĩ, ihinda inyinyi rĩathira, agĩthiĩ itũũra rĩetagwo Naini; nao arutwo ake magĩthiĩ nake, o na andũ kĩrĩndĩ kĩingĩ.

¹²Nake aakinya hakuhĩ na kĩhingo gĩa itũũra rĩu, nĩhaarĩ mũndũ mũkuũ wakuuagwo arutwo itũũra, na aarĩ wa mũmwe, nake nyina aarĩ wa ndigwa: na andũ aingĩ a itũũra rĩu maarĩ hamwe nake.

¹³Na rĩrĩ, Mwathani aamuona, akĩmũiguĩra tha akĩmwĩra atĩrĩ, Tiga kũrĩra.

¹⁴Agĩthengerera hakuhĩ akĩhutia gĩtanda: nao akuui akĩo makĩrũgama. Agĩcoka akiuga atĩrĩ, Kamwana gaka, nĩndakwĩra atĩrĩ, Ũkĩra.

¹⁵Na rĩrĩ, mũndũ ũcio warĩ mũkuũ agĩũkĩra agĩitĩka kwaria. Nake Jesu akĩmũnengera nyina.

¹⁶Nao othe makĩgwatwo nĩ guoya: magĩkumia Ngai, makiuga atĩrĩ, Kaĩ gwitũ nĩgũũkĩrĩte mũnabii mũnene-ĩ: o na makiuga atĩrĩ, Ngai nĩaceereire andũ ake.

¹⁷Nayo ngumo ĩo yake ĩgĩtambũka Judea guothe, o na ng’ongo-inĩ ciothe iria ciarĩ gũkuhĩ na kũu.

¹⁸Nao arutwo a Johana makĩmũhe ũhoro wa maũndũ macio mothe.

¹⁹Nake Johana agĩĩta arutwo ake erĩ moke harĩ we, akĩmatũma kũrĩ Mwathani makamũũrie atĩrĩ, Wee nĩwe ũrĩa ũgũũka, kana tweterere ũngĩ?

²⁰Nao andũ acio maakinya harĩ we makiuga atĩrĩ, Johana Mũbatithania nĩaatũtũma harĩ wee tukũũrie atĩrĩ, Wee nĩwe ũrĩa ũgũũka, kana tweterere ũngĩ?

²¹Na thaa o ĩo, akĩhonia andũ aingĩ mĩrimũ yao, na ndũari iria ciamatuuragia mwĩrĩ, akĩingata ngoma njũru ciume andũ; o na agĩtũma andũ aingĩ atumumu macoke kuona.

²²Nake akĩmacokeria akĩmera atĩrĩ, Thiĩi mũkere Johana maũndũ macio muonete, na marĩa mũiguĩte: atĩ arĩa atumumu nĩmacokete kuona; nao arĩa mathuaga magacoka gwĩtwara; nao arĩa marĩ na mangũ makahonio magathera; nao arĩa mataiguaga magacoka kũigua, nao arĩa makuĩte makariũkio; o nao andũ athĩni makahunjagĩrio Ũhoro-ũrĩa-Mwega.

²³Na gũkena-rĩ, nĩ ũrĩa ũtonaga ũndũ wa kũmũhĩngithia nĩ ũndũ wakwa.

²⁴Nao andũ acio maareketio nĩ Johana maarĩkia gũthiĩ, Jesu agĩitĩka kwarĩria kĩrĩndĩ ũhoro wa Johana, akĩmoria atĩrĩ, Mwoimagarire mũgĩthiĩ werũ-inĩ mũkerorere kĩ? Anga nĩ kamũrangi kainainagio nĩ rũhuho?

²⁵No rĩrĩ, mwoimagarire mũgĩthiĩ kuona kĩ? Hihi nĩ mũndũ wĩhumbĩte nguo horo? Atĩrĩrĩ, arĩa megemetie na nguo thaka na magaikaraga megangarĩte makoragwo matũire gwa athamaki.

²⁶No rĩrĩ, mwoimagarire mũgĩthiĩ kuona kĩ? Nĩ kuona mũnabii? Ĩĩ-ni, na ngũmwĩra atĩrĩ, o na nĩ ũrĩa ũkĩrĩte mũno mũnabii.

²⁷Ũcio nĩwe ũhoro ũyũ wandĩkĩtwo nĩ ũndũ wake, Atĩrĩrĩ, nĩngũtũma mũrekio wakwa athiĩ mbere yaku, Ũrĩa ũgũgũthondekera njĩra mbere yaku.

²⁸Ngũmwĩra atĩrĩ, Kũrĩ arĩa maanaciarũo nĩ andũ a nja, gũtirĩ mũnene gũkĩra Johana: no rĩrĩ, ũrĩa wĩ mũnyinyi ũthamaki-inĩ wa Ngai nĩ mũnene kũrĩ we.

²⁹Na andũ othe, o na etia mbia cia igoti, maaigua ũguo, magĩtua Ngai mwega, o arĩa maarĩkĩtie kũbatithio na ũbatithio wa Johana.

³⁰No Afarisai na arutani a watho makĩregana na ũrĩa Ngai endete ameke, nao matiabatithirio nĩwe.

