Nehemiah 4

¹No nĩgwakinyire atĩrĩ, atĩ hĩndĩ ĩrĩa Sanibalati aaiguire atĩ nĩtũraaka rũthingo rũa Jerusalemu, agĩgĩtũkũyana, agĩthũgũta mũno, agĩthekerera Ayahudi nĩ kũmamena.

²Nake agĩkĩaria ariũ a ithe me ho, o na athigari a ita a Samaria, akĩũria atĩrĩ, Ĩ Ayahudi aya ahinyaru ũũ mareka atĩa hihi? Anga marenda kwĩĩkĩra hinya megitĩre? Kana hihi nĩ magongona mekũruta? Anga nĩmegũkĩrĩkia wĩra ũyũ mũthenya o ro ũmwe? Anga nĩmagakĩriũkia mahiga marĩa maateirũo hĩba-inĩ cia mahuti, kuona atĩ nĩmacinĩtwo?

³Na rĩrĩ, Tobia, Mũamoni, aakĩrĩ hakuhĩ nake; nake agĩkiuga atĩrĩ, O naruo rũthingo rũu maraaka rũa mahiga-rĩ, o na mbwe ĩngĩrũhaica yarũmomora.

⁴Atĩrĩrĩ, wee Ngai witũ, ta thikĩrĩria; nĩ ũndũ nĩ kũmenwo tũramenwo; naruo rũmena rũrĩa tũramenwo ũtũme rũmacokerere, na ũmaneane magatunyĩrũo indo ciao kũrĩa magatwarũo maatahwo.

⁵Naguo ũũru wao ndũkanaũhithĩrĩre, o na mehia mao ndũkanamahuurithie atĩ nĩguo matige kuonwo nĩwe; nĩ ũndũ nĩmagũthirĩkĩtie magatũma ũrakare me harĩ aaki aya.

⁶Ũguo nĩguo twagĩakire rũthingo rũu, naruo rũthingo rũu ruothe rũkĩnyitithanio, rũgĩgĩkinya gatagatĩ ka harĩa rũendagwo rũkinye na igũrũ; nĩ gũkorũo andũ acio maarutire wĩra ũcio me na ngoro ikwenda kũũnina narua.

⁷No rĩrĩ, gũgĩkinya atĩrĩ, atĩ hĩndĩ ĩrĩa Sanibalati, na Tobia, o na Aarabu, na Aamoni, na Aaahidodu, maaiguire atĩ wĩra ũcio wa gũcokereria rũthingo rũa Jerusalemu kũrĩa rũathũkĩte no ũrathiĩ na mbere, o na atĩ mathenya marĩa matharũku nĩmaitĩkĩte gwakwo, magĩkĩrakara mũno;

⁸nao othe magĩthiĩ ndundu, magĩgĩcirĩra gũũka kũhũrana na Jerusalemu, makũgere ngero.

⁹No ithuĩ nĩ kũhoya twahoire Ngai witũ, na tũkĩiga andũ a gũtũrangĩra harĩ o mũthenya na ũtukũ.

¹⁰Nao Ayahudi makiuga atĩrĩ, Hinya wa andũ arĩa makuuaga mĩrigo nĩũnyihanyihĩte, na ningĩ mahuti maya marũndĩtwo gũkũ nĩ maingĩ, na tondũ ũcio tũtingĩhota gwaka rũthingo rũrũ.

¹¹Nacio thũ ciitũ ikiuga atĩrĩ, Matikamenya ũndũ o na ũrĩkũ, o na kana mone na maitho, nginya o hĩndĩ ĩrĩa tũgakinya thĩinĩ wao, tũmorage, tũtũme wĩra ũcio ũtige kũrutwo.

¹²Na gũgĩkinya atĩrĩ, atĩ hĩndĩ ĩrĩa Ayahudi arĩa maatũire gũkuhĩ nao moimaga kwao magoka kũrĩ ithuĩ, makĩrũmanĩria o ta maita ikũmi gũtwĩra atĩrĩ, Andũ aya nĩmareyũngania moke matũhũre matuumĩte na mĩena yothe.

¹³Tondũ ũcio ngĩkĩiga andũ handũ harĩa hakubu na kũu thutha wa rũthingo rũu, manyitĩte hiũ ciao cia njora, na matimũ, na mota, o ta ũrĩa mbarĩ ciao ciatariĩ.

¹⁴Ngĩkĩbara wega, ngĩũkĩra ngĩĩra andũ arĩa marĩ igweta, o na aathani, o na andũ arĩa angĩ, atĩrĩ, Menyai mũmetigĩre; ririkanai Jehova, we ũrĩa mũnene na wa kũmakania, mũhũranĩre ariũ a ithe wanyu, na ariũ anyu, na airĩtu anyu, na atumia anyu, o na nyũmba cianyu.

¹⁵Na gũgĩkinya atĩrĩ, atĩ hĩndĩ ĩrĩa thũ ciitũ ciaiguire atĩ nĩtũmenyete ũhoro ũcio, nake Ngai agĩkorũo atũmĩte cira wao ũtuĩke wa tũhũ-rĩ, tũgĩkĩhũndũka ithuothe, tũgĩcoka o rũthingo-inĩ, o mũndũ agĩcoka wĩra-inĩ wake.

¹⁶Na gũgĩkinya atĩrĩ, atĩ kuuma hĩndĩ ĩo, nuthu ya ndungata ciakwa ĩgĩtuĩka nduti wĩra, o nayo nuthu ĩrĩa ĩngĩ yao ĩkĩnyita matimũ na ngo, na mota, o na nguo cia igera; nao aathani makĩrũgama na thutha wa andũ othe a nyũmba ya Juda.

¹⁷Nao andũ arĩa maakaga rũthingo, o na arĩa maakuuaga mĩrigo, o mũndũ akĩĩoera mũtĩ wa mbaara; mũndũ o mũndũ wao agakĩrutaga wĩra wake na guoko kũmwe, nakuo guoko kũrĩa kũngĩ akanyita indo ciake cia mbaara nakuo;

¹⁸nao aaki-rĩ, o mũndũ aarĩ na rũhiũ rũake rũa njora, eohete; nao maakaga matariĩ ũguo. Nake mũndũ ũrĩa wahuhaga karumbeta akanjikara hakuhĩ.

¹⁹Na niĩ ngĩĩra andũ arĩa marĩ igweta, o na aathani, o na andũ arĩa angĩ, atĩrĩ, Wĩra ũyũ nĩ mũingĩ na nĩ mũnene, na ithuĩ tũharaganĩirie rũthingo-inĩ igũrũ, o mũndũ agaikara haraya na ũrĩa ũngĩ;

²⁰tondũ ũcio handũ o hothe harĩa mũrĩigua karumbeta gakĩhuhwo-rĩ, nĩmũgoka tũtũngane ho; Ngai witũ nĩwe ũrĩtũhũranĩra.

²¹Ũguo nĩguo twakĩrutire wĩra ũcio; nayo nuthu ĩmwe ya andũ aitũ ĩgakĩnyitaga matimũ kuuma o rũcinĩ nginya o hĩndĩ ĩrĩa njata irĩonwo hwaĩ-inĩ.

²²Ningĩ ihinda o ro rĩu ngĩĩra andũ atĩrĩ, O mũndũ nĩaraarage gũkũ Jerusalemu me na ndungata yake, nĩ getha matũrangagĩre ũtakũ, na marutage wĩra mũthenya.

²³Tondũ ũcio, o na niĩ, niĩ mwene, o na ariũ a baba, o na ndungata ciakwa, o na andũ arĩa arangĩri arĩa maanũmĩrĩire, gũtiarĩ mũndũ o na ũmwe witũ warutaga nguo ciake mwĩrĩ, tiga o rĩrĩa athiĩte gwĩthamba.