Nehemiah 3

¹Hĩndĩ ĩo Eliashibu, mũthĩnjĩri-Ngai ũrĩa mũnene, agĩgĩũkĩra me na ariũ a ithe arĩa angĩ athĩnjĩri-Ngai, magĩaka Kĩhingo kĩa Ng’ondu; nao magĩkĩamũrĩra Jehova, o nayo mĩrango yakĩo makĩmĩĩkĩra; makĩmĩamũra o nginya mũthiringo-inĩ wa nyũmba ndaya na igũrũ wa Hamea, o hau mũthiringo-inĩ wa nyũmba ndaya na igũrũ wa Hananeli.

²Nao andũ arĩa maariganĩtie nake magĩaka-rĩ, nĩ andũ a Jeriko. Nake mũndũ ũrĩa wariganĩtie na acio agĩaka nĩ Zakuri wa Imuri.

³Nakĩo Kĩhingo gĩa Ciũngũyũ nĩ ariũ a Hasenaa maagĩakire, na nĩo mekĩrire hingĩro ciakĩo, o nayo mĩrango yakĩo makĩmĩĩkĩra handũ hayo, na makĩmĩĩkĩra icuuma cia kũmĩhinga, o na igera ciayo cia kũmĩĩkĩra hinya.

⁴Ningĩ arĩa maarigainie na acio magĩcokereria rũthingo rũu, nĩ Meremothu, mũrũ wa Uria wa Hakozu. O nake ũrĩa wariganĩtie na acio akĩrũcokereria nĩ Meshulamu, mũrũ wa Berekia wa Meshezabeli. O nake ũrĩa wariganĩtie na acio akĩrũcokereria nĩ Zadoku wa Baana.

⁵O nao arĩa maariganĩtie na acio makĩrũcokereria nĩ Atekoa; no rĩrĩ, anene ao matiigana kwĩnogia na wĩra ũcio wa mwathi wao.

⁶Ningĩ Kĩhingo gĩa Tene-rĩ, Joiada wa Pasea, na Meshulamu wa Besodeia, nĩo maagĩcokereirie, na magĩgĩĩkĩra hingĩro ciakĩo; o nayo mĩrango yakĩo makĩmĩĩkĩra handũ hayo na makĩmĩĩkĩra icuuma ciayo cia kũmĩhinga, o na igera cia kũmĩĩkĩra hinya.

⁷O nao arĩa maariganĩtie nao icokererio-inĩ rĩa rũthingo rũu, nĩ Melatia, Mũgibeoni, na Jadoni, Mũmeronothi, o na andũ a Gibeoni na a Mizipa, namo matũũra macio nĩmo maathagwo nĩ barũthi ũrĩa wa mũrĩmo ũyũ wa rũũĩ rũa Farati.

⁸Nao arĩa maariganĩtie nao icokererio-inĩ rĩa rũthingo rũu nĩ Ũzieli wa Harihaia, wa aturi a thahabu. Na mũndũ ũrĩa wariganĩtie nao icokererio-inĩ rĩaruo, nĩ Hanania, wa thiritũ ya andũ arĩa ohĩgĩrĩru ũtakania wa ndawa, nao nĩo mekĩrire rũthingo rũu rũa Jerusalemu hinya makĩrũkinyia rũthingo-inĩ rũrĩa rũariĩ.

⁹Nake mũndũ ũrĩa wariganĩtie nao icokererio-inĩ rĩaruo, nĩ Refaia wa Huri, ũrĩa warĩ mwathi wa nuthu ya bũrũri ũrĩa ũgwataine na Jerusalemu.

¹⁰Nake mũndũ ũrĩa wariganĩtie nake icokererio-inĩ rĩaruo, nĩ Jedaia wa Harumafu, nake aarũcokereirie harĩa haariganĩtie na nyũmba yake we mwene. Nake mũndũ ũrĩa wariganĩtie nake icokererio-inĩ rĩaruo nĩ Hatushu wa Hashabuneia.

¹¹Nao Malikija wa Harimu, na Hashubu wa Pahathu-moabi, magĩcokereria gĩcunjĩ kĩngĩ, o na kĩmũthiringo kĩa nyũmba ndaya na igũrũ ya macua ma mwaki wa gũtwekia igera.

¹²Nake mũndũ ũrĩa wariganĩtie nao icokererio-inĩ rĩaruo, nĩ Shalumu wa Haloheshu, mwathi wa nuthu ĩrĩa ĩngĩ ya bũrũri ũrĩa ũgwataine na Jerusalemu, me na airĩtu ake.

¹³Nakĩo Kĩhingo gĩa Kĩanda gĩgĩcokererio nĩ Hanuni, me na andũ arĩa maatũũraga Zanoa; nĩo maagĩakire, o nayo mĩrango yakĩo makĩmĩĩkĩra handũ hayo, nacio icuuma cia kũmĩhinga, o na igera ciayo cia kũmĩĩkĩra hinya, magĩciĩkĩra; ningĩ magĩgĩcokereria handũ ha mĩkono ngiri ĩmwe ya rũthingo rũu, makĩrũkinyia Kĩhingo-inĩ gĩa Kĩara-inĩ.

¹⁴Nakĩo Kĩhingo kĩu gĩa Kĩara-inĩ gĩgĩcokererio nĩ Malikija wa Rekabu, mwathi wa bũrũri ũrĩa ũgwataine na Bethi-hakeremu; agĩgĩaka, o na agĩĩkĩra mĩrango yakĩo handũ hayo, o na icuuma cia kũmĩhinga; nacio igera ciayo cia kũmĩĩkĩra hinya nĩwe waciĩkĩrire.

¹⁵Nakĩo Kĩhingo gĩa Gĩthima gĩgĩcokererio nĩ Shalumu wa Kolihoze, mwathi wa bũrũri ũrĩa ũgwataine na Mizipa; agĩgĩaka, na agĩkĩgita, o na agĩĩkĩra mĩrango yakĩo handũ hayo; agĩcoka agĩĩkĩra icuuma cia kũmĩhinga, o na igera cia kũmĩĩkĩra hinya. O na ningĩ nĩwe waakire rũthingo rũa Karia ga Shela, hakuhĩ na mũgũnda wa mũthamaki, o nginya ngathĩ-inĩ ĩrĩa ĩthiaga ĩikũrũkĩte yumĩte itũũra rĩa Daudi.

¹⁶Nake mũndũ ũrĩa wariganĩtie nake icokererio-inĩ rĩu, nĩ Nehemia wa Azibuku, mwathi wa nuthu ya bũrũri ũrĩa ũgwataine na Bethi-zuru, nake agĩkĩrũkinyia handũ harĩa haarigainie na mbĩrĩra cia Daudi, o na karia-inĩ karĩa kenjetwo tene, o na nyũmba-inĩ ya andũ arĩa maarĩ njamba.

¹⁷Nao Alawii, aa Rehumu wa Bani, nĩo maariganĩtie nake magĩgĩcokereria rũthingo rũu. Nake mũndũ ũrĩa wariganĩtie nake icokererio-inĩ rĩaruo nĩ Hashabia, mwathi wa nuthu ya bũrũri ũrĩa ũgwataine na Keila, nake aarũcokereirie nĩ ũndũ wĩra waho wakoniĩ andũ a bũrũri ũcio aathanaga.

¹⁸Nao andũ arĩa maariganĩtie nake icokererio-inĩ rĩaruo nĩ ariũ a ithe wao, nao nĩ aa Bavai wa Henadadi, mwathi wa nuthu ĩrĩa ĩngĩ ya bũrũri ũrĩa ũgwataine na Keila.

¹⁹Nake mũndũ ũrĩa wariganĩtie nake icokererio-inĩ rĩaruo nĩ Ezeri wa Jeshua, mwathi wa Mizipa, nake aakire gĩcigo kĩrĩa kĩringaine na rĩambatĩro-inĩ rĩa ũigo wa indo cia mbaara, rĩĩthiorero-inĩ rĩa rũthingo.

²⁰Nake mũndũ ũrĩa wariganĩtie nake, agĩcokereria gĩcigo kĩngĩ na kĩyo mũno, nĩ Baruku wa Zabai, arutĩtie rĩĩthiorero-inĩ rĩu rĩa rũthingo rũu, o nginya mũrango-inĩ wa nyũmba ya Eliashibu, mũthĩnjĩri-Ngai ũrĩa mũnene.