³¹Nake Jesu akiuga atĩrĩ, Nĩ ũndũ ũcio ngũgerekania andũ a rũciaro rũrũ na kĩ? Nao matariĩ ta kĩ?

³²Matariĩ ta twana tũikaire kĩng’ang’a-inĩ tũgĩĩtanaga, tũkoiga atĩrĩ, Tũmũhuhĩire mĩtũrirũ, na mũtinaina rũĩmbo; twamũcakaithia, na mũtinarĩra maithori.

³³Nĩ gũkorũo Johana Mũbatithania okire atekũrĩa mũgate kana akanyua ndibei, na mũkoiga atĩrĩ, Arĩ na ndaimono.

³⁴Nake Mũrũ wa Mũndũ okire akĩrĩaga na akĩnyuaga; na mũkoiga atĩrĩ, Onei mũndũ mũrĩi na mũnyui wa ndibei, na mũrata wa etia mbia cia igoti na wa ehia!

³⁵Ĩndĩ ũũgĩ nĩũmenyekaga kĩhooto kĩaguo nĩ ũndũ wa ciana ciothe ciaguo.

³⁶Na Mũfarisai ũmwe akĩmwĩta makarĩe nake. Nake agĩtonya nyũmba ya Mũfarisai ũcio, agĩikara thĩ arĩe.

³⁷Na rĩrĩ, mũndũ wa-nja warĩ mwĩhia aarĩ itũũra-inĩ rĩu, nake aamenya atĩ nĩaikarĩte akĩrĩa irio kwa Mũfarisai ũcio, agĩthiĩ na cuba warĩ na maguta manungi wega,

³⁸akĩrũgama na thutha wake, o nyarĩrĩ-inĩ ciake, akĩrĩraga-rĩ, agĩitĩka kũmũihũgia nyarĩrĩ na maithori make, agĩcoka agĩcirihũra na njuĩrĩ yake, akĩimumunya mũno, ningĩ akĩihaka maguta macio manungi wega.

³⁹Na rĩrĩa Mũfarisai ũcio wamwĩtĩte onire ũhoro ũcio akĩĩĩra na ngoro atĩrĩ, Mũndũ ũyũ angĩrĩ mũnabii-rĩ, nĩangĩamenya ũhoro wa mũndũ-wa-nja ũyũ ũkũmũhutia, o na ũrĩa atariĩ, atĩ nĩ mwĩhia.

⁴⁰Nake Jesu akĩmũcokeria akĩmwĩra atĩrĩ, Simoni, ndĩ na ũhoro wa gũkwĩra. Nake akiuga, Mũrutani, ta njĩra.

⁴¹Nake Jesu akiuga atĩrĩ, Nĩkwarĩ muohoranĩri mũna warĩ na andũ erĩ maarĩ na thirĩ nake: ũmwe wao aarĩ na thirĩ wa ciringi magana matano, nake ũrĩa ũngĩ aarĩ na thirĩ wa ciringi mĩrongo ĩtano.

⁴²Na rĩrĩ, maaga indo cia kũmũrĩha, akĩmarekera o erĩ. Nĩ ũndũ ũcio-rĩ, ũrĩa ũngĩmwenda gũkĩra ũrĩa ũngĩ nĩ ũrĩkũ?

⁴³Nake Simoni akĩmũcokeria akiuga atĩrĩ, Nguuga nĩ ũrĩa warekeirũo nyingĩ. Nake Jesu akĩmwĩra atĩrĩ, Nĩwatua wega.

⁴⁴Nake akĩĩhũgũrĩra mũndũ-wa-nja ũcio, akĩĩra Simoni atĩrĩ, Nĩũkuona mũndũ ũyũ? Ndonyire nyũmba yaku, nawe ndũna’he maĩ ndĩĩthambe nyarĩrĩ: no ũyũ-rĩ, nĩanjihũgĩtie nyarĩrĩ na maithori make, agacirihũra na njuĩrĩ yake.

⁴⁵Wee-rĩ, ndũna’mumunya: no ũyũ-rĩ, nginya hĩndĩ ĩrĩa ndonyire nyũmba yaku ndarĩ aratigithĩria kũ’mumunya nyarĩrĩ.

⁴⁶Wee-rĩ, ndũna’haka mũtwe maguta: no ũyũ-rĩ, nĩa’hakĩte nyarĩrĩ maguta manungi wega.

⁴⁷Nĩ ũndũ ũcio ngũkwĩra atĩrĩ, Ũyũ-rĩ, nĩoherũo mehia make, namo nĩ maingĩ; tondũ nĩendanĩte mũno: no ũrĩa woheirũo manyinyi, nĩwe wendanaga o hanini.

⁴⁸Agĩcoka akĩĩra mũndũ wa-nja ũcio atĩrĩ, Nĩwoherũo mehia maku.

⁴⁹Nao arĩa maaikarĩte makĩrĩa hamwe nake magĩitĩka kwĩĩra na ngoro atĩrĩ, Kaĩ ũyũ akĩrĩ ũ, ũkĩohanagĩra mehia?

⁵⁰Nake agĩcoka akĩĩra mũndũ-wa-nja ũcio atĩrĩ, Nĩ gwĩtĩkia gwaku gwatũma ũhonoke; thiĩ na ũhoro.