Nehemiah 11

¹Na rĩrĩ, anene a andũ magĩgĩtũũra Jerusalemu; nao andũ arĩa angĩ magĩcuka mĩtĩ, nĩguo matware mũndũ ũmwe thĩinĩ wa andũ ikũmi agatũũre Jerusalemu, itũũra rĩrĩa rĩamũre, nao andũ arĩa angĩ kenda thĩinĩ wa acio ikũmi magatũũre matũũra marĩa mangĩ.

²Nao andũ acio makĩrathima andũ othe arĩa megathũrire o ene atĩ magatũũre Jerusalemu na ũndũ wa kwĩendera na ngoro ciao.

³Na rĩrĩ, aya nĩo anene a bũrũri ũcio arĩa maatũũrire Jerusalemu. No rĩrĩ, matũũra-inĩ marĩa mangĩ ma Juda-rĩ, o mũndũ aatũũrire gĩthaka gĩake matũũra-inĩ mao, naguo ũguo nĩ ta kuuga Aisiraeli, na athĩnjĩri-Ngai ao, na Alawii, o na Anethini, o na ciana cia ndungata cia Suleimani.

⁴Nakuo kũu Jerusalemu gũgĩtũũra andũ amwe a ciana cia Juda, o na a ciana cia Benjamini. Nao arĩa maarĩ a ciana cia Juda nĩ aya: nĩ Athaia, mũrũ wa Uzia, wa Zekaria, wa Amaria, wa Shefatia, wa Mahalaleli, wa ciana cia Perezu;

⁵na Maaseia, mũrũ wa Baruku, wa Koli-hoze, wa Hamia, wa Adaia, wa Joiaribu, wa Zekaria, mũrũ wa mũndũ Mũshiloni.

⁶Nao ariũ a Perezu othe arĩa maatũire Jerusalemu maarĩ andũ njamba magana mana ma mĩrongo ĩtandatũ na anana.

⁷Nao ariũ a Benjamini nĩ aya: nĩ Salu, mũrũ wa Meshulamu, wa Joedi, wa Pedaia, wa Kolaia, wa Maaseia, wa Ithieli, wa Jeshaia,

⁸na thutha wake haarĩ Gabai, na Salai; nao maarĩ andũ magana kenda ma mĩrongo ĩĩrĩ na anana.

⁹Nake Joeli wa Zikiri nĩwe warĩ mũnyabara wao; nake Juda wa Hasenua nĩwe warĩ mũrori itũũra wa kerĩ.

¹⁰Nao a athĩnjĩri-Ngai nĩ Jedaia wa Joiaribu, na Jakini,

¹¹na Seraia, mũrũ wa Hilikia, wa Meshulamu, wa Zadoku, wa Meraiothu, wa Ahitubu, mwathi wa maũndũ ma nyũmba ya Ngai,

¹²nao ariũ a ithe wao arĩa maarutaga wĩra wa nyũmba ĩo ya Ngai, maarĩ magana manana ma mĩrongo ĩĩrĩ na erĩ; o nake Adaia mũrũ wa Jerohamu, wa Pelalia, wa Amuzi, wa Zekaria, wa Pashuru, wa Malikija,

¹³na ariũ a ithe, ciongo cia nyũmba cia maithe, maarĩ magana merĩ ma mĩrongo ĩna na erĩ; nake Amashusai, mũrũ wa Azareli, wa Ahazai, wa Meshilemothu, wa Imeri,

¹⁴na ariũ a ithe wao, andũ njamba irĩ hinya, maarĩ igana rĩa mĩrongo ĩĩrĩ na anana; nake mũnyabara wao aarĩ Zabidieli wa Hagedolimu.

¹⁵Nao Alawii, nĩ aya: Shemaia, mũrũ wa Hashubu, wa Azirikamu, wa Hashabia, wa Buni;

¹⁶na Shabethai na Jozabadi, a anene a Alawii, nao nĩo maaroraga mawĩra ma nyũmba ya Ngai marĩa maarutagwo na kũu nja;

¹⁷na Matania, mũrũ wa Mika, wa Zabedi, wa Asafu, nake nĩwe warĩ mũtongoria ũhoro-inĩ wa gũcokeria Ngai ngatho gũkĩhoyũo; o na Bakabukia, nake nĩwe wamũrũmĩrĩire thĩinĩ wa ariũ a ithe; na Abada, mũrũ wa Shamua, wa Galali, wa Jeduthuni.

¹⁸Nao Alawii othe arĩa maarĩ itũũra rĩu rĩamũre maarĩ magana merĩ ma mĩrongo ĩnana na ana.

¹⁹Ningĩ aikaria mĩrango, nao nĩo Akubu na Talimoni, na ariũ a ithe wao, arĩa maarangagĩra ihingo-inĩ, maarĩ igana rĩa mĩrongo mũgwanja na erĩ.

²⁰Namo matigari ma Isiraeli, o na ma athĩnjĩri-Ngai, o na ma Alawii, maaikarĩte matũũra-inĩ mothe ma Juda, o mũndũ agaikara kũndũ kũrĩa egwatĩire gũgĩtuĩka igai rĩake.

²¹No rĩrĩ, Anethini maatũũrire Ofeli; nao Ziha na Gishipa nĩo maaroraga Anethini.

²²Nake mũrori wa Alawii, kũu Jerusalemu, nĩ Uzi mũrũ wa Bani, wa Hashabia, wa Matania, wa Mika, wa ariũ a Asafu, arĩa maarĩ aini nyĩmbo, nake nĩwe waroraga mawĩra marĩa maarutagwo kũu nyũmba ya Ngai.

²³Nĩ ũndũ kwarĩ watho waathanĩtwo nĩ mũthamaki ũmakoniĩ, gũgakĩgĩa watho wa atĩ aini acio maheagwo kĩrĩa mabatairio nĩkĩo o mũthenya.

²⁴Na rĩrĩ, Pethahia wa Meshezabeli, wa ciana cia Zera wa Juda, nĩwe waikaranagia na mũthamaki nĩ ũndũ wa maũndũ mothe marĩa maakoniĩ andũ acio.

²⁵Naho ha ũhoro wa tũtũũra na mĩgũnda yatuo-rĩ, ciana imwe cia Juda igĩtũũra Kiriathu-ariba, o na matũũra marĩo; o na Diboni, na matũũra marĩo; o na Jekabizeeli, na tũtũũra twarĩo;

²⁶o na Jeshua, na Molada, na Bethi-peleti;

²⁷na Hazaru-shuali, na Biri-shiba na matũũra marĩo;

²⁸na Zikilagi, na Mekona na matũũra marĩo;

²⁹na Eni-rimoni, na Zora, o na Jaramuthu;

³⁰na Zanoa, na Adulamu na tũtũũra twamo, na Lakishi hamwe na gĩthaka kĩarĩo, na Azeka, na matũũra marĩo. Ũguo nĩguo maatũũrire kũu kuuma Biri-shiba o nginya kĩanda kĩa Hinomu.

³¹Nacio ciana cia Benjamini igĩtũũra Geba o na na kũu mbere yakuo o kũu Mikimashi na Aija, o na kũu Beth-eli na matũũra makuo;

³²o na kũu Anathothu, na Nobu, na Anania;

³³na Hazoru, na Rama, na Gitaimu;

³⁴na Hadidi, na Zeboimu, na Nebalati;

³⁵na Lodi, na Ono, o na gĩtuamba kĩrĩa gĩĩtagwo Gĩtuamba kĩa Abundi.

³⁶Nao andũ amwe a Alawii magĩtũũra matonyanĩte na ciana cia Benjamini, no maarĩ a matuanĩra ma bũrũri wa Juda.