²¹Nake mũndũ ũrĩa wariganĩtie nake, agĩcokereria gĩcigo kĩngĩ, nĩ Meremothu, mũrũ wa Uria wa Hakozu, arutĩtie mũrango-inĩ wa nyũmba ya Eliashibu, o nginya harĩa nyũmba ĩo ya Eliashibu yathirĩire.

²²Nao arĩa maariganĩtie nake icokererio-inĩ rĩaruo nĩ athĩnjĩri-Ngai arĩa maatũire Bũrũri ũrĩa Mũgũu.

²³Nao arĩa maariganĩtie nao, makĩrũcokereria, nĩ Benjamini na Hashubu, nao maakire o handũ harĩa haaringanĩte na nyũmba yao. Nake mũndũ ũrĩa wariganĩtie nao icokererio-inĩ rĩaruo nĩ Azaria, mũrũ wa Maaseia wa Anania, nake aakire o mwena-inĩ wa nyũmba yake we mwene.

²⁴Nake ũrĩa wariganĩtie nake, agĩcokereria gĩcigo kĩngĩ, nĩ Binui wa Henadadi, arutĩtie nyũmba ya Azaria o nginya rĩĩthiorero-inĩ rĩa rũthingo, o na koine-inĩ.

²⁵Na rĩrĩ, Palali, mũrũ wa Uzai, nĩwe wacokereirie handũ harĩa haaringanĩte na rĩĩthiorero rĩa rũthingo rũu, o na mũthiringo wa nyũmba ndaya na ĩgũrũ ĩrĩa yacomokete na mwena o kũu nyũmba-inĩ ya mũthamaki ya na igũrũ, gũkuhĩ na nja ya arangĩri. Nake mũndũ ũrĩa wariganĩtie nake icokererio-inĩ rĩa rũthingo rũu, nĩ Pedaia wa Paroshu.

²⁶(Na rĩrĩ, Anethini nĩo maatũire Ofeli, o nginya Kĩhingo-inĩ kĩa Maĩ, mwena ũrĩa ũrorete irathĩro, o na mũthiringo-inĩ wa nyũmba ndaya na igũrũ ĩrĩa ĩcomokete na mwena.)

²⁷Nao arĩa maariganĩtie na Pedaia, magĩcokereria gĩcunjĩ kĩngĩ, nakĩo nĩ kĩrĩa kĩringanĩte na mũthiringo wa nyũmba ndaya na igũrũ ĩrĩa nene ĩcomokete mwena-inĩ wa rũthingo, nĩ Atekoa; makĩrũcokereria o nginya rũthingo rũa Ofeli.

²⁸Nao athĩnjĩri-Ngai magĩthondeka mwena wa igũrũ wa Kĩhingo kĩa Mbarathi, o mũndũ agĩcokereria harĩa haringaine na nyũmba yake we mwene.

²⁹Nake mũndũ ũrĩa wariganĩtie nao icokererio-inĩ rĩaruo nĩ Zadoku wa Imeri, o handũ harĩa haringanĩte na nyũmba yake mwene. Nake mũndũ ũrĩa wariganĩtie nake icokererio-inĩ rĩaruo nĩ Shemaia wa Shekania, na nĩwe warĩ mũikaria wa Kĩhingo kĩa Mwena wa Irathĩro.

³⁰Nao arĩa maariganĩtie nake, magĩcokereria gĩcigo kĩngĩ, nĩ Hanania wa Shelemia, o na Hanuni, mũrũ wa Zalafu wa atandatũ. Nake ũrĩa wariganĩtie nake icokererio-inĩ rĩa rũthingo rũu, nĩ Meshulamu wa Berekia, o handũ harĩa haringanĩte na kanyũmba gake.

³¹Nake mũndũ ũrĩa wariganĩtie nake akĩrũcokereria nĩ Malikija, wa aturi a thahabu, nake akĩrũkinyia o nyũmba-inĩ ya Anethini, o na ya onjorithia, kũrĩa kũringaine na Kĩhingo kĩa Hamifikadi, o na ihaicĩro-inĩ rĩa koine.

³²Nao andũ arĩa maariganĩtie nake magĩcokereria rũthingo rũu o kũu gatagatĩ-inĩ ka ihaicĩro rĩu rĩa koine na Kĩhingo kĩa Mbũri, nĩ aturi a thahabu o na onjorithia